قورآندا شیطانین صیفتلری*Quranda şeytanın sifətləri
یازار : میرزه عبدالصمد ملکی | بؤلوم : دین
+0 به یه ن
 |
||
|
آللاه تعالا نساء سوره‌سی‌نین 117-دن 121-جی آیه‌لرینده بویورور: [موشریكلر] اونون یئرینه, دیشی بوتلری [دوعا ایله] چاغیریرلار و عوصیانكار شیطاندان سووای, هئچ كسی چاغیرمیرلار (117) آللاه اونا لعنت ائله‌سین [اوندا كی] دئدی: شكسیز بنده‌لری‌نین ایچیندن موعیّن حیصّه [اؤزوم اوچون] گؤتوره‌جگم. (118) و اونلاری یولدان آزدیراجاغام و اوزون آرزولارا موبتلا ائده‌جگم و اونلاری مجبور ائده‌جگم حیوانلارین قولاقلارین پارچالاسینلار و اونلاری مجبور ائله‌رم تا آللاهین یاراتدیغین تپ‌چئویر ائده‌لر [آما] هر كس آللاه یئرینه شیطانی [اؤزونه] دوست توتا, قطعاً آشكار ضرره دوشوب. (119) [بلی] شیطان اونلارا وعده وئرر و اونلاری آرزولارا آتار, و توغلاماقدان سووای, اونلارا آیری وعده وئرمز (120) اونلارین یئری جهنّمدیر و اوندان قاچا بیلمزلر. (121) غافیل اینسانلارین جهنمّه دوشمكلری‌نین بیر سببی‌ده شیطان دالیسی‌جن گئتمكدیر. اولا بیلر بیری سوروشا كی مگر شیطانین دالیسی‌جن گئدن‌ده وار؟ و یا بو كی مگر اولا بیلر اینسان شیطان دالیسی‌جن گئده؟ بئله موریدلر اولسا, نئجه‌دیلر؛ یعنی نئجه ایمكانی وار كی اینسان شیطان دالیسی‌جن گئده و شیطان مورودلری‌نین خصوصیتلری نئجه‌دیر و . . . گر چی ایندی دونیادا شیطان پرست و ... گروهلار یارانیب, آما شیطان مورودو اولماق, همان آللاهین سؤزونه باخماماقدیر. مریم سوره‌سی‌نین آیه‌لرینده‌ده حضرت ابراهیمین دیلی‌ایله آتاسینا (و یا عمیسینه) بئله یازیر: ائی آتا ! شیطانی (وحدانیتدن اوزاقلاشماقلا و بوت‌پرستلیكله) عیبادت ائله‌مه, چونكی شیطان آللاه قاباغیندا عوصیان ائدیب. ائی آتا ! من بوندان قورخورام كی آللاه تعالا طرفیندن سنه عذاب گله, نتیجه‌ده شیطانین دوستلاریندان اولاسان. قورآن كریمین آیری آیه‌لرینده‌ده, آللاه تعالا اینسانلارا هوشدار وئریر كی آللاهین امریندن كنار اولماقلا, شیطان بنده‌لیگی‌نین تورونا دوشمه‌سینلر. نور سوره‌سی‌نین 21-جی آیه‌سی, نمل سوره‌سی‌نین 24-جو آیه‌سی, عنكبوت سوره‌سی‌نین 38-جی آیه‌سی, سبا سوره‌سی‌نین 20-جی آیه‌سی, یاسین سوره‌سی‌نین 60-جی آیه‌سی, زخرف سوره‌سی‌نین 37-جی آیه‌سی, حج سوره‌سی‌نین 3-جو آیه‌سی, محمد(ص) سوره‌سی‌نین 25-جی آیه‌سی, حشر سوره‌سی‌نین 17-جی آیه‌سی, بقره سوره‌سی‌نین 14-جو آیه‌سی, اسراء سوره‌سی‌نین 17 و 61 دن 65-جی آیه‌لری, كهف سوره‌سی‌نین 50 و 51-جی آیه‌لری, بو مطلبه ایشاره ائدیبلر. شیرك كلمه‌سی موختلیف
صورتلرده حدوداً 168 دفعه قورآندا گلیب. ایطاعت و بنده‌لیگین معناسی چوخ گئنیشدیر.
حتی بیری‌نین سؤزونه, اونو یئرینه گتیرمك نیّتی‌ایله قولاق آسیلسا, (یعنی بو كی
اینسان واخت قویا, دیقّت ائلیه, ساكیت اولا و . . .) بنده‌لیك حئسابلانار. | ||
