امام حسنین (ع) خائن کؤمکلری
یازار : میرزه عبدالصمد ملکی | بؤلوم : دین
+0 به یه ن
امام حسنین (ع) خائن کؤمکلری
شیعهلرین ایکینجی امامی، امام حسن بن علی (ع)، حضرت علینین (ع) شهادتیندن سونرا هجرتین قیرخینجی ایلینده خلافته چاتدی. او حضرتین قیسا مدتلی خلافت دؤرهسی، آتاسینین خلافت دؤرهسی کیمی چوخلو چتینلیکلرله بیر اولدو.1
امام حسنین (ع) خلافت زمانی، جاسوسلارین و منافقلرین بول اولدوغو زمان ایدی.
بئلهنچی شرایطه باخمایاراق امام حسن (ع) معاویه ایله جنگه تصمیم تودو و بو مسألهنی کوفه مسجدینده جماعته اعلام ائلهدی. آما کوفه اهلی جنگه گئتمکده سوستلوق ائلهدیلر و فقط عدی بن حاتم آدلی بیر قوجا آیاغا قالخیب کوفهلیلر دانلاییب امام حسندن (ع) اطاعت اولاراق نخیلهیه یولا دوشدو و بیر عده ده اونون دالیسیجان گئتدیلر.2
امام، جماعتی معاویه علیهینه جنگه چاغیراندان سونرا، کوفهده و بصرهده معاویهنین جاسوسلارینین اولدوغونو بیلدی و ایکیسینی تاپاندان سونرا معاویهیه بئله یازدی: «دئیهسن جنگ آختاریسان، گؤزله کی تئزلیکده اونو گؤررسن . . .» 3
آما معاویه ظاهرده قوشون ییغیب کوفهیه حرکت ائتسهده، آیری برنامهسی واریدی. اونون قصدی امام حسنی (ع) ترور ائلهمگیدی. بو منظورا عمرو بن حریث و اشعث بن قیس و حجر بن الحارث و شبث ربعىنی هر بیرینی تک تک بو ایشه مأمور ائلهدی.
تروریستلرین بیری امامی، نماز اوستو اوخ ایله هدف توتدو، آما امامین پالتارینین آلتیندا کی زره، اوخا مانع اولدو. 4
معاویهنین آیری برنامهلریده واریدی. او پول و وعدهلرله امامین قوشونونا نفوذ ائلهمک ایستهییردی.
امامین کؤمکلری، معاویهنین غالب اولماسیندا یوخاری نقشلری واریدی. اونلارین لاپ تأثیرلیسی عبیدالله بن عباس ایدی کی امام اونا اینانیب قوشون باشچیلیغینی اونا تاپیشیرمیشدی.
عبیدالله بن عباس معاویهنین وعدهلری قاباغیندا دایانماییب گئجه ایله 8 مین نفر قوشونلا بیرلیکده معاویه اوردوسونا قوشولدو. 5 بو بیر حالدا ایدی کی حضرت علی (ع) زمانی معاویهنین آدامی مکهده اونون ایکی بالاجا اوشاغینین باشینی کسمیشدی.6
سحر واختی نمازا قالخاندا، امام (ع) عبیدالله بن عباسین یوخلوغونو گؤرنده اونون یئرینه قیس بن سعد بن عباده انصارینی باشچیلیغا سئچدی. معاویه اونو دا یولدان چیخارتماغا چالیشسا دا بو ایشی باجارمادی. آما قوشون ایچینده شایعهلر سالماقلا اونلاری چاشباش قویدو.7
عبیدالله ابن عباس و آیری باشچیلارین اوز چئویرمهسی قوشونون وضعیتینی پریشان ائلهمیشدی. امام مدایندن قوشون ییغماغا گئتسه ده بو ایشه موفق اولمادی کی هئچ بلکه قوشونون بیر عدهسی عصیان ائدیب او حضرتین خیمهسینه یوگوردولر و حتی او حضرتین سجادهسینیده یاغمالادیلار. عبدالرحمن ازدى او حضرتین رداسینی چیگنیندن چکیب آلدی. حضرت رداسیز، آتا مینیب ساباطا طرف یوللاندی.
ساباطین مظلم آدلی قارانلیق یئرینه یئتیشنده، جراح بن سنان آدیندا بیر خائن امامین آتینین جیلوونو توتوب دئدی: «حسن، سنده آتان کیمی کافر اولدون.» و زهرلی خنجرینی امامین بودونا ووردو. خنجر سوموگه قدر کسدی.8
نهایتده شرایط امام حسنی (ع) صلحه مجبور ائلهدی. امام حسن (ع) چوخ مقاومت ائلهدی آما کؤمکلرینین داغیلماسی نتیجهسینده صلحه بویون وئردی.9
امام حسن (ع) معاویه ایله صلح ائلیهندن سونرا کوفه حکومتینی بوشلاییب مدینهیه گئتدی. اونونلا بئله معاویه او حضرتدن ال چکمهدی و نهایتده، خانیملارینین بیرینی توولاییب حضرته زهر ایچدیردی و او حضرت صفرین 28-ده شهادته چاتدی.10
قایناقلار:
[1] - محمد بن نعمان شیخ مفید، الارشاد فى معرفه حجج الله على العباد، سیدهاشم رسولى محلاتى، تهران، علمیه اسلامى، ج2، ص 5
[2] -ابى الفرج اصفهانى، مقاتل الطالبیین، کاظم المظفر،قم، دارالکتاب، ایکینجی چاپ، ص 39
[3] - شیخ مفید، همان
[4] - مجلس، محمد باقر؛ بحارالانوار بیروت ، الوفا، ایکینجی چاپ 1403 ،ج44 ،ص33
[5] - همان ،ص51 و یعقوبى، احمدبن ابى یعقوب؛ تاریخ یعقوبى، محمد ابراهیم آیتى، تهران، علمى فرهنگى نشریاتی، سکیزینجی چاپ ، 1378، ج2، ص141
[6] - یعقوبى، همان، ج2، ص107
[7] - ابوالفداء اسماعیل بن عمره بن کثیردمشقى، البدایه والنهایه، بیروت، دارالفکر، 1407، ج8، ص15
[8] - شیخ مفید، همان، ص8 و ابوجعفر محمد بن جریر طبرى، تاریخ الامم و الملوک، محمد ابوالفضل ابراهیم، بیروت، دارالثراث1378، ج5 ص195
[9] - طبرى ، همان
[10] -شیخ مفید، همان، ص12
اؤلکه ائولنمهلرین بئشده بیری بوشانماقلا باشا چاتیر
یازار : میرزه عبدالصمد ملکی | بؤلوم : اجتماعی
+0 به یه ن
اؤلکه ائولنمهلرین بئشده بیری بوشانماقلا باشا چاتیر
جوانلار و ورزش وزارتینین معاونی دئدی: ایندیلیقدا 10 میلیون نفر ائولنمک یاشیندا اولان جوانیمیز وار کی سوبای یاشاماغی ترجیح وئریرلر.
او سؤزلرینین آیری بؤلومونده دئدی: اؤلکهده ائولنمکلرین بئشده بیری، قم شهرینده دؤردده بیری و تهراندا اوچده بیری بوشانماغا چاتیر. ائله کی بوشانانلارین یوزده هشتادی 30 یاشدان کیچیکدیلر.
او آرتیردی: زوجلارین بوشانما آمارینا باخاندا، جوانلارین ائولنمهسینین اساس مسألهسی یاشاییشین ایلک بئش ایلینین ثباتسیز اولماسیدیر کی بونون حلی اوچون فرهنگی و آموزشی برنامهلر قویمالیییق.
میرزه حسن رشدیه
یازار : میرزه عبدالصمد ملکی | بؤلوم : اجتماعی
+0 به یه ن
میرزه حسن رشدیه
رشدیهیه معروف اولان میرزه حسن تبریزی، 1230 هجری شمسی ایلین تیر آیینین 14-ده تبریزده آنادان اولدو. مقدماتی تحصیل آلاندان سونرا بیروتا گئدیب دارلمعلمینده تحصیل و تدریسین تازا مئتودلارینی اؤیرشمگه باشلادی. او، الفبا، هندسه، حساب، تاریخ و جغرافی زمینهسینده تازا تدریس سبکلرینی اؤیرشدی.
میرزه حسن تبریزی، بیروتدا ایکی ایل اوخویاندان سونرا استانبولا گئدیب نئچه مدرسهدن گؤروش ائلهییب تدریس مئتودلاری ایله تانیش اولدو. اوردا، عرب الفباسی تدریسینین چتینلیکلرینی آرادان آپاریب و سسلی الفبانین اختراعسینا موفق اولدو.
بیر مدّت سونرا ایرواندا یاشایان هموطنلرینین دعوتی ایله اورا گئدیب، 1262-جی ایلینده تازا مودل مدرسه آچیب «وطن دیلی» آدلی تورک دیلینده کتابینی چاپ ائتمکله، چوخ آز بیر زماندا اوشاقلارا یازیب اوخوماغی اؤیرتدی. بو کتابدا مختلف مفهوملاری اوشاقلارا اؤیرتمک اوچون گئنیش صورتده آتا سؤزلری و حکمتلی سؤزلردن استفاده اولونوردو و معلملر تازا مفهوملاری اونلارین کؤمگی ایله اوشاقلارا اؤیردیردیلر. «وطن دیلی» کتابی چوخ ساده و سلیس یازیلمیشدی و قیسا و آنلاشیلان جملهلری واریدی و ائله بو مسأله اوشاقلاردا درسه و اوخوماغا علاقه و ذوق یارادیردی.
رحمتلیک ناصرالدین شاه اروپادان قاییداندا رشدیهنین ایروانداکی مدرسهلرینی گؤروب میرزه حسن رشدیهدن وطنه قاییتماسینی و بو ایشلری وطنده ده گؤرمهسینی ایستهدی. میرزه حسن رشدیه، 1266 دان 1267 ایللرینده تبریزین ششگلان محلهسینین مصباح الملک مسجدینده شهریهسی آیدا بئش قیراندان بیر تومنه قدر اولان ابتدایی مدرسهسینی آچدی. بو مدرسهنین شرطلریندن یازیلان اوشاقلارین 7-10 یاشیندا اولماق، سرایت ائلهین خسته لیکلرین اولماماسی و سو چیچگی واکسنینین وورولماسی ایدی.
آما قولاغی توکلولر و اؤلکه ترقّیسینین مخالفلری، بو مسألهینی گؤزلری گؤتورمهدی و اونون علیهینه شانتاژلارا باشلاییب ضدّینه ایشلر گؤردولر و نهایتده اونو تکفیر ائلهییب مدرسهیه اود ووردولار.
بو حادثهدن سونرا میرزه حسن اؤلکهدن خارج اولدو. آما رحمتلیک امین الدوله آذربایجان والیسی سئچیلندن سونرا اونون دعوتی ایله تبریزه قاییدیب تازا مدرسه آچدی. امین الدولهنین مستقیم حمایتی ایله مخالفلر بو سفر رشدیهنی دایاندیرا بیلمهدیلر. آذربایجان والیسی، امین الدوله میرزه حسنه دئمیشدی: « اؤز وطنیمه خدمت ائلهمک ایستهسم، سیزین فکریزی توسعه وئرمک بیرینجی ایشیم اولار».
رحمتلیک میرزه علی خان امین الدوله صدر اعظم اولان زمان، میرزه حسن رشدیه اونون حمایتی ایله تهرانا گئدیب رشدیه مدرسهلری آدیندا مدرسهلر آچدی. آما امین الدولهنین کنارا گئتمهسی و امین السلطانین قدرته گلمهسی ایله مدرسهلر یئنه باغلاندی و میرزه حسن رشدیه قم شهرینه گئدیب عمرونون آخرینه قدر اوردا قالدی.
رحمتلیک میرزه حسن رشدیهدن «وطن دیلی»، «هدایت التعلیم فی اصول تدریس بدایه التعلیم»، نهایه التعلیم»، «شفاهی تاریخ»، «ابتدایی شرعیات»، «تربیت البنات»، «تحفه الصبیان» و «یوز درس» آدلی کیمی کتابلار یادگار قالیب.
بو بؤیوک معلم فرهنگی ایشلر کناریندا، سیاسی فعالیتلرده ده الی واریدی و آزادیخواه شخصیتلریندن بیری ساییلیر. او «تنویر افکار» انجمنینین بناسی قویدو و گیزلی «غیرت» انجمنینده عضو اولدو. او تهراندا «مکتب» و «طهران» روزنامهلرینی منتشر ائلهدی.
میرزه حسن رشدیه اؤلکهنین فرهنگی و سواد ترقّیسینه هئچ ایشدن اسیرگهمهدی و بو زمینه دانیلماز و بؤیوک تأثیرلر بوراخدی.
بو چالیشقان معلم بوتون زندگانلیغینی وطنین اوشاقلارینا وقف ائلهدی و نهایتده 1323 هجری شمسی ایلینده آذر آیینین 29-دا دنیایا گؤز یومدو. او وصیتنامهسینده بئله یازیب: «منی ائله یئرده تورپاغا تاپیشیرین کی مدرسه اوشاقلاری هر گون مزاریم اوستوندن رد اولسونلار و منیم روحوم شاد اولسون».
فرهنگی اثرلر و مفاخر انجمنی، میرزه حسن رشدیهنی، 1386-جی ایلین آبانین اوتوزوندا، بیر مراسم ضمنینده اؤلکهنین فخرلریندن بیری کیمی تانیتدی.
معجزهلی بیتگیلر
یازار : میرزه عبدالصمد ملکی | بؤلوم : ساغلاملیق
+0 به یه ن
معجزهلی بیتگیلر
اوکلاهوما دانشگاهینین طبّی بیتگی شناسلارینین بیری، انرژی، دقّت، استرس آزالماسی و آنفلوآنزانین قاباغین آلماسی اوچون فایدالی اولان بیر سئری بیتگیلر لیستی وئریب. بو لیستده وئریلنلر هامینین اختیاریندا اولان بیتگیلردیلار:
ساریمساق:
ساریمساغین، آلینین آدلی مادهسی وار. ساریمساغین دیلیمینی سیندیراندا بو ماده آلیسینه چئوریلیر.
آلیسین، ضررلی اورگانیزملرله ساواشان طبیعی آنتی بیوتیک ساییلیر. بو ماده، اورک دامار خستهلیکلرینین قارشیسینی آلار.
ساریمساغین آیری فایدالاری: سو چیچگینی آرادان آپاران. پسوریازیس ناخوشلوغونون (صدف ناخوشلوغو) درمانی. چکینی دوزنه سالان. آیاق گؤبهلگینین قارشیسینی آلان. میغمیغا قووان. قان فشاری آزالدان. آلزایمرین قارشیسینی آلان. سوموکلری برکیدن. بدندهکی آغیر فلزلرین مسمویتینی آرادان آپاران. توکو گؤزلـلهدن. سو چیچگینی توختادان. صدف ناخوشلوغونون (پسوریازیس) قارشیسینی آلار.
ساری کؤک
ساری کؤکده اولان کورکومین مادّهسی، معده آلتی وز سرطانی، بؤیوک باغیرساق سرطانی، پسوریازیس، مفصل ورمی، افسردهلیک و آلزایمرین قارشیسینی آلار.
کورکومین التهابین قارشیسینی آلار و آرتریت کیمی خسته لیکلرین قارشیسینی آلار.
زنجفیل
زنجفیل ویروس ضدی اولان بیتگیدیر کی ضد التهاب و ضد سرطان خاصیتی وار. زنجفیل اورک بولانماسینی درمان ائلر.
زنجفیلین آیری خاصیتلری: هضم آنزیملری و جنسی هورمونلارینی تعدیل ائلر. فایدالی مادّهلرین جذبینی بدنده آرتیرار. قارین کؤپونون قارشیسینی آلار. عضله و مفصللرین آغریسینی آزالدار. (ایرنا)
جماعتله رابطهنین مهم اصللری
یازار : میرزه عبدالصمد ملکی | بؤلوم : دین
+0 به یه ن
جماعتله رابطهنین مهم اصللری
جماعتله رابطه قورماق، جامعهنین اساس اصوللارینداندیر و بو ایشده موفق اولان انسانلار یاشاییشلارینین هر مرحلهسینده داها موفق اولورلار. جماعتله رابطه قورماغین اؤزونه مخصوص اصوللاری وار. رابطه قیریلمیش شخص ایله تازادان رابطه قورماق و جامعهده همیشه حقّی دئمک بو اصوللارداندیلار.
امام صادق (ع) بویورور: حضرت رسول اللهین (ص) قیلینجینین قینیندا بئله یازمیشدی: «سن ایله رابطهسینی قیران شخص ایله رابطه قور.»، «سنی محروم ائلهیَنه بیر شئی باغیشلا.»، «ضررینه اولسا بئله حقّی سؤیله».
حضرت علی (ع) بویورور: «سیزه اولسون بیر بیریزله رابطه و باغیشلاماق، آیریلیقدان و بیر بیریزه دال چئویرمکدن اوزاق اولماق».
جماعت ایله رابطه قورماغین بیر اصولو دا اونلارلا مهربان اولماقدیر. امام کاظم (ع) بویورور: «جماعتله مهربان اولماق عاغلین یاریسیدیر».
قایناقلار:
مشکاة الأنوار فی غرر الأخبار، ص: 172- یازانی: فضل بن حسن حفید شیخ طبرسی- یئددینجی عصر
نهج البلاغه، 47-جی مکتوب
تحف العقول، ص403