حضرت زینبین واقعی مزاری هاردادیر؟
یازار : میرزه عبدالصمد ملکی | بؤلوم : دین
+0 به یه ن
حضرت زینبین (س) مزاری باره‌ده اوچ نظر
حضرت زینبین(س) مزاری باره‌ده اوچ نظر «مدینه»، «قاهره» و «دمشق» وار, آما بو اوچ نظرین هانسی‌سی بنی هاشم عقیله‌سی‌نین مزاری باره‌ده دوزدور؟
حضرت زینب كبری سلام الله علیهانین یئری باره‌ده موختلیف ریوایتلر و نظرلر دئییرلر كی هر گروه بعضی دلیل‌لرله اؤز ایدّعالارینی ثابیت ائدیرلر. بعضیلری او حضرتین قبرین دمشقده, بیر عیدّه قاهره‌ده و آیریلاری مدینه‌ده بیلیرلر. چالیشدیق بو نظریه‌لرین دوز و یا سهو اولماسینی آراشدیراق.
قاهره
بعضی نظرلرده اوخوروق كی حضرت زینب(س) بنی امیه دستگاهی علئیهینه ائتدیگی آچیقلامالارا گؤره, مجبور قالدی مدینه‌دن مصره گئتسین. اوردا ساكین اولوب و نهایتاً اوردا دونیاسین دگیشیب. ایندی قاهره ده «سیده زینب» موجلل و عظمتلی زیارتگاهدیر. (حضرت فاطمه(س) و قیزی‌نین یاشاییشی. هاشم رسولی محلاتی)
نسابه عبیدلى «اخبار الزینبات» كیتابیندا ائله ریوایتلر نقل ائلیر كی اونلارین مضمونونا گؤره گرك حضرت زینب (س) مصرده قویلانمیش اولا. آما بیز بو ریوایتلره سند و مؤحتوا باخیمدان اعتماد ائلیه‌بیلمیریك, نییه كی«مرقد العقیله زینب (س)» كیتابی‌نین یازانی محمد حسنین سابقى بو حدیثلره ایشكال وارید ائله‌ییب و دئییر كی بو راویلارین چوخو كی عبیدلی بو ریوایتلری اونلاردان نقل ائدیب, مجهولدولار و ریجال و تراجوم و نسب كیتابلاریندا اونلاردان بیر اثر یوخدور. بو بیر حالدادیر كی بو ریوایتلرین اؤزلری‌ده ایشكالسیز دئییل‌لر.
بعضیلری دئییرلر: قاهره‌ده قویلانان زینب, زینب بنت یحیى المتوج بن الحسن الانور بن زید بن حسن بن على بن ابیطالب‌دیر, آما اوردان كی اینسان نئچه نفرین آراسیندا موشترك بیر آدی ائشیدنده اونلارین ان مشهورو ذهنه گلر, جماعتین چوخو بئله بیلیبلر كی بو همان مشهور زینب یعنی على بن ابیطالبین (ع) قیزیدیر. حال بو كی بو گومان اساس‌سیزدیر. البته اشخاصی اؤز بؤیوك جدّلرینه نیسبت وئرمك معمولدور, نئجه كی بیزیم ایماملاریمیزا پیغمبرین اؤولادی دئییلر. بونا گؤره زینب بنت یحیى‌نی, زینب بنت على علیهما السلام اوخوسالار, هئچ ایشكالی یوخدور.
مدینه
بعضی ریوایتلرده گلیب كی حضرت زینب(س) مدینه‌یه گلیب و ایل یاریم بویو آغلاماق و عزادارلیغا مشغول اولوب و نهایتده همان شهرده وفات ائدیب و قویلانیب و ایندی او مؤحترم خانیمین قبریندن اثر قالماییب. بو نظری علامه سید محسن امین دئییر و آیری نظرلردن اعتیبارلیدیر.
گرچه حضرت زینبین (س) مدینه (بقیع)ده قویلانماسی كامیلاً طبیعی و مومكون نظره گلیر, چون قارداشی ایمام حسنین(ع) و بنی هاشمین بیر چوخ بؤیوكلری بو قبریستاندا قویلانیبلار. آما بوكی حضرت زینبین(س) او عظمت و شخصیتی‌اینن قبری موشخص اولماسین سوآل یئری وار. بیر حالداكی مدینه شهری و قبریستانلاری باره‌ده یازیلان كیتابلاردا او حضرتین قبریندن آد گلمه‌ییب. بونونلا بئله كی «ام البنین» كیمی خانیملارین آدلاری كی بو قبریستاندا قویلانیبلار«وفاء الوفاء» كیمی كیتابلاردا یازیلیب.
دمشق
بعضیلری‌ده دئییرلر: حضرت زینب (س) مدینه‌یه وارید اولوب مجلیسلر و محفیل‌لرده یزدیلرین جینایتلرین آچیقلایاییردی. مدینه‌نین فرمانداری ماجرانی یزیده یازیر و یزید اونا دستور وئریر زینبی _مكه و مدینه‌دن سووای_ هر هانسی شهره ایسته‌سه یوللاسینلار. حضرت زینب(س) شاما گئدیر و بیر مودّت سونرا اوردا دونیاسین دگیشیر. رحمتلیك شیخ عباس قمی اؤز اوستادی رحمتلیك محدث نوری و آیریلاریندان نقل ائله‌مكله شام احتیمالینی داها گوجلو بیلیر. حسنین سابقى «مرقد عقیله زینب» كیتابیندا یازیر كی حضرت زینبین (س) قبری دمشقین یاخینلیغیندا زینبیه‌ده‌دیر.
بو نظرین طرفدارلاری اؤز دلیل‌لرین بئله بیان ائلیرلر: مدینه‌ده قیتلیق و یوخسوللوق اولدو, عبدالله جعفر تصمیم توتدو خانیمیسی حضرت زینبله (س) شاما –كی اوردا اكین یئری واریدی- كؤچسون, شاما سفر ائلیه‌ندن سونرا حضرت زینب(س) دونیاسین دگیشدی.
شاید بو نظریه‌ده بو مسأله‌نین مطرح ائله‌مه‌سی دوشونمه‌لی اولا چون كی هئچ تاریخی كیتابدا دمشقده بئله اكین یئریندن بیر سؤز گلمه‌ییب و آیری طرفدن عبدالله ائله الی آچیق آدامیدی كی اونون الینده مال اموال تاب گتیرمزدی, پس نئجه ایمكانی وار كی بئله بیر كندی و مزرعه‌سی اولسون؟
سؤزون خولاصه‌سی بو كی مصر احتیمالی‌نین ایشكالی چوخدور, مدینه احتیمالی دلیل‌سیزدیر و نهایتده دمشق احتیمالی نظره داها دوز گلیر. گرچی یئنه یقینی صورتده دئمك اولماز كی حضرت زینبین(س) قبری هاردادیر. آما بونا دیقت یئتیرمكله كی اهل بیت خانیدانینا منسوب اولان زیارتگاه بو شریفه آیه‌نین میصداقیدیر«فِی بُیُوتٍ أَذِنَ اللَّهُ أَن تُرْفَعَ وَیُذْكَرَ فِیهَا اسْمُهُ», بیر ده اهل بیتین (ع) دفن اولان یئری هر هارا اولسا, یاد و خاطیره‌لری دیریدیر و عاشیق جماعتین سینه‌لرینده یئرلری وار.