اخلاصین عبادتدهكی رولو
یازار : میرزه عبدالصمد ملکی | بؤلوم : دین
+0 به یه ن
اخلاصین عبادتدهكی رولو
عزیز پیغمبریمیز (ص) و اماملاردان (ع) یئتیشن روایتلره اساساً عبادتلرین و عمللرین تكجه قبول اولماق وسیلهسی، اخلاصدیر. هر هانسی عبادتین آیری شرایطی اولا آما اخلاصلا توأم اولماسا قبول اولونماز.
اخلاص، عبادتلری فقط الله-ـا خاطر یئرینه گتیرمك آنلامیندادیر. قرآن كریم بیّنه سورهسینین دؤردونجو آیهسینده بویوردوغو كیمی: «فقط اللهی عبادت ائلهماغا و دینی اونا خالص ائتمك اوچون امر اولدولار». اللهین رسولو دا بویوروب: «قیرخ گون اخلاصلا عمل ائتمك نتیجهسینده حكمت چشمهلرینین اورگیندن دیلینه جاری اولمایان بنده یوخدور». و بیر آیری یئرده بویوروب: «خوش او بندهنین حالینا كی عبادت و بندهلیگینی فقط اللهـا خاطر یئرینه گتیرسین.
اخلاص بارهسینده اولان روایتلرین سایی چوخدور و اونلارین بوتونوندن مهم بیر نكته اله گلیر: عمللر و عبادتلرین قبول اولماسینین تكجه یولو اخلاصدیر. عبادتین آیری شرایطی اولسا آما خالصلیگی اولماسا قبول اولونماز.
ریاكارلیق اخلاصین ترسیدیر. اخلاص عبادتلرین قبول اولماسینا سبب اولدوغو كیمی ریاكارلیق دا عبادتلری باطل اولماسینا سبب اولار. ائله بونا گؤره اسلام عالملرینین هامیسی ریاكارلیغین عبادتلرین باطل اولماسینا سبب اولدوغونو دئییرلر. نماز قیلان، ریاكارلیق اوزوندن بیر كلمهنی مخصوص شكلده دئسه و یا ریاكارلیق اوچون مخصوص مكان و زماندا نماز قیلیرسا و یا ریاكارلیقدان اؤترو سجدهسینی و ركوعسونو اوزالدیرسا نمازی باطل اولار.
اوست-اوسته، ریاكارلیق گیزلی شركدیر. شركلی عمل عبادتله منافاتلیدیر. ریاكارلیق نه فقط نمازی بلكه هر عبادتی باطل ائلر.خمس، زكات، حج، جهاد و.... هئچ بیرینین ریاكارلیقلا آراسی یوخدور. عبدالله بن بكیر دئییر: «حج مسافرتینده امام صادقله (ع) بیرلیكله ایدیك. حضرت یولدا بیر داغ باشینا چیخیب جمعیّتین چوخلوغونا باخیب بویوردولار: «ضجّه چكیب آغلایانلار نه چوخدو و حقیقی حجّ یئرینه گتیرنلر نه آزدیر».
معاذ بن جبل پیغمبر اكرمدن (ص) نبأ سورهسینین 18-جی آیهسی بارهده مفصّل روایت ائدیب كی حضرت بویوروب: امّتیمدن اون صنف مختلف شكللرده محشور اولاجاقلار. بیر صنفی دونوز شكلینده، بونلار دنیادا حرام یئینلردیلر. آیری صنف میمون شكلینده؛ دنیادا سؤز آپاریب گتیرنلر. خلاصه هر عملین عكسالعملی وار.
زلزال سورهسینین 7-8-جی آیهلری بویورور: «هر كیم ذرّه آغیرلیغی قدر یاخشی ایش گؤرورسه اونو گؤرر و هر كیم ذرّه آغیرلیغی قدر پیس ایش گؤرورسه اونو گؤرر.
حدیث باغچاسیندان بیر عطرلی چیچك
یازار : میرزه عبدالصمد ملکی | بؤلوم : دین
+0 به یه ن
حدیث باغچاسیندان بیر عطرلی چیچك
حضرت محمد پیغمبر (ص) بویوروب:هر كیم علملری اؤیرنیب حفظ ائتمك ایستهییرسه، بو بئش خصوصیته صاحب اولمالیدیر:
*ایكی ركعت ده اولسا، آردیجیل گئجه نمازی قیلماق؛
*دایم دستَمازلی اولماق؛
*هم آشكاردا، هم ده گیزلینده (یعنی هم جماعتین گؤزو قارشیسیندا، هم ده تكلیكده) تقوایا رعایت ائتمك (الله-ین حرام بویوردوقلاریندان چكینمك)؛
*شهوتی آرتیرماق اوچون یوخ، طاقت الده ائتمك اوچون یئمك؛
*دیشلری مسواكلا تمیزلمك.
(سیّد نعمتالله حسینی. مردان-علم در میدان-عمل، 4، 35).
انسانین ارزشی بارهده بیر حدیث
یازار : میرزه عبدالصمد ملکی | بؤلوم : دین
+0 به یه ن
مرحوم كلینی 7-جی امامدان بیر روایت نقل ائلهییب و مرحوم محقق داماد اونو گؤزل شرح وئریب.
حدیث بئلهدیر كی حضرت بویوردولار: ««إنّ أبدانكم لیس لها ثمن إلاّ الجنّة، فلا تبیعوها بغیرها»[1] بدنلریزین جنّتدن ساوایی قیمتی یوخدور. اونلاری اوندان ساوایینا وئرمهیین.
مرحوم محقق داماد دئییر: بو روایت روحوزون بهشتدن یوخاری اولدوغونا اشاره ائلیر. روحو «جنّة اللّقاء»یه وئرمهلیسیز. روحوز ﴿عند ملیكٍ مقتدر﴾ه چاتمالیدیر. و عندالله اولماق اوچون اَن یاخشی یول اوروج توتماقدیر.[2]
اوروجون باطنی، لقاءالله صورتینده ظهور ائلر و انسان اوچون لقاءاللهدان یوخاری فرض یوخدور. چون انسان هئچ زمان آرادان گئتمهین ابدی موجوددور و نهایتاً بیر عالمدن آیری عالمه گئدر. اوروجون باطنی اونا نصیب اولسا دایم حضوردان رنجیده اولمادان همیشه حقّ محضرینده اولار. جنّتین تكرارلی لیغی یورماز. اوردا اصلاً یورولماق یوخدور. ایستر ظاهری جنّت ﴿جنّات تجری من تحتها الأنهار) اولسون، ایستر معنوی جنّت اولسون. انسان یورقونلوق، سوسوزلوق و آجلیق رنجینی چكمهدن توخلوق لذّتیندن سیراب اولاجاق. جنّتین وضعیّتی دنیا كیمی دئییل.
[1].كافی، ج 1، ص 19، ح 12.
[2]. «جعله (علیهالسلام) الجنّة ثمن البدن، إشارة إلی أنّ ثمن جوهر النفس المجرّدة هو الله سبحانه فكأنه (علیهالسلام) قال: أما إنّ أبدانكم ثمنها الجنّة فلا تبیعوهها وأمّا نفوسكم المجرّدة وأرواحكم القدسیّة فإنّما ثمنها هو الله سبحانه والفناء المطلق فیه وفى مشاهدة نور وجْهه الكریم فلا تبیعوها بغیره» (میردامادین اصول كافییه یازدیغی تعلیقه ، ص 38).
رمضان بایرامی SMS -لری
یازار : میرزه عبدالصمد ملکی | بؤلوم : دین
+0 به یه ن
رمضان بایرامی SMS -لری
رمضان بایرامی SMS-لری
♥ كایناتین یارادیجیسی و عالملرین ربّی بؤیوك الله-ـا سونسوز شكرلر اولسون! رمضان بایرامی بركتیله، بوللوغویلا گلسین، بوتون انسانلیق اوچون خیرلره وسیله اولسون.
♥ بیر داملا اومید سپیلسین اورگینه، بیر داملا سعادت دولسون گونلرینه ، مین بیر دعان قبول و بایرامین مبارك اولسون
♥ سئوگی سؤزه دولارسا دعا اولور، دعا الله-ـا چاتیرسا نور اولور، عینی یولدا بیرلشن دعالاریمیزین نورا دؤنوشوپ ربّیمیزه چاتماسی دیلگی ایله بایرامین مبارك اولسون
♥ اللهین رحمتی سنه شامل اولسون. سنه گلن هر یاخشیلیق اللهداندیر، بوتون پیسلیكلر نفسدندیر. مكانین جنّت، یووان سعادتلی، قلبین الله سئوگیسی ایله دولو، بایرامین مبارك اولسون.
♥ اورگینه داملا داملا اومید، گونلرینه مین دادلی سعادت دولسون. سئودیكلرین همیشه یانیندا اولسون، یوزون و گولون هیچ سولماسین. بایرامین مبارك اولسون...
♥ رمضان بایرامینیز مبارك، اورگینیز اومیدلی، اومیدلرینیز آتلی، سئودانیز قانادلی، سعادتینیز قاتلی، سوفرهنیز دادلی، مكانینیز تختلی، عمرونوز بختلی اولسون...
♥ كوسكونلرین باریشدیغی، سئونلرین بیر آرایا گلدیگی، رحمت و شفقت دولو گونلرین اَن دَیَرلیلریندن اولان رمضان بایرامینیز مبارك اولسون.
♥ بو دَیَرلی رمضان بایرامیندا، كایناتین یارادیجیسی و عالملرین ربّی باغیشلایان و مهربان بؤیوك الله بوتون دعالارینیزی قبول ائتسین.
♥ بایراملار بركتدیر، اومیددیر. دعالارین قبول اولسون ، سئودیكلرین همیشه سنینله اولسون بایرامینیز مبارك اولسون.
♥ بوتون اوركلر سئوینجله دولسون، اومیدلر گئرچك اولسون، آجیلار اونودولسون، دعالارینیز قبول و بایرامینیز مبارك اولسون.
♥ قلبلر واردیر سئوگینی یاشاتماق اوچون، انسانلار واردیر دوستلوغو پایلاشماق اوچون و بایراملار واردیر سئوگی ایله قوجاقلاشماق اوچون. بایرامینیز مبارك اولسون.
♥ بیر اووج دعا، بیر قوجاق سئوگی، حرارتلی بیر مئساژ، یوخ ائدیر مسافهلری بیرلشدیریر كؤنوللری قلبینیز نور، ائوینیز سعادت دولسون، بایرامینیز مبارك اولسون.
♥ زمانا و مكانا سیغمایان بیر بركتله بركتلنمك و باغیشلانمیش اولمانین او شرفلی مقامینا چاتماق تمنّی سی ایله بایرامینیز مبارك اولسون.
♥ اسلامین نورلو گونشی قلبینه دولسون، مقامین جنّت، حضرت محمّد (ص) قونشون اولسون، گونلرین سعادتلی، گؤنلون سعادتله دولسون. بایرامین مبارك اولسون.
نهجالبلاغهدن بیر درس
یازار : میرزه عبدالصمد ملکی | بؤلوم : دین
+0 به یه ن
نهجالبلاغهدن بیر درس
حضرت علینین (ع) گؤزو همیشه والیلرینین اوستونده اولوردو و قیسا حكومتینین بویوندا آداملارینی توبیخ ائلهمك مضمونوندا چوخلو نامهلر یازدی.نهج البلاغه كتابینی ورقلهینده بو مسألهیه تئز تئز راست گلمك اولار. حضرت علی (ع) «منخم بن سلیم»-ی زكات ییغماغا گؤندرنده اونا بئله یازمیشدی:
«تایسیز بیر الله-ین قورخوسو ایله یولا دوش، مسلمانلارین كناریندان خوشلاری گلمهین صورتده كئچمه. اونلارین ماللاریندان الله-ین حقّیندن آرتیق آلما. بیر طایفایا چاتاندا اونلارین ائولرینه گئتمهمیش سولارینا گئت. سونرا سكینه و آراملیقلا اونلارین آراسینا گئت و اورتالاریندا دور. اونلارا سلام وئر و سلام وئرمگی قیسا ائلهمه. سونرا دئنه: «ای الله-ین بندهلری ! الله-ین دوستو و خلیفهسی منی سیزه طرف گؤندریب كی املاكیزدان الله-ین پایینی آلام. سیزین املاكیزدا الله-ین پایی واردی كی اونون ولیسینه وئرهسیز؟» بیری یوخ دئسه (دئسه كی وئرمهلی زكاتیم یوخدور) اونا مراجعه ائتمه. آما بیری دئسه كی بلی وار. اونو قورخوتمادان و اونا چتین توتمادان اونونلا گئت و قیزیلدان گوموشدن هر نه وئرسه آل. اینك، قویون و دوهسیده اولسا اجازهسیز اونلارین یانینا گئتمه چونكی اونلارین چوخو اونوندور. حیوانلارین یانینا گئدنده صاحبلرینه مسلّط اولان كیمی و صاحبلرینه چتین توتان كیمی اونلارا باخما. هئچ حیوانی قورخودوب قووما. صاحبلرینی اونلارین توتماقدا اینجیتمه.
[زكاتی آلاندا] مالی ایكی یئره بؤل و صاحبیندن اونلارین بیرینی سئچمگه اختیار وئر. سئچدیگینه اعتراض ائلهمه. قالانلاریدا همانجور ایكی یئره بؤل و یئنه اوندان ایسته بیرینی سئچسین. [بو ایشی اوراجن ادامه وئر كی گئریده قالان] الله-ین حقّی مقداریندا اولسون. الله-ین حقّینی اوندان آل و اگر بؤلمگی بَیَنمهسه و فسخ ائلهمك ایستهسه، سن فسخ ائله و ایكی قسمتی بیر-بیرینه قات و تازادان تكرار ائله.