شیخ شهاب‌الدین محمود اهری* Şeyx şəhabəəddin məhmud əhəri
یازار : میرزه عبدالصمد ملکی | بؤلوم : دین
+0 به یه ن
 |
||
|
یئددینجی هیجری قمری ایلین بؤیوك عاریفین یاشاییشی و احوالاتی شیخ شهاب الدین محمود اهری 580 هیجری قمری ایلین شعبانین اون بئشینده اهرده دونیایا گؤز آچدی و صرف و نحو تحصیلاتینی ملا حسن اهری‌نین محضرینده اؤیرندی. او 25 یاشی اولاندا تحصیلاتی‌نین تكمیلی اوچون تبریزه گئتدی و شیخ ركن‌الدین سجاسی‌نین حضوروندا علم و فیض كسبینه باشلادی و قوطبلوق درجه‌سینه چاتاندان سونرا اوستادین امریله اؤز وطنینه قاییتدی. دوغوم یئری دهخدا لوغتنامه‌سی و رحمتلیك كاشفی اهری و نئچه آیری منبع, اونون دوغوم یئرین اهر شهری یازیبلار. و بوتون موحقیقلر و مؤلیفلر اونو تبریزی اهری آدیله تانی‌ییبلار. حضرت شیخ اؤزونو قره‌داغلی تانیتدیریب. اوشاقلیق, جوانلیق, تحصیل حضرت مولانا شیخ شهاب‌الدین اهری اوشاقلیقدا موتّقی آناسی معصومه سلطانین خاص دیقّتی‌ایله تربیت اولدو و آتاسی میرزا احمد, اوشاقلیق یاشلاریندان اونا قورآن اؤرگتدی و او 10 یاشیندا قورآنی ازبرله‌دی. سونرا 14 یاشا قدر كرامتلی عالیم ملا حسن اهری‌نین محضرینده عربی قایدالاری و ساییر علملری اؤرگشدی. او معلوماتین تكمیلی اوچون 25 یاشیندا ایكن تبریزه گئتدی و سورخاب محله‌سینده كی «وحدتیّه» مدرسه‌سینده اؤز تحصیلاتین تكمیل‌لتدی و بو مدرسه‌ده اوچ چیلله ریاضت چكدی. ریاضتلر حضرت شیخ عشق‌نامه مثنوی‌سینده ریاضتی, نفس‌ایله موباریزه‌ده و ازلی معشوقا چاتماق اوچون لازیم بیلیر. شیخ شهاب الدین اوستادی شیخ ركن‌الدین سجاسی‌نین محضرینه چاتداندان سونرا اونون امریله اوچ چیلله ریاضت چكدی ائله كی دریسی موبارك بدنیندن آیریلیردی. ریاضت قورتولاندان سونرا اوستادی سجاسی‌نین یانینا گئتدی و شیخ اونو تحسین ائله‌دی و بویوردو كی «خاصلار قیرخ ایل گئدن یولو, سن بو قیسا مودّتده گئتدین. آللاه سنه توفیق وئریب.» و بئله‌لیكله شیخ طرفیندن قاییم مقاملیق و مورشیدلیك درجه‌سینه تعیین اولدو. چیلله ساخلاماق عاریفلرین خاص عمل‌لریندن‌دیر كی پیغمبردن(ص) ریوایت اولان بیر حدیثه گؤره اینسانین كمالینا كؤمك ائدر: من اخلص لله اربعین صباحآ ظهرت ینابیع الحكمه من قلبه علی لسانه . (مناقب اوحدالدین ،ص 74 ) | ||
