تبریز دانشگاهینین رئیسی دانشگاهلارین تولیددهکی مهم نقشلرینه تأکید ائلهدی
یازار : میرزه عبدالصمد ملکی | بؤلوم : اجتماعی
+0 به یه ن
تبریز دانشگاهینین رئیسی تولیدی اؤلکهنین توسعه موتورو بیلمکله آرتیردی: بو مسیرده دانشگاهلار فنی علم تولید ائلهمکله مهم نقش ایفا ائلهیه بیلرلر.
دکتر محمد رضا پورمحمدی سه شنبه گونو دانشگاهین اوستادلار و ایشلهینلری ایله گؤروشده، بو ایلین معظم رهبرلیق مقامی طرفیندن تولید ایلی آدلاندیرماغا اشاره ائلهییب دئدی: تولیددن منظور هر طرفلی تولید یعنی کالا، خدمت و فنی علم تولیدیدیر.
او آرتیردی: دانشگاهلار و علمی مرکزلرین مقاومتی اقتصادین تحققوندا دانیلماز نقشلری وار.
اوستاد پورمحمدی آرتیردی:دانشگاهلار اوستادلار و نخبه دانشجولارین تازا ایدهلریندن حمایت ائلهمکله و اونلاری تجاری ائتمکله، اؤز واقعی رسالتلرینه عمل ائلهیه بیلرلر.
او، مقاومتی اقتصادین تحقق تاپماسی یوللاریندان بیرینی، محصول تولید ائدیب دونیا بازارلارینا صادر ائلهمک بیلدی. تبریز دانشگاهی رئیسی آرتیردی: برجامین آچیلیشلاری، تحریملرین گؤتورولمهسی، بین المللی بانکی و معاملهلرین تازادان قورولماسینی نظرده آلماقلا بو یولدا تولیدچیلره و صنعتگرلره تازا فرصتلر آچیلیب.
امام هادی (ع) شیعهنین یورولماز مبارزی
یازار : میرزه عبدالصمد ملکی | بؤلوم : دین
+0 به یه ن
امام هادی (ع) اونون و کؤمکلری اوستونده اولان حکومت طرفیندن باسقیلار و مراقبتلره رغماً اؤز حرکتینی ایکی؛ امّتی آگاه ائتمک و شیعهلردن دفاع ائتمگی باشلادی.
امام هادی مراقبت آلتیندا
متوکلین امامی سامرهیه چاغیرماقدان هدفی ، او حضرتین بوتون ایشلرینین گؤز قاباغیندا اولماسی و او حضرتی دربار حاشیهسینده کؤلگهده قویماق ایدی.
امام، ظاهرده اؤزونو عباسی خلافتی ایله مفاوق گؤستریردی و اونلار چاغیران قوناقلیقلارا گئدیب مراسملرینده شرکت ائدیردی. (غیبت تاریخی، ص ۱۴۲.)
حکومتین سیاستی، گوندن گونه او حضرتین علیهینه توندلشیردی. حتی متوکل خلافتینین سونلاریندا او حضرتی چوغوللوقلار نتیجهسینده زنداندا حبس ائلهدی. بو چوغوللوقلار متوکلی آییق ائلیردی و او حضرتین علیهینه اولان مراقبتین آرتیریلماسینا سبب اولوردو.
امام (ع) بو خفقان ایچینده ایشلرین دوز گئتمهسینه چالیشیردی. او حضرتین جریانی ایکی جبههده قاباغا آپاریردی.
الف: امّتی آگاهلاندیرماق و اؤز علمی موضعلرینی نشان وئرمک. متوکل او حضرتی سیندیرماق اوچون مختلف عالملریدن او حضرتدن چتین سؤاللار سوروشماسینی ایستیردی و حضرت، اونلارا چوخ گوجلو و منطقلی جوابلار وئرمکله شیعه دونیاسینا اعتبار قازاندیریردی.
بو بارهده یحیی بن اکثم متوکله بئله دئییر: «منیم بو کیشیدن سوروشدوقلاریمدان سونرا ایستهمیرم آیری سوال اوندان سوروشولسون، نییه کی اونون عالم اولدوغو آشکارلانسا رافضیلر گوجلنرلر. (مناقب، ج ۳، ص ۵۰۷.)
ب: شیعهلردن موغایات اولماق و اونلارین احتیاجلارینی یئرینه یئتیرمک
امام، شیعهلرین گوجلنمهسی و فعالیت ائده بیلمکلری اوچون الیندن گلنی ائلیردی.
تاریخده بئله گلیب: امام هادی (ع) اوچون گیزلی و آشکار یوللارلا چوخلو پول خمس، زکات و خراج عنوانیندا گلیردی و او حضرت اونلاری اسلامین منفعتلری یولوندا خرجلهییردی کی حرکتدن دایانماسین. البته بو حرکتلر عباسیلرین گؤزوندن کناردا اولوردو». (مناقب، ج ۳، ص ۵۱۲.)
ج: وکالت آدیندا ایشلک سازمانین تأسیسی
شیعه اماملارینین سون دؤرلری اختناقدا کئچسهده بو زمانلاردا شیعهلر اسلامی اؤلکهلرده یاییلدی و امام هادی (ع) و عراق، یمن، مصر و آیری منطقهلرین شیعهلری آراسیندا ارتباط واریدی. وکالت سیستمی بو ارتباطی گوجلندیریب تضمین ائلیردی. وکیللر وجوهاتی اماما گؤندرمکدن علاوه جماعتین کلامی و فقهی مشکللرینی رفع ائلهمکده کؤمک ائلیردیلر.
جاسم حسینین دئدیگینه اساساً تاریخی روایتلره گؤره شیعهلرین وکیللری دؤرد دستهیه بؤلونوردو:
بغداد، مدائن، سواد و کوفه
بصره و اهواز
قم و همدان حجاز،
یمن و مصر (جاسم حسین، اون ایکینجی امامین غیبت تاریخی. ص۱۳۷)
امامین وکیللری مکتوب و مطمئن نفرلرین واسطهسی ایله اماملا ارتباطدا اولوردولار.
توکون آغارماسی ایله استرسین رابطهسی
یازار : میرزه عبدالصمد ملکی | بؤلوم : ساغلاملیق
+0 به یه ن
حتماً ائشیدیبسیز کی استرسیز نه قدر آز اولسا آغ توکلریز بیر او قدر آز اولار.
بو بارهده سیزه هم یاخشی و هم پیس خبریمیز وار: بو مسأله او قدر ده دوغرو دئییل و استرس، توکلرین آغارماسیندا بیر او قدر ده تأثیرلی دئییل. حقیقتده توکون آغارماسینین اساس عاملی ارث و ژنتیک مسألهسیدیر.
بریتانیانین توک و دری متخصصلر انجمنینین عالملریندن اولان «نینا گود»ون دئدیگینه گؤره، جماعتین چوخونون ائلهدیکلری ایله توکلرینین آغارماسی آراسیندا ارتباط یوخدور.
آنجاق توکون آغارماسی ایله استرسین مرتبط اولماسی دوشونجهسی هاردان گلیب؟
2011-جی ایلینده سیچانلار اوستونده اولان آزمایشده، اوزون مدت استرسین DNA دا تأثیر بوراخدیغی او دا توکلرین آغارماسیندا تأثیرلی اولدوغو اورتایا چیخدی.
آنجاق ملبورن دانشگاهینین عالملریندن اولان رادنی سینکلرین دئدیگینه گؤره، استرس ایله توکلرین آغارماسی آراسیندا هئچ رابطه یوخدور.
گونشین اطرافینا ترسه دولانان بالاجا سیاره
یازار : میرزه عبدالصمد ملکی | بؤلوم : تكنولوژی
+0 به یه ن
تازا تحقیق بالاجا سیارهنین بیر میلیون ایل بویوندا گونون اطرافینا ترسه دولاندیغینی اورتایا چیخاردیب.
دیلی میلین وئردیگی خبره گؤره، البته بو بالاجا سیاره گونشین اطرافیندا معکوس دولانان یالنیز فضایی شئی دئییل. ٢٠١٥BZ٥٠٩ آدلانان بو سیارهدن علاوه یوزه یاخین گؤی داشیدا گونون اطرافینا ترسه دولانیرلار.
BZ سیارهسی قیرمیزی رنگدهدیر و ژوپیرین مداریندا دولانیر. آتابسکا دانشگاهینین محققلریندن
دکتر مارتین کانرین دئدیگینه گؤره، ژوپیترین جاذبهسی اونو BZ ایله چاققیشماغا مانع اولور.
عالملرین دئدیگینه گؤره بو سیارهنین قطری 3 کیلومتر جیواریندادیر و اونون منشأنینین هالی سیارهسی اولدوغونو حدس وورورلار.
ایندییه قدر بیر جهتده گونون اطرافینا دولانان بیر میلیوندان آرتیق گؤی داشی تانینیب.
40 تلقین جملهسی
یازار : میرزه عبدالصمد ملکی | بؤلوم : ساغلاملیق
+0 به یه ن
آلت شعوروزو (ضمیر ناخود آگاه) گوجلندیریب خوشبختلیک اوچون دؤردنالا گئده بیلمگیز اوچون سیزه 40 تلقین جملهسی تقدیم ائدیرم. هر گون هئچ اولمازسا ایکی دفعه بو جملهلری اوخویون. بیر آی سونرا نتیجهسینی عینی شکلده گؤرهجکسیز.
1. دونیانین سونسوز بوللوق و برکتی منه طرف یاغیر.
2. من اؤزومو اولدوغوم کیمی قبول ائدیب سئویرم.
3. من تعیین اولموش وظیفهلری یئرینه یئتیرمگه بوتون لازم اولان گوجلرله یارانمیشام.
4. من اللهین لاپ گؤزل بندهلرین بیرییم.
5. پول سئوگی ایله منه طرف گلیر و منده پولو سئوگی ایله خرجلهییرم.
6. من پولو سئوگی ایله پایلاشیرام.
7. من پولو خرجلهدیکجه منه طرف آخان پول چوخالیر.
8. منیم بانک حسابلاریم هر گون پول ایله دولوب داشیر.
9. من بوللو پول قازانماغا لایقم.
10. من هر شئیین لاپ یاخشیسینا لایقم.
11. احتیاجیم اولان پول احتیاجیم اولان آن منه طرف گلیر.
12. من چوخ پولا لایقم و چوخ پول حقّیمدیر.
13. پول چوخ راحت منه طرف گلیر.
14. چوخ وارلی اولماق منیم حقّیمدیر.
15. من هر جهتدن وارلی اولماغا لایقم.
16. کایینات بوللوق ایچیندهدیر و بو بوللوق منه طرف آخیر.
17. کایینات منه پولو چوخالداراق وئریر.
18. کایینات احتیاجیم اولان شئیی منه لازم اولان آن وئریر.
19. کاییناتین منه وئرمک ایستهدیگی بوتون بوللوق و برکتی آییرمادان اولدوغو کیمی قبول ائدیرم.
20. من چوخ دَیَرلی اولدوغومو بیلیرم.
21. منیم و اؤز قیمتینی بیلن منه طرف گلیر و منده قالیر.
22. سئوگی محتشم بیر انرژیدیر.
23. بدنیم و ذهنیم سئوگی ایله بسلنیر.
24. من هامیمیزین بیر اولدوغونو بیلیرم.
25. منیم سئوگی بیلینجیم چوخ یوکسکدیر.
26. من چوخ دَیَرلییم.
27. من اؤز یولومدا سئوگی ایله ایلرلهییرم.
28. من کاییناتین بیر پارچاسییام.
29. من سونسوز بوللوق و برکت ایچیندهیم.
30. منه طرف آخان سونسوز بوللوق و برکتی بوتون چئورهمه و احتیاجی اولانلارا وئریرم.
31. ایشیمه چوخ راحت متمرکز اولورام و چوخ وئریملی چالیشیرام.
32. اؤزومو هر زمان و هر یئرده آزاد و اؤز گووَنله افاده ائدیرم.
33. من همیشه اؤزومو لاپ دوز عبارت، لاپ گؤزل حرکتلر و لاپ دوغرو سؤزلرله افاده ائدیرم.
34. بو گون و هر گون ساغلیغیم لاپ گؤزل دورومدادیر.
35. پولون منه طرف هر یئردن آخماسینا اجازه وئریرم.
36. پول منه آزادجا آخار و من پولو خوشبختلیکله خرجلهییرم.
37. من بیلهرکدن و یا بیلمهیهرکدن یاراتدیغیم مانعلری ابطال ائدیرم.
38. ذهنیم و بدنیم قصورسوز بیر دنگه ایچیندهدیر.
39. چوخ ساغلیقلی و کاییناتلا اویوم ایچیندهیم.
40. کئچمیشده منی اوزَن انسانلاری باغیشلاییب اونودورام.