کربلانین زائرلر طرفیندن آز زیارت اولان مکانلاری

+0 به یه ن

کربلانین زائرلر طرفیندن آز زیارت اولان مکانلاری

عتبات سفرینه گئدنلرین چوخو فقط امام حسین (ع) و حضرت ابوالفضلین (ع) مبارک مزارلارینی زیارت ائلیرلر بیر حالداکی بو کرامتلی انسانلارین کناریندا آیری مکانلار دا واردی. بو یازیدا اونلارین نئچه‌سینی گتیریریک:

حرمین رواقلاری

1ـ شهیدلرین مقبره‌سی

ضریحین جنوب غرب ضلعینده، کربلا شهیدلری‌نین قویلانان یئری‌نین علامتی اولان پولاد پنجره وار. بو پنجره‌نین اوستونه، شهیدلرین آدی یازیلمیش قارا رنگده تابلو وورولوب.

2ـ مریم نخلی

ضریحین تقریباً ایکی مترلیگینده یوخاری طرفین جنوب دیواریندا، مریم نخلی آدیندا محراب وار. بو محراب، حضرت عیسی‌نین ولادتینده حضرت مریمین مستقر اولدوغو نخلین یئریندن علامتدیر. قرآن کریمین مریم سوره‌سی‌نین 22-25 آیه‌لرینده اشاره ائله‌دیگی اوزاق یئر: «پس [مریم عیسی‌یه] حامله اولدو و اوزاق بیر یئره پناه آپاردی. دوغوم آغریسی اونو بیر خرما آغاجی‌نین تنه‌سینه طرف چکدی. دئدی: «کاش بوندان اوّل اؤلموش اولایدیم و بیر دفعه‌لیک یاددان چیخمیش اولایدیم. [آیاغی‌نین] آلیتیندا [بیر ملک] اونا سسلندی کی غم یئمه؛ سنین الله‌ین [سنین آیاغی‌نین] آلتیندا سو چشمه‌سی یارادیب. خرما آغاجینی اؤزونه طرف چک کی سنین اوچون تازا خرما تؤکولسون.

بعضی روایتلرین اشاره‌ ائله‌دیگی کیمی مریم شامدان چیخاراق کربلایه گلیب امام حسینین (ع) شهادت یئرینده عیسی‌نی دنیایا گتیریب. مریم نخلی محرابی، سلطان اویس جلائری‌نین امری ایله دوزَلیب و 1366 هجری قمری ایلینده طاهر قیسی‌نین الی ایله آرادان گئدیب.

حرمین اطرافی

امام حسین (ع) صحینی‌نین اطرافینا خیابان چکیلنده چوخلو تاریخی بنالار آرادان گئتدی کی او جمله‌دن صغیر صحن، حسن‌خان مدرسه و مسجدی، زینبیه مدرسه‌سی، صدر مدرسه‌سی و جامع ناصری‌یه اشاره ائله‌ماق ولار.

مسجد الرأس مدرسه‌سی

باب السدره‌دن خارج اولاندا، ساغ الده مسجد الرأس واریمیش. مسجدین وسطینده کیچیک حوض واریمیش کی دئییلنلره گؤره، عاشورا گونو امام حسینین (ع) مبارک باشینی کسندن سونرا بورا قویموشدولار. یئنه دئییلنلره گؤره، مطهر باشی بدنه الحاق ائله‌ین زمان بیر گئجه بوردا ساخلایاندان سونرا بدنه ملحق ائله‌میشدیلر.

حر بن یزید ریاحی‌نین مزاری

جناب حرّین پیکرینی قبیله‌سی، کربلانین بئش کیلومتر غربینده‌کی کندده قویلاییبلار. اورا ایندی حرّ منطقه‌سینه معروفدور. ایندیلیکده بو منطقه کربلا شهری محدودسینده‌دیر.

بو شهیدین مزاری، 370 هجری قمری ایلینده، عضدالدوله دیلمی زمانی دوزلدی. 914 هجری قمری ایلینده شاه اسماعیل صفوی بنانی تازالادی. ایندیلیکده تازا بنا دوزلتمک اوچون مزار تخریب اولوب.

امام حسین (ع) حرمی‌نین کتابخاناسی

بو یئر «مکتبة و دار مخطوطات الروضة الحسینیة المقدسة» آدینا معروفدور. بو کتابخانین قفسه‌لری و وسعتلی مطالعه سالونی هامی‌نین اوزونه آچیقدیر.

ملا محمد فضولی‌نین مقبره‌سی

ملامحمدبن سلیمان فضولی، بؤیوک شیعه عالمی و شاعریدیر. کربلا شهرینده آذربایجانلی خانواده‌ده دنیایا گلیب. او اونونجو عصرین اَن بؤیوک شاعری کیمی تانینیر. فضولی‌نین مزاری باب القبله‌نین ساغ الینده و خیابان قیراغیندادیر. فضولی‌نین اوچ عربی، تورکی، و فارسی دیلینده دیوانیندان علاوه امام حسینین (ع) مقتلی باره‌ده تورک دیلینده «حدیقة السعدا» آدیندا کتابی وار.

حسیّاتی تشخیص وئرن عینک

+0 به یه ن

حسیّاتی تشخیص وئرن عینک

آلمانین فرانهوفر تحقیقات انستیتوسو، حسیّاتی تشخیص وئره بیلن بیر عینک دوزلدیب. بو عینکده میکرو کیچیک بیر دوربین تعبیه اولوب کی مقابل طرفین چهره‌سینده‌کی حالتلری تشخیص وئریب اونون نه حالدا اولدوغونو خبر وئریر.

اوندان علاوه بو سیستم مقابل طرفین یاشی و جنسیتینی‌ده تشخیص وئره بیلیر.

بو تکنولوژی، مقابل طرفین حسیّاتینی تشخیص وئره بیلمه‌ین اوتیسم کیمی ناخوشلوقلاری اولان شخصلره فایدالی اولاجاق.

بو عینکله گؤرونن صحنه‌لر ذخیره اولور و سونرادان اونلارا باخماق اولار.

اوشاغین اوستونه قیشقیرمایین

+0 به یه ن

اوشاغین اوستونه قیشقیرمایین

اوشاغین اوستونه قیشقیرماق سیزدن «اؤزوندن چیخمیش بیر حیرصلی» تصویری یارادیر.

جسارتلی اوشاقلار اؤزلرینی بؤیوکلرله بیر گوجده و یا حتی اونلاردان داها گوجلو بیلرلر. سیزین غیر مناسب رفتاریز، اونلارین بو فکرینی داها دا آلوولاندیرار. یادیزدا اولسون اوشاقلار آتا آنالارنی کنترلدان چیخمیش گؤرنده گوونسیزلیک حسّ ائلرلر.

مطالعه‌لر اوشاقلارین تربیتینده قیشقیرماقدان استفاده ائله‌ین والدینلرین، بو عمل ایله اونلارا روحی صدمه ووردوقلارینی گؤستریر.

سیز، اوشاغین اوستونه قیشقیراندا اونو دا منفی عکس العمل گؤرستمگه سوق وئریرسیز. اونون بو عملی مقابلینده سیز داها دا آرتیق قیشقیریرسیز و بو دعوا بؤیویونجن دالیسی گلیر و مشکل‌ده حل اولمور. آما بو مسأله‌نین حلّی وار:

اطلاعاتیزی چوخالدین: بیرینجی آددیمدا سیزین قیشقیرماغیزا سبب اولان مسأله‌نی تاپین. اویناتمالی‌لارینی ائوه داغیدیب؟ نه‌منه سیزی غضبلندیریب؟ اونو تاپیب و وضعیتی آراملاتماق اوچون الیزدن گلن یولو آختارین.

اؤزوزه بیر داها قیشقیرماماغا سؤز وئرین: بو ایده ساده و فایداسیز نظره گله بیلر، آما هر رفتار دَییشیمینی، اؤزوزده مثبت خصوصیتلری تقویت ائله‌مکده اولدوغونو بیلین.

آرام دانیشین: بعض اتفاقلار دؤزولمز اولسا دا، آرام دانیشماغا چالیشین. اوشاقلارین‌دا ایشلریندن ال چکیب سیزه دقت ایله قولاق آسماقدان ساوای چاره‌لری یوخدور. بئله‌لیکله سیز آرام قالیرسیز و اوشاقلار و هامی بیر-بیرلری‌نین سؤزلرینه نئجه قولاق آسماغی اؤیرنیرلر.

انتظارلاریزی مدیریت ائله‌یین: قیشقیرماماغیزی ایسته‌سز، یولونو دا هامارلامالیسیز. عاغیللی حرکت ائله‌سز  چتین ایش گؤرمک لازم گلمیه‌جک. اویناتمالیلارین داغیناقلیغینا گؤره اونا غضبلنیرسیزسه، اوینایا بیلدیگی اویناتمالیلارین ساییسینی آزالدین. نتیجه‌ده هم قیشقیرمازسیز و هم زحمتیز آزالار.

هر شئیی اورگیزه آلمایین: اوشاقلاریزین ایشلری باره‌ده اوتوروب دوشونورسز، اونلارین بعضاً سیزی غضبلندیرمه‌لری‌نین، قصد و غرضسیز اولدوغونو آنلایاجاقسیز.

مقایسه ائله‌مه‌یین و شاکر اولون: اؤزوزو آیری والدینلر و یا اوشاقلاریزی آیری اوشاقلارلا مقایسه ائله‌مک سیزی، خوشا گلمزلیکلره چاتان اوتوبانا سالار. یاشاییشا شاکرانه باخارساز داها آرتیق پوتانسیل‌لرین اولدوغونو گؤره‌جکسیز. اوشاقلاری سیزین اوشاقلار کیمی سالم اولمایان و قیشقیرمادان و اعتراض ائتمه‌دن یئرلرینی سیزینله دَییشمک آرزیسیندا اولان آتا آنالارا دوشونون.

منبع: psychologytodayhear

+

قاجار دؤرونده آمار

+0 به یه ن

قاجار دؤرونده آمار

اؤلکه‌میزده بیرینجی آماری 1275 هجری قمری ایلینده مرحوم ناصرالدین شاه زمانی و میرزا آقاخان نوری‌نین صدر اعظملیق دؤره‌سینده اولدو. او آماردا، تهران شهری‌نین ائولری و بنالاری ساییلمیشدی.

دئیه‌سن همان ایل، وزارت طرفیندن جمعیتین سایی و اقتصادی دورومو باره‌ده آمار توتماق و جمعیت ساییسی، مسکن و جماعیتن گلیر میزانی‌نین بللی اولماسی اوچون، ایالتلرین حاکملرینه ده دستورالعمل وئریلمیشدی، آما فنی مشکل‌لره گؤره بو دستور اجرا اولونمادی. نهایتده میرزه عبدالغفار نجم‌الدوله‌نین واسطه‌سی ایله، تهرانین جمعیتینی تازا مئتودلارلا، تهران شهرینی بئش یئره بؤلمکله، 55 گون عرضینده ساییلدی و «دارالخلافه‌نین نفوس تشخیصی» آدیندا رساله‌ده یاییلدی. بو آمار توتمادا، تهران شهری بئش محله‌یه بؤلوندو: ارگ، عودلاجان، چال‌میدان، سنگلج و بازار. شهرین ائشیگینده‌کی محله‌لره ده بیر طبقه‌ده یئر وئریلمیشدی. بو آمارا اساساً تهران جمعیتی 1286 هجری قمری ایلینده 155736 نفردن آرتیق ایدی. بو سایی‌نین 147256 نفر غیر نظامی و 8480 نفر نظامی ایدیلر. بو آمارا اساساً، شهر جمعیتی‌نین یوزده 27-سی اون بئش یاشدان کئچیک ایدی.

تهران جمعیتی‌نین ایکینجی ساییلماسی، 1301 هجری قمری ایلینده اولدو. بو ساییلمادا دا تهران شهری همان بئش یئره بؤلونموشدو. مرحوم مظفرالدین شاهین دؤردونجو سلطنت ایلینده یعنی 1317-ده ده تهران بنالاری‌نین آماری توتولدو. بو آمار درویش حسن اخضر علیشاهین واسطه‌سی ایله حیاتا کئچیریلدی.

1336 هجری قمری ایلینده، دوغوم، اؤلوم، ائولنمه و بوشانمالارین ثبتی اوچون، ثبت احوال اداره‌سی تأسیس اولدو.

اشتهانی آزالدان مادّه

+0 به یه ن

اشتهانی آزالدان مادّه

لندنین امپریال کالج و انگلیسین گلاسکو دانشگاهی‌نین محققلری، اشتهانی یوزده اون دؤرد آزالدان بیر مادّه دوزلدیبلر. IPE آدلانان بو مادّه، انسان بدنینده پروپیونات یونونو تحریک ائلیر. بو یونون وظیفه‌سی باغیرساقدا‌کی فیبری سیندیریب دویما حسّینی یاراتماقدیر.

ایلکین آنالیزلرده، غذالاریندا بو مادّه‌نی اضافه‌لندیرنلر آریقلاییبلار.

دادی چوخ پیس اولان بو مادّه‌نی یئمک اوچون حتماً اونو چؤرک یا میوه ایله قاتماق لازمدیر.

بو مادّه‌نین اساس مشکلی، اونون بؤیوک باغیرساغا چاتماسی ایدی. چونکی اورا چاتمامیش کیچیک باغیرساقدا جذب اولوردو.

اشتهانی کنترل ائله‌ین هورمونلار بؤیوک باغیرساقدا اولورلار و بو مادّه جذبدن اوّل، بؤیوک باغیرساغا چاتمالیدیر.

محققلر، بو مشکلون حلّی اوچون گیاهلاردا اولان اینولین آدیندا طبیعی بیر کربوهیدراتدان استفاده ائله‌دیلر. IPE اینولین ایله قاریشیر و جذب اولمادان بؤیوک باغیرساغا داخل اولور.

بو محصول استفاده استفاده اولوندوغو آن، انسانین اشتهاسی یوزده اون دؤرد آزالیر.

بو محصولدا هئچ جانبی عارضه گؤرونمه‌ییب آما داوخانالاردا ساتیلماسی اوچون داها آرتیق آنالیزلره احتیاج وار.



  • [ 1 ][ 2 ][ 3 ]