اورمیه گؤلونون نجاتی خردادین ایكینجی یاریسیندان باشلیر

+0 به یه ن

اورمیه گؤلونون نجاتی خردادین ایكینجی یاریسیندان باشلیر

شرقی آذربایجان استانداری خردادین ایكینجی یاریسیندان اورمیه گؤلونون نجات طرحی‌نین باشلانماسینی گؤزلدیگینی دئمكله آرتیردی: استانین فرهنگی- اجتماعی شوراسی مركزی شورانین تصویبی ایله تشكیل تاپیب.

فارسین تبریزدن وئردیگی خبره گؤره، جبارزاده اورمیه گؤلونون نجات جلسه‌سینده دئدی: دكتر كلانتری‌نین و ایش بیلن دسته‌لرین گئجه- گوندوز تلاشلاری سایه‌سینده، بو گون گؤلون قورتولماسینا اینانیریق.

او آرتیردی: شرقی آذربایجانین بوتون اجرایی دستگاهلار و مسئول‌لاری‌ تمام گوجلری ایله اورمیه گؤلونون نجات ستادی‌نین كناریندادیلار و بو طرحین اجرا ایشلری‌نین خردادین ایكینجی یاریسیندان باشلاماسینی گؤزلوروك.

جبارزاده آرتیردی: بو شورا اوچ شمال غرب استانلاریندا تشكیل تاپیب و شرقی آذربایجاندا 29 ثابت عضوی وار. مربوطه دستگاهلارین اجرایی مدیرلری، مجلس و استان شوراسیندان نماینده‌لر، غیردولتی تشكیلاتلاردان و محلّی آغ ساققال‌لاردان نماینده‌لر، دانشگاهدان و ایكینچیلیك بؤلوموندن نماینده‌لر و ایكی نفر حقیقی و یا حقوقی شخصیت استاندارین انتخابی ایله بو شورا‌نین عضولری دیلر.

آغ جیگرلره فایدالی یئمكلر

+0 به یه ن

آغ جیگرلره فایدالی یئمكلر

متخصصلرین دئدیگینه گؤره، گریپ فروت، موز، بالیق و پنیرین یئمگی آغ جیگر خسته‌لیكلرین ساغالماسیندا تأثیری اولار.

بو تحقیقده آمریكادا و اروپادا 2167 نفر آغ جیگر خسته‌لیگینه مبتلا اولان ناخوشلار مطالعه اولوندولار. اوستده ساییلان یئمكلردن یئیَن خسته‌لرین جیگرلری‌نین ایشینده و قانلارینداكی آغ گلوبول‌لارین سایی‌سیندا مثبت تأثیر گؤستریب.

بو مطالعه‌نین ارشد متخصصی «كورین هانسون» دئییر: یئمك رژیمی بالقوه خطرلی بیر عامل اولا بیلر و چوخلو خسته‌لیكلری گوجلندیره بیلر. علمی نتیجه‌لر گؤستریر كی یئمك رژیمی آغ جیگر خسته‌لیگینده یوخاری حدده تأثیری وار.

بو مطالعه‌ده آنالیزدن بیر گون اوّل، گریپ فروت، موز، بالیق و یا پنیر یئیَن ناخوشلارین وضعیّتی او بیریلره نسبت داها یاخشی اولور.

متخصصلرین عقیده‌سینه گؤره، بو یئمكلرله اله گلن نتیجه آراسیندا سبب - نتیجه رابطه اله گلمه‌ییب آما چوخ احتمالا بونلاردا اولان آنتی اوكسیدان مادّه‌سی بو نتیجه‌لری اله وئریر.

كؤك اولانلار اوخوسونلار

+0 به یه ن

كؤك اولانلار اوخوسونلار

كؤك اولان انسانلاردا آیری مشكل‌ده اولماسا اورك-دامار خسته‌لیگی‌نین احتمالی اونلاردا یوخاری اولار.

كؤكلوك، اورَگه آرتیق یوك و فشار گتیرن ساغلام اولمایان وضعیتدیر. بونا گؤره آریقلاماق لازم مسأله‌دیر.

سیز، ایده‌آل و نورمال چكی‌یه ال تاپساز سیزده اورك دامار خسته‌لیگی‌نین احتمالی آزالار. بو، یاغ مصرفی‌نین آزالتماسی، میوه، تره‌وز و حبوبات مصرفی‌نین آرتیرماسی و بدن تحرّكونون چوخالماسی معناسیندادیر.

یئمك رژیمینی باشلاماق راحت اولا بیلر آما اونو دوام ائتدیرمك چتیندیر. اوّلده هدفی بللی ائله‌مكله یول اوستو مانعلره دوشونوب چتینلیكلرله نئجه اوز به اوز اولماغا تصمیم توتمالی‌سیز.

مناسب بیر یئمك رژیمی باره‌ده تغذیه متخصصی ایله مشورت ائله‌مك سیزه یاخشی اولار. یونگول‌لشمك اوچون غذا یئمه‌مك گاهدان بیر دب اولان رژیملرله آریقلاماق اولماز. سیز بیر گونده كؤكلمه‌میسیز كی بیر گونده ده آریقلایاسیز.

یئمك عادتیزه نظر سالین. باخین گؤرون آجالاندا یئمك یئییرسیز یوخسا عادت اوزوندن هر گئجه تلویزیون قاباغیندا اوتوروب یئمك یئییرسیز. بئله اولسا یئمك رژیمیزده دَیشیك‌لیك وئرمه‌لیسیز.

ایچیزده اولان یئمك هو‌سینی كنترل ائله‌یین. سیزه كالوریسی یوخاری اولان یئمكلر وئریلنده، اونلاری مؤدبانه ردّ ائله‌یین.

آرام یئیین و تیكه‌لریزی كیچیك گؤتورون. آغزیزداكینی چئینه‌ییب قورتارمامیش او بیری تیكه‌نی گؤتورمه‌یین.

گونده بیر دفعه چوخ یئمك عوضینه، نئچه دفعه آز یئیین. جور به جور میوه‌لر، تره‌وز، تاخیل، سوت محصول‌لاری، قیرمیزی ات، بالیق و دریسیز تویوق كیمی سالم یئمكلردان استفاده ائله‌یین.

غذالاری یاغدا قیزارتمایین بلكه اونلاری توست، فئرده پیشیرمك، كباب و سودا پیشیرمك فورموندا حاضرلایین. هابئله گونده ایچدیگیز سویون مقدارینی آرتیرین.

بدن تحرّكوزو آرتیرین

بدن فعالیتی، غذا رژیمیندن آرتیق سیزین ساغلاملیغیزا فایدالی اولار. او سیزی آغ جیگر، سوموك و اورك دامار خسته‌لیكلریندن اماندا ساخلار.

مبعث گئجه‌سی و گونونون عمل‌لری (مبعث بایرامی مبارك اولسون)

+0 به یه ن

مبعث گئجه‌سی و گونونون عمل‌لری (مبعث بایرامی مبارك اولسون)

مبعث گئجه‌سی رجب المرجب آیی‌نین مبارك گئجه‌لریندندیر. بو گئجه‌یه بیر سئری عمل‌لر نقل اولوب.

امام جواددان (ع) نقل اولوب: «رجب آییندا گونش اوندا پارلایاندان داها یاخشی بیر گئجه وار و او گئجه سحرینده رسول الله، پیغمبرلیگه مبعوث اولان گئجه، رجبین 27-سی دیر. بیزیم شیعه‌لردن هر كیم او گئجه‌نین اعمالینی یئرینه یئتیرسه 60 ایلین اجرینی قازاناجاق». او حضرتدن سوروشدولار: «او گئجه‌نین عمل‌لری نه‌لردیر؟» امام بویوردو: «خفتن نمازینی قیلیب یاتاغا گئدندن سونرا، گئجه‌ یاراسیندان تئز هر هانسی ساعتده آییلیب 12 ركعت نماز قیلاسان و هر ركعتده حمد ایله مفصل قیسا سوره‌لرین (محمد سوره‌سیندن قرآنین آخرینا قدر) بیرینی اوخویاسان، هر ایكی ركعتدن بیر سلام وئرندن سونرا اوتوروب حمد، معوذتین، توحید، كافرون، قدر سوره‌لرینی و آیة الكرسی‌نی هر بیرینی یئددی مرتبه اوخویاسان و بو عمل‌لرین هر بیری‌نین آخرینده مخصوص دعا اوخویاسان». بو دعالا مفاتیح الجنان كتابیندا مفصل صورتده توضیح وئریلیب.

بو گئجه‌ده غسل ائله‌ماق‌دا مستحبدیر.

امیرالمؤمنین زیارتی بو گئجه‌نین فضیلتلی عمل‌لریندن ساییلیر. مفاتیح الجناندا او حضرته اوچ زیارت نقل اولونوب.

رحمتلیك شیخ عباس قمی مفاتیح الجناندا رجبین 27-جی گئجه‌سینده امیرالمؤمنین زیارتی‌نین اوخونماسی‌نین فضیلتینه چوخ تأكید ائله‌ییب. اونون یازدیغینا گؤره، نه فقط شیعه‌لر بلكه سنت اهلیندن بیر عده‌ده اونا اشاره ائله‌ییبلر. بو باره‌ده ابن بطوطه‌نین سفرنامه‌سینه اشاره ائدیب: . . او جمله‌دن سنت اهلی‌نین عالملریندن اولان، آلتی یوز ایل بوندان اوّل یاشامیش ابو عبدالله محمد بن بطوطه، «رحله ابن بطوطه» آدلی سفرنامه‌سینده مكه‌دن نجفه داخل اولماسی باره‌ده یازیر: «بو شهرین اهالیسی‌نین هامیسی رافضیدیلر و امیرالمؤمنین روضه‌سینه كرامتلر ظاهر اولوب. او جمله‌دن اورانین اهالیسی آراسیندا «لَیْلَةُ الْمَحْیا» آدینا معروف اولان رجبین ایرمی یئددینجی گئجه‌سی، عراق عجم و عراق عربدن و رومدان اوتوز قیرخ نفر چولاق و افلیج آدام ییغیشیب گلرلر و خفتن نمازیندان سونرا اونلاری مقدس ضریحین یانینا گتیررلر و جماعت ییغیشیب اونلارین ساغالماسینی گؤزلر. گئجه‌نین یاریسی و یا اوچدن ایكیسی گئدنه قدر بو جماعتین بیر عدّه‌سی نمازا مشغول اولار و بعضیسی ذكر دئیَر و بیر تعدادی قرآن تلاوت ائلر و بعضیلری‌ده روضه‌یه باخارلار. او آن حركت ائده بیلمه‌ین بو افلیجلر هئچ ناخوشلوقلاری اولمادان ساپ-ساغلام آیاغا دوروب  «لا اِلهَ اِلا اللّهُ مُحَمَّدٌ رَسُولُ اللّهِ عَلَىُّ وَلی ُّاللّهِ» دئیَرلر. بو مشهور و مستفیض مسأله‌دیر. من اؤزوم او گئجه‌نی درك ائله‌مه‌میشم آما سؤزلرینه ایناندیغیم ثقه انسالاردان ائشیتمیشم. هم ده بیر مدرسه‌نین مسافرخاناسیندا اوچ افلیج انسان گؤردوم. اونلاردان سوروشدوم: سیز نییه توخدامامیسیز و بوردا قالیبسیز؟ جواب وئردیلر: بیز ایرمی یئددینجی گئجه‌یه چاتمامیشیق و شفا آلماق اوچون بوردا قالیب گلن ایلی گؤزله‌ییریك. بو گئجه شهرلردن چوخلی جماعت ییغیشار و اون گونه قدر بؤیوك بازار قورولار. فقیر دئییر: آماندی بو مسأله نظرینه بعید گله!. بو مشرّفه مشاهددن گؤرونن معجزه‌لر سایا گلمز حدده چوخدور و متواتر اولوبلار . . .».

رجبین ایرمی یئددینجی گونونون عمل‌لری

بؤیوك بایراملاردان و حضرت رسول صَلَّى اللَّهِ عَلِیهِ وَ اله-ین رسالته مبعوث اولان گونو و جبرئیلین پیغمبریمیزه نازل اولان گونودور. بو گونون نئچه عملی وار:

غسل ائله‌ماق.

اوروج توتماق و بو گون ایل بویو ممتاز ساییلان دؤرد گوندن بیریدیر. بو گونون اوروجو یئتمیش ایلین اوروجو ایله برابردیر.

چوخلو صلوات چئویرمك.

حضرت رسول الله (ص) و امیرالمؤ منین (ع) زیارتینی اوخوماق.

شیخ، مصباح كتابیندا یازیر: رَیّان بن الصّلت‌دن نقل اولوب كی حضرت امام جواد علیه السلام بغداد دا اولان زمان رجبین اون بئشینده و ایرمی یئددیسینده اوروج توتدو و بوتون آداملاری‌دا اوروج توتدو. بیزه امر بویوردو 12 ركعت نماز قیلاق و هر ركعتده حمد و سوره اوخونا و هر نمازدان قورتولاندان سونرا حمد و توحید و مُعَوَّذَتین سوره‌لری‌نین هر بیری دؤرد دفعه اوخونا و دؤرد دفعه « لا اِلهَ اِلا اللّهُ واللّهُ اَكْبَرُ وَسُبْحانَ اللّهِ وَالْحَمْدُلِلّهِ وَلا حَوْلَ وَلا قُوَّةَ اِلاّبِاللّهِ الْعَلِىِّ الْعَظیمِ» دئییله و دؤرد دفعه «اللّهُ اللّهُ رَبِّى لا اُشْرِكُ بِهِ شَیْئا»  دئییله و دؤرد دفعه‌ده «لا اُشْرِكُ بِرَبِّى اَحَدا» دئییله.

هابئله شیخ، جناب ابوالقاسم حسین بن رُوح‌دان نقل ائلیر كی بویوردو: « او گون 12 ركعت نماز قیلارسان و هر ركعتده حمد و راحت سوره‌لرین بیرینی اوخویارسان و تشهد سلامدان سونرا هر ایكی ركعت آراسیندا بئله دئیَرسن:

اَلْحَمْدُ لِلّهِ الَّذى لَمْ یَتَّخِذْ وَلَداً وَلَمْ یَكُنْ لَهُ شَریكٌ فى الْمُلْكِ

وَلَمْ یَكُنْ لَهُ وَلِىُّ مِنَ الذُّلِّ وَكَبِّرْهُ تَكْبیراً یا عُدَّتى فى مُدَّتى یا

صاحِبى فى شِدَّتى یا وَلیّى فى نِعْمَتى یا غِیاثى فى رَغْبَتى یا

نَجاحى فى حاجَتى یا حافِظى فى غَیْبَتى یا كافِىَّ فى وَحْدَتى یا

اُنْسى فى وَحْشَتى اَنْتَ السّاتِرُ عَوْرَتى فَلَكَ الْحَمْدُ واَنْتَ الْمُقیلُ

عَثْرَتى فَلَكَ الْحَمْدُ وَاَنْتَ الْمُنْعِشُ صَرْعَتى فَلَكَ الْحَمْدُ صَلِّ عَلى

مُحَمَّدٍ وَآلِ مُحَمَّدٍ وَاسْتُرْ عَوْرَتى وَآمِنْ رَوْعَتى وَاَقِلْنى عَثْرَتى

وَاصْفَحْ عَنْ جُرْمى وَتَجاوَزْ عَنْ سَیِّئاتى فى اَصْحابِ الْجَنَّةِ وَعْدَ

الصِّدْقِ الَّذى كانُوا یُوَعَدُونَ

هر نماز و دعادان قورتولاندان سونرا حمد، اخلاص، مُعَوَّذَتَیْن، قُلْ یا اَیُّهَا الْكافِرُونَ، اِنا اَنْزَلناهُ و آیة الكرسى‌نی هر بیرینی یئددی مرتبه اوخویوب یئددی دفعه  «لا اِلهَ اِلا اللّهُ واللّهُ اَكْبَرُ وَسُبْحانَ اللّهِ وَلا حَوْلَ وَلا قُوَّةَ اِلاّ بِاللّهِ» دئیَرسن. سونرا یئددی دفعه «اللّهُ اللّهُ رَبَّى لا اُشْرِكُ بِهِ شَیْئا» اوخویاندان سونرا ایسته‌دیگین دعانی ائلرسن.

قولاق آسماق، حقیقتی اؤیرنمگین اساس تملیدیر

+0 به یه ن

قولاق آسماق، حقیقتی اؤیرنمگین اساس تملیدیر

حقیقی فلسفه، بیزه دوزگون بیلمك اوچون داها چوخ ائشیتمگی اؤیره‌دیر. آیریلارین سؤزلرینی ائشیتمه‌دن دانیشا بیلمه‌ریك و صلحه چاتا بیلمه‌ریك.

صلحه چاتماق اوچون مقابل طرفی درك ائله‌مك لازمدیر. انسانی درك ائله‌مك، اونون سلیقه‌لرینی احتیاجلارینی نگرانلیقلارینی، اونون حقلرینی و نتیجه‌ده كثرتی درك ائله‌مك سعادته و كمالا ایشیقلی بیر یولدور. بونو درك ائله‌مك لازمدیر كی بوتون فرهنگلرین انسانلاری بیر اصیل و واحد حقیقتین ایشیقلاریدیلار كی هر بیرینه اهمیّت وئرمك لازمدیر.

بونو بیلمه‌دن كی بوتون انسانلار بیر غایت دالیسیجاندیلار و آنلادیقلاری قدر عزیز و احتراما لایقدیلر، و بونو بیلمه‌دن صلحه چاتماق اولماز. صلح هر شئیدن آرتیق انسانی آنلاماق و اونون عظمتینی و كرامتینی بیلمگه باغلیدیر. بو درین آنلاماغا چاتماق اوچون فلسفی تمل لازمدیر كی عقلی تفكّرو نتیجه وئرسین.

انسانین سعادتی آیریلارینی ائشیتمك و تانیماقلا میسّر اولار. اؤزگه‌نین نظرینی ائشیتمه‌دن دانیشا بیلمه‌ریك، حقیقی فلسفه بیزه داها آرتیق ائیشتمگی اؤرگدیر.

سؤز فقط دانیشیق دئییل بلكه حقیقتلری آیدینلاداندیر. آیریلاری ائشیتمگین صلح معنا تاپار و عیان اولار و دوام تاپار.



  • [ 1 ][ 2 ][ 3 ]