قره‌داغین طبیعی محیطی
یازار : میرزه عبدالصمد ملکی | بؤلوم : عمومی
+0 به یه ن
قره‌داغین طبیعی محیطی
قره‌داغین قوروقلانمیش منطقه‌سی‌نین 80 مین 427 هكتار مساحتی وار كی آراز چایی‌نین جنوبوندا و جلفا ایله مغان چؤلو، ساوالان، بوزقوش و سهند داغلاری آراسیندا یئر آلیر. بو منطقه بیوسفر مخزنی كیمی ثبته یئتیشیب و نباتی و حیوانی جهتدن چوخ یوخاری دَیَره صاحبدیر.
قره‌داغدا مینلر جور بیتكی و مارال، كؤپگر، قافلان، قونور آیی، كئچی، وحشی پیشیك و شكاری قوشلار: قارا خوروز، قرقاوول، توراج كیمی جور به جور نادر حیوانلار یاشاییر.
بو منطقه اؤزونه مخصوص خصوصیّتلرینه گؤره 1354-جو ایلینده یونسكو طرفیندن یئر كره‌سی‌نین حیاتی ذخیره‌سی كیمی تانیندی و دنیا سطحینده جانلی فسیله معروفدور.
قره‌داغ جنگل‌لرینده 450 دن 600 گرمه قدر یاغینتی اولار. بو مقدار گیزلی یاغیش آدلانان مئهلی هوایا گؤره 750 میلی متره چاتار. شكسیز ائله بو مسأله، بو منطقه‌نی بو قدر نباتی و حیوانی جهتدن غنی ائله‌ییب.
بو منطقه‌ده مین جوردن آرتیق بیتكی وار كی اونلارین یوزده 26-سی داوا كیمی، یوزده 20-سی بزك كیمی، یوزده 17-سی یئمك كیمی، یوزده 28-ی یئم كیمی، یوزده بئشی حفاظت اولونموش و یوزده بئشی صنعتی گیاه كیمی استفاده اولونور. اونلاردان پالید، آردیج، وَلَس، آغاج‌قایین، وحشی گیلاس، قارا چؤهره، گیرده‌كان، آرمود، نار، قاراگیله، زریش، و سماقاز آغاجلارینی آد آپارماق اولار.
قره‌داغین حیوان تنوّعی ده 320-دن آرتیقدیر. اونلارین 39 نوعی ممه‌لی‌لر، 220 نوعی قوشلار، 38 نوعی سوروننلر و دوزیستلر، و 22 نوعدا بالیقدیلار. قارا خوروز اؤلكه‌میزده فقط بو منطقه‌ده اولار و آیری حیوانلاردان قره‌داغ قرقاوولو، قافلان، كؤپگر، چؤل گئچیسی،چؤل پیشیگی، جنگل پیشیگی و جور به جور كؤچری قوشلاری آد آپارماق اولار.
قره‌داغ جنگل‌لرینده جور به جور طبیعی منظره‌لر او جمله‌دن سیلدیرم داشلار، جنگل‌لر، اوتلاقلار، چایلار و اكین یئرلری و جور به جور طبیعی محیطلر او جمله‌دن "آنزا"، "كلن"، "پیر دره‌سی"، " قارونلار"، "قلعه دره‌سی وینق"، "شاه اتران" و "وایقان" كیمی یئرلر یئرلشدیریب.
یاز فصلینده آلرژی عامل‌لری
یازار : میرزه عبدالصمد ملکی | بؤلوم : ساغلاملیق
+0 به یه ن
یاز فصلینده آلرژی عامل‌لری
جنینلیك زمانیندان بدنین دفاع سیستملریندن بیری اؤز و اؤزگه‌‌لیگی تشخیص وئریب بیگانه عامل‌لرله مبارزه ائله‌مكدیر.
قاندا اولان مدافعه سلول‌لاریندان علاوه دری‌نین تمامینی و بورون، نای، گؤز، قولاق كیمی بدن منفذلری‌نین اورتوسونو بوروین سلول‌لار واردیلار. بو سلول‌لارین وظیفه‌سی خارجی جرملره یئیین عكس العمل گؤرستمكدیر. بو جرملر بدنه داخل اولماق همان، سلول‌لار آسقیرماق، اؤسكورمك، بورون سویو آخماسی و دری‌نین ملتهب اولماسی كیمی عكس العمل‌لره سبب اولارلار.
ساییلان عكس العمل‌لر كاملاً طبیعی و عادی‌دیلر. مثال اوچون هوانین چیركلی اولدوغو زمان هواداكی ایری ذرّه‌لر، آسقیریب اؤسكورمگه سبب اولورلار كی بونا آلرژی دئییلمز. مشكل، بدنین مدافعه سلول‌لاری‌نین حددن آرتیق تحریك اولدوقلاری زمان یارانیر.
بئله اولاندا شخص آلرژی ناخوشلوغونا مبتلا اولور. چیركلی هوادا اولان كیمی اؤسكورمگه و تنگی نفس اولماغا باشلایان اوشاق كیمی. بئله‌نچی وضعیته، آلرژیك آسم دئییلیر. و یا یاز فصلینده هوادا اولان بیتكی ذرّه‌لرینه گؤره گؤزلری قیزاران و آسقیران بیر جوان قیز.
محیطی عامل‌لرین معرضینده اولان بدندن محافظت وظیفه‌لری اولان انداملار، آلرژیك ناخوشلوقلارا مبتلا اولا بیلرلر. دری، بورون، تنفس دستگاهی و هضم سیستمی، آلرژی‌یه مبتلا اولان انداملارداندیلار كی سپمه، آسم، رینیت و اسهال كیمی آلرژیك ناخوشلوقلارا مبتلا اولارلار.
آلرژیك رینیت، بورونون ملتهب اولماسینا دئییلیر. دال به دال اؤسكورمك، بورون سویو گلمك، گؤز و بورونون قاشینماسی، بورون دلیكلری‌نین توتولماسی، گؤزلرین قیزارماسی و سولانماسی و بوغازین قاشینماسی اونون علامتلریندن ساییلیر.
بو علامتلرین سویوق دَیمه‌یه چوخ اوخشارلیغی وار. سویوق دَیمه اوچ گون چكن ویروسلی بیر ناخوشلوقدور كی بدنین آغریسی و حرارتی اولار و اوچ گوندن سونرا آرادان گئدر. بیر حالدا كی آلرژیك رینیتین علامتلری آسقیرماق، گؤز و بورون سویو آخماسی اولور و داها اوزون زمان اولور.
بعضاً بیر ائو حیوانی‌نین توكو و یا یئلَگینه گؤره آلرژی توتوروق. بعضاً ائوده سوسری‌نین اولماسی آلرژی گتیریر و گاهدان‌دا یورقان دؤشكده اولان یون و یئلك آلرژی‌یه سبب اولور.
آلرژی‌نین تكجه درمانی آلرژی گتیرن زادلاردان اوزاق اولماقدیر. بو ایشی‌ده یاشادیغیمیز یئره مناسب فیلترلرین قوشولماسی و چیركلی یئره گئدنده ده ماسكدان استفاده ائله‌مكدیر.
سودا اوزن ماشین
یازار : میرزه عبدالصمد ملکی | بؤلوم : تكنولوژی
+0 به یه ن
سودا اوزن ماشین
ژاپن شركتی سودا اوزه بیلن یونگول برقی ماشین دوزلدیب.
سئل، طوفان، سونامی كیمی طبیعی بلالار زمانی معمولی ماشینلار ایشدن دوشور و انسانلارین جانین قورتارماغا فقط هلكوپتر و كیچیك قاییقدن استفاده ائله‌مك ممكن اولور.
ژاپنلی‌لار بو موقعیّتلرده استفاده اولونا بیلن 460 كیلو گرم آغیرلیغیندا ماشین دوزلدیبلر. اونلار بو محصولو بازارا وئرمك نیّتینده‌دیلر.
بین المللی گزارشلره گؤره دنیانین باشا باشیندا چوخ یئرلر یاغینتیلارین چوخالماسی ایله اوز- اوزه قالاجاقلار.
Concept One آدلانان بو ماشینین بؤیوك مقیاسدا بلالاردا نئجه ایشله‌مه‌سی هله بللی دئییل.
بو ماشینین دوزلتمه ایده‌سی ژاپندا باش وئرمیش 2011-جی ایلی‌نین سونامیسیندن سونرا Fommشركتین مدیری «هیدو تسوروماكی»نین ذهنینه گلدی.
Concept One ماشینی آیری برقی ماشینلار كیمی، باطریسی‌نین دولدورماسی اوچون شارژ مركزلرینه احتیاجی وار و اضطراری وقتلرده ده بئله یئرلرین خدمت وئرمه‌سی امكانسیز اولار.
شركت، بو ماشینین شارژدان سونرا نه قدر سویون اوزونده قالما گوجونون اولماسینی هله دئمه‌ییب.
مذهب اختلافی سالماق و افراط، ملّی بیرلیگی داغیدار
یازار : میرزه عبدالصمد ملکی | بؤلوم : خبرلر
+0 به یه ن
مذهب اختلافی سالماق و افراط، ملّی بیرلیگی داغیدار
حضرت آیت الله خامنه‌ای دولتلرین جماعتین دینی و مذهبی ایله رابطه قورماغی اونلارین موفقیت سببی بیلیب آرتیردیلار: بعضی افراطچی مذهبی جریانلارا اسلام مذهبلری آراسیندا اختلاف سالماغا امكان وئرمه‌مك لازمدیر.
معظم رهبرلیك مقامی‌نین سایتی‌نین وئردیگی خبره گؤره، اسلام انقلابین معظم رهبری حضرت آیت الله خامنه ای چهارشنبه گونو آذربایجانین رئیس جمهوری جناب الهام علی‌یئوله گؤروشده، ایكی اؤلكه‌نین قونشولوق و مذهبی، تاریخی و فرهنگی بیرلیكلرینی ایكی دولتین مناسبتلرینی تقویت ائله‌مگه تأثیرلی عامل ساییب و تأكید ائله‌دیلر: توافقلرین دالیسینی توتماق و سیاسی اراده ایله بدخواهلارا فائق گلمكله ایكی دولت و ملّتین رابطه‌لرینی گوندن گونه محكملندیرمك اولار.
حضرت آیت الله خامنه ای جماعتین مذهبی اعتقادلاری ایله رابطه قورماغی دولتلرین موفقیتینه سبب اولماسینا تضمین كیمی بیلیب آرتیردیلار: بعضی افراطچی مذهبی جریانلارا اسلام مذهبلری آراسیندا اختلاف سالماغا امكان وئرمه‌مك لازمدیر.
او، مشترك اقتصادی كمسیونون تشكیلی باره‌ده ایران و آذربایجان رئیس جمهورلاری آراسیندا اولان توافقلری مطلوب ایش بیلیب دئدی: ایكی طرفین ظرفیتلری و امكانلاری ایله مقایسه‌ده ایكی اؤلكه آراسینداكی ایندیكی رابطه‌لر چوخ آزدیر و بو سفرین اقتصادی و بؤلگه‌سل رابطه‌لرین چوخالماسینا مقدمه اولماسینا اومیدیمیز وار.
حضرت زهرانین (س) سیره‌سینده عبادت و عبودیّت
یازار : میرزه عبدالصمد ملکی | بؤلوم : دین
+0 به یه ن
حضرت زهرانین (س) سیره‌سینده عبادت و عبودیّت
پیغمبر (ص) حضرت زهرانین (س) عبودیّت مقامی باره‌ده بویوربلار: «فاطمه عبادت محرابیندا دایاناندا اونون ایشیغی گؤیده‌كی ملكلره ساچار، گؤیده‌كی اولدوزلارین یئر اهلینه ساچدیغی كیمی. ( «فاطمه الزهرا من المهد الی اللحد، ص 277، بحارالانواردان»)هر مسلمان انسانین وظیفه‌لریدن بیری الله ایله رابطه قورماقدیر و اسلامدا بو ایشه عبادت دئییلیر. انسانین یارانما فلسفه‌سی‌ده عبادت و الله ایله هر طرفلی رابطه باغلاماقدیر. الله تعالا قرآنین كریمین الذاریات سوره‌سی‌نین 56-جی آیه‌سینده بو باره بویورور: «وَمَا خَلَقْتُ الْجِنَّ وَالْإِنسَ إِلَّا لِیَعْبُدُونِ، جن و انسی فقط منی عبادت ائله‌مكدن اؤترو یاراتدیم».
اسلامدا عبادتین مختلف اقسامی وار كی نماز كیمی بدن عبادتی، خمس كیمی مالی عبادت و حج و جهاد كیمی مال و بدن عبادتینه شامل اولور.
عبادتین خاص معناسی خالص و ایلاهی نیّت ایله اولان عمل‌لردیر. آما عبادتین عام معناسی، ظاهری عبادی اولمایان عمل‌لردیلر كی اونلاردا انسانی الله‌ـا یاخینلاتماق گوجو وار و عبادی عمل‌لره تبدیل اولا بیلرلر. تجارت، مطالعه و ایشله‌مك كیمی عمل‌لر كیمی گونده‌لیك گؤردویوموز ایشلر. آیری سؤزله عبادتی ایكی یئره بؤلمك اولار: واجب اولان عبادتلر، مستحب اولان عبادتلر.
حضرت فاطمه زهرانین (س) عابده، راكعه، ساجده، صوامه و قوامه كیمی مبارك لقبلری وار. او حضرت نه اینكی اؤزو عبادت اهلی ایدی بلكه عابدلرین الگوسی ساییلیر. بونا گؤره او حضرتین عبادی سیره‌سینی آراشدیرماق و عبادت قسملرینی او حضرتین عبادتلری ایله تطبیق ائله‌مك لازم ایشلردن ساییلیر.
حضرت زهرانین (س) ائوینده عبادت اوچون بیر محراب واریدی كی بو ایش اسلامی روایتلرده اونا تأكید اولموش دَیرلی و مستحب بیر عمل ساییلیر.
او حضرتین یاشاییشیندا وقت شناسلیق مخصوصاً عبادت باره‌سینده وقت شناسلیق چوخ جدّی صورتده رعایت اولونوردو. بو زمینه‌ده او حضرتین سحر تئزدن آییلماسی، جمعه‌نین آخشام ساعتلریندن عبادت اوچون استفاده ائتمه‌سی، گون باتان زمانلاردا عبادت و مناجات ائله‌مگی دقتّه لایق مقاملاردان ساییلیر.
او حضرتین عبادتلری همیشه حضور و معنویّت ایله دولو اولوردو. بو كیفیّتین كناریندا او حضرتین عبادتلری كمیّت باخیمیندان‌دا چوخ اولاردی. قرآن كریمین مزمل سوره‌سی‌نین 20- جی آیه‌سینده بئله گلیب: « إِنَّ رَبَّكَ یَعْلَمُ أَنَّكَ تَقُومُ أَدْنَى مِن ثُلُثَیِ اللَّیْلِ وَنِصْفَهُ وَثُلُثَهُ وَطَائِفَةٌ مِّنَ الَّذِینَ مَعَكَ وَاللَّهُ یُقَدِّرُ اللَّیْلَ وَالنَّهَارَ عَلِمَ أَن لَّن تُحْصُوهُ فَتَابَ عَلَیْكُمْ فَاقْرَؤُوا مَا تَیَسَّرَ مِنَ الْقُرْآنِ عَلِمَ أَن سَیَكُونُ مِنكُم مَّرْضَى وَآخَرُونَ یَضْرِبُونَ فِی الْأَرْضِ یَبْتَغُونَ مِن فَضْلِ اللَّهِ وَآخَرُونَ یُقَاتِلُونَ فِی سَبِیلِ اللَّهِ فَاقْرَؤُوا مَا تَیَسَّرَ مِنْهُ وَأَقِیمُوا الصَّلَاةَ وَآتُوا الزَّكَاةَ وَأَقْرِضُوا اللَّهَ قَرْضًا حَسَنًا وَمَا تُقَدِّمُوا لِأَنفُسِكُم مِّنْ خَیْرٍ تَجِدُوهُ عِندَ اللَّهِ هُوَ خَیْرًا وَأَعْظَمَ أَجْرًا وَاسْتَغْفِرُوا اللَّهَ إِنَّ اللَّهَ غَفُورٌ رَّحِیمٌ، حقیقتاً الله تعالی بیلیر كی سن و سن ایله اولانلار گئجه‌نین اوچدن بیرینه یاخین و یا یاریسینی و یا اوچدن بیرینی [نمازا] قالخیرلار. و گئجه- گوندوزو اؤلچن فقط الله‌دیر. [او] بیلیر كی [سیز] اونون حسابینی ابداً ساخلایا بیلمزسیز. اونا گؤره سیزی باغیشلار. [ایندی] امكانیزدا اولان قدر قرآندان اوخویون. [الله] تئزلیكله آرازدا ناخوشلارین اولدغونو بیلیر و آیری [بیر تعداد دا] یئر اوزونده سفر ائدیب الله روزیسی‌نین دالیسینجادیلار. و [بیر عدّه‌ده] الله یولوندا جهاد ائلیرلر. پس هر نه امكانیزدا اولورسا [قرآندان] اوخویون و نماز قیلیب زكات وئرین و الله‌ـا حسنه بورج وئرین و بوتون یاخشی ایشلری، اؤزوز اوچون قاباقجادان یوللایین. اونو الله یانیندا و داها آرتیق اجرله تاپاجاقسیز. و الله‌دان باغیشلانماق ایسته‌یین كی الله مهربان باغیشلایاندیر».