din xadimi دین خادمی

دیسكاوری شبكه‌سی 2014-جو ایلینده دسامبرین 7-سینده «دیری اودولماق» آدیندا بیر مستند آنتنه یوللادی. بو شبكه چوخاندان ایدی بو مستند اوچون تبلیغ ائدیردی. قرار ایدی «پل روزالی» بیر آناكوندا ایلانی طرفیندن اودولوسون و بیر ساعت اونون قارنیندا قالسین.

آناكوندا ایلانلاری دنیانین اَن بؤیوك ایلانلاری كیمی تانینیرلار و معمولاً شكارلارینی اودماقدان اوّل بوغارلار.

روزولی‌نین بوغولماماسی اوچون بوتون حاضرلیقلار گؤرولموشدو. متخصصلر اونون اوچون كربن فیبریندن، نفس آلما و ارتباط سیستمینه مجهز اولان مخصوص پالتار حاضرلامیشدیلار كی ایلانین قارنیندا اؤلمه‌سین و ائشیكله دانیشا بیلسین.

روزالی دئییر: بیز بو سیستمین منیم اودولماغیمدان سونرا ایشله‌جگیندن مطمئن دئییلدیك. بونونلا بئله الیمیزدن گلن قدر امین اولماغا چالیشدیق.

او آرتیریر: بیز 60 گون بویوندا آمازونون پرو اؤلكه‌سینده اولان بؤلومونده مناسب آناكوندا آختاردیق. تاپدیغیمیز ایلك آناكوندانین 7.5 متر اوزونلوغو و تقریباً 135 كیلو آغیرلیغی واریدی. آما اونو تله‌یه سالانمادیق. سونرا بیر 6 مترلیك دیشی آناكوندا تاپدیق. ایلان اوّلده منی اودماق ایسته‌مه‌دی و قاچماق نیّتینده ایدی آما اونو تحریك ائله‌یندن سونرا منیم اوستومه یوگوردو و اودماغا چالیشدی.

روزالی‌نین محافظ پالتاری حیوان قانینا بلشیلمیشدی كی آناكوندا اونو یئمگه هوسلنسین.

روزالی، ایلانین گوجلو حلقه‌لری آراسیندا گرفتار اولدو و آز قالیردی قوللاری و سومكلری اوغولسون. اؤزونو ایلانین چنبره‌سینده گرفتار گؤرن روزولی‌نی قورخو بورویور. ایلان اونو اودماق اوچون آغزینی آچیر. آما بو آندا روزولی قورخوسونا مغلوب اولور و اوردان قورتورولماسینی ایستیر.

او، قورتولاندان سونرا اؤزو قورخوسونو توجیه ائله‌مك اوچون دئییر: ایلانین انگی‌نین گوجونو محافظ بؤركومده حسّ ائله‌دیم و آغزی‌نین سویونون سسینی ائشیتدیم. ائله بیل ایلانین بوتون گوجو، منیم بیر قولوم اوستونده متمركز اولموشدو. بیر آندا ائله بیلدیم قولوم اوغولور.

هر حالدا دیسكاوری كانالی ادعا ائله‌دیگی مستندی نمایشه قویمادی. بو شبكه بو برنامه‌نین تبلیغینده بیر گون قاباق انسانین بیر ساعت بویوندا ایلانین قارنیندا قالدیغینی و زمان دركی‌نین ایتیدیردیگینی ادعا ائله‌میشدی.

بو برنامه‌دن قاباق و سونرا حیوانلاردان حمایت انجمنی، ایلانی اذیت ائله‌مگه گؤره بو برنامه‌دن انتقاد ائله‌میشدی.

Gigas-ین ال یازیلاری توراتین متنلری و دانیشقلارینی محاوره شكلینده احتوا ائله‌ین، 800 ایل بوندان اوّلدن (اورتا عصرلردن) ایندی‌یه قالمیش عظمتلی و دئو آسا كتابدیر.

اورتا عصرلردن قالمیش بو اَن بؤیوك كتاب، اینك و اوزون قولاق دریسی اوستونده یازیلیب. آما بو كتابین «شیطان انجیلی» آدینا معروف اولماسینا سبب، اونون 299-جو صفحه‌سینده اولان شیطانین مرموز و یئرسیز بیر تصویری‌نین چكیلمه‌سیدیر.

افسانه‌لره گؤره، بو تصویر شیطان طرفیندن مسخ اولونموش اؤزونو شیطانا ساتمیش راهبین الی ایله بو كتابا چكیلیب. بو تصویرده شیطان انسانلارا آغزینی اَییب یاندی – قیندی وئریر. بو كتابین هر صفحه‌سی‌نین بویو 92 سانتیمتر و اَنی 50 سانتی متردیر. بو 310 صفحه‌لیك كتابین جلدی تخته، مئتال و گؤندندیر و 74 كیلو آغیرلیغی وار.

بو كتاب 13-جو عصرده چك اؤلكه‌سینده یازیلیب. 1648-جی ایلینده سوئد ایله 30 ایللیك جنگ زمانی سوئد ارتشی طرفیندن یاغمالانیب و ایندیلیكده سوئدین استكهلم شهری‌نین موزه‌سینده‌دیر.

آیت الله سید مصطفی محقق داماد دنیا كاتولیك مسیحی‌لری‌نین رهبری پاپ فرانسیس ایله واتیكاندا گؤروشوب دانیشدی. بو گؤروش «مؤمنلرین جامعه‌ده‌كی تربیتی رولو» موضوعسوندا مسلمان و مسیحی عالملری‌نین اوچونجو اجلاسی چرچیوه‌سینده و كاردینان تورانین دعوتی ایله اولدو.

حوزه آژانسی‌نین وئردیگی خبره گؤره، واشینگتونون بؤیوك اسقفو كاردینال توران، امیر حسین بن طلال اردن‌دا بین الادیان مطالعه‌لر مؤسسه‌سی‌نین هیأت امنا رییسی، لبنانین سابق مفتیسی شیخ محمد رشید قبانی و بیت المقدس، مالزی، اندوزی، الجزایر و انگلستانین كلیسا اسقفلاری حاضر اولان بو اجلاسدا، ایكی دین عالملری‌نین دانیشیقلاری ایله اجرا اولدو.

بو مراسمده پاپ دئدی: مقصده چاتماغا چتین یول قاباغیمیزدا وار آما بو یولون هامار اولماسینا دعا ائتمه‌لی‌ییك.

بو اجلاسدا مدرسه‌لرده و دانشگاهلاردا مناسب تعلیم یوللاری ایله دینی معارفی و معنویاتی جوان نسله انتقال وئرمگین ضروری اولماسینا تأكید اولدو.

ژاپن اؤلكه‌سینده سوبارو تلسكوپون واسطه‌سی ایله یئددی تازا كهكشان كشف اولوندو. نظره گلیر بو كهكشانلار بیردن بیره اوردا ظاهر اولوبلار.

كهكشان سالخیملاری كایناتین اَن جرملی وارلیقلاریندان ساییلیرلار و یوزلر و حتی مینلر كهكشانی اؤزلرینده یئر وئریرلر. بو كهكشانلار جاذبه گوجو ایله بیر- بیرلرینه باغلیدیلار.

نظریه‌لره گؤره دنیا 13.8 میلیارد ایل بوندان اوّل بؤیوك پارتلاما (Big Bang) آدلانان حادثه‌دن سونرا یاراندی. ائله او زمان اولیه اولدوزلار و كهكشانلار فورمالاشدیلار سونرا اونلارین ماوراء بنفش ایشیغی یونیزه اولدو كی بو پروسه‌‌یه كوسمیك تازادان یونیزه اولماق (cosmic reionisation) دئییلیر.

منجّملر، فضایی یونیزه اولماق حادثه‌سینی آراشدیرماق اوچون ایلكین لیمن – آلفا (LAEs)‌ اشعه‌سینی ساچان كهكشانلاری، 13.1 میلیارد ایشیق ایلی فاصله‌ ایله آراشدیرماغا باشلاییبلار.

آراشدیرما تیمی دكتر «ماسامی اوچی»نین باشچیلیغیندا ژاپندا لیمن- آلفا (LAEs) اشعه‌سینه ساچان كهكشانلاری تانیماق اوچون سوبارو تلسكوپوندان استفاده ائله‌ییبلر.

منجملر حیرت ایچینده بو كهكشانلارین 13 میلیارد ایل بوندان قاباقدا ظاهر اولماسینی گؤردولر.

بو آراشدیرمانین یازانلاریندان بیری اولان «آكیرا كونو» تأكید ائله‌دی: بو كهكشانلارین پاریلداماسی بیردن بیره یئددی سككیز یوز ایل بؤیوك پارتلامادان سونرا ظاهر اولدو. بو مسأله فضایی یونیزه اولماغین داها یاخشی دركینه كؤمك ائلیه‌جك.

بو تحقیقین نتیجه‌لری Astrophysical Journal مجله‌سینده منتشر اولوب.

امام حسین (ع) بویورودولار: اسلام امتی یزید كیمی حاكمه مبتلا اولسا اسلاملا وداعلاشماق لازمدیر.

عزادارلیق اسلام و دین فرهنگینی ساخلاماق اوچون بؤیوك ایشدیر. مین ایلدن آرتیقدیر كی شیعه مذهبی اقلیتده و مظلوم موقعیتده واقع اولوب. بنی امیه زمانیندا اهل بیتین (ع) آدینی آپارماق جرم ساییلیر. چونكی دوشمنلر او حضرتلرین آدلاری‌نین دالیسینجا فرهنگلری‌نین‌ده گلمه‌سینی بیلیرلر. اونلارین فرهنگی‌ده چوخلو ایشلرین پرده‌سینی آچار و ریاكارلارین ریاسینی اوزه چیخارار.

آما عزادارلیقدا اسلام و اهل بیت (ع) فرهنگی و سیره‌سی بیان اولمازسا او عزادارلیق یزیدی عزادارلیقدیر. چونكی امام حسینه (ع) بیرینجی رسمی عزادارلیق مراسمی توتان یزید اؤزو اولدو. او دئدی من ابن زیادا بئله دئمه‌میشدیم او افراط ائله‌ییب. ایندی بو سهوین جبرانینا عزادالیق مراسمی قورمالی‌یام. بیلیرسیز كی كربلا اسیرلری شاما قدر شكنجه‌ و تحقیرله آپاریلدیلار آما شامدان مدینه‌یه حكومتی احتراملا انتقال تاپدیلار.

یزید امام حسین (ع) اوچون عزادارلیق مراسمی توتاندان، عزادارلیق ایكی نوع اولوب. بیر دسته‌سینده صرفاً عزادالیق اولور و بیر دسته‌سینده عزادارلیقدان علاوه ائمه‌نین (ع) سیره و سؤزلری مطرح اولور. بو مسأله‌‌نین ایندی‌ده ادامه‌سی وار.

امام رضادان (ع) روایت وار كی شیعه یالان دانیشماز. مشهدین شیعه‌لری امام رضانین (ع) گؤروشونه گئتدیلر. امام اونلاری آلتی آی بویوندا قبول ائله‌مه‌ییب بویوردو: یالان دانیشان بیزیم شیعه‌میز دئییل. اونلار جواب وئردیلر: بیز امام حسینه (ع) عزادارلیق ائدریك و احسان وئره‌ریك. امام بویوردو: شیعه، ائوده و بازاردا یالان دانیشماز، بیری‌نین باشینا بؤرك قویماز، ربا وئرمز و نزول یئمز. شیعه باها ساتماز، صادق اولار. امام رضا بویوردو بو خصوصیتی اولمایان شیعه‌لر یالانچی شیعه‌دیلر و اسلامین آبروسینی آپاریرلار.

روایتلریمیزده وار كی امام حسینه آغلایان و یا آغلادان جنّته گئدر. دوزدور بیری واقعاً امام حسینه آغلایا بیلسه البته جنّت اهلیدیر. آما دوغرودان و حقیقتاً امام حسینه آغلایا بیلمك اوچون او شخصیتی تانیماق و اونون سؤزلرینه عمل ائله‌مك لازمدیر. چوخلاریمیز نماز قیلیریق آما كیمین نمازی واقعاً خالص اولور. انسانین بیر ركعت نمازی خالص اولسا الله‌لا رابطه‌سی قورولمازمی؟ پس بو آرادا نا خالصلیق وار! بیری‌ده خالصاً مخلص امام حسینه آغلایا بیلسه، یعنی بو آدام الله و اسلام دئیَنلره عمل ائلر كی امام حسینه آغلایا بیلیر.