جنوب قوطبوندا قدیمی جنگل‌لر
یازار : میرزه عبدالصمد ملکی | بؤلوم : عمومی
+0 به یه ن
 |
||
|
جام جم آنلاین: تحقیقلر گؤرسه‌دیر كی تقریباً 15 میلیون ایل بوندان قاباق, سابیقه‌سیز ایستی كئچیجی صورتده جنوب قوطبونا اثر قویدو. هاوانین بو حدده قیزیشماسی جنوب قوطبون یاشیل سیماسینی دگیشدی. جنوب قوطبونداكی بوز لایه‌لری تقریباً 34 میلیون ایل بوندان قاباق دوزلیبلر, آما یاواش یاواش هاوانین قیزیشماسی‌ایله بوگونكی نیوزلند و شیلی آدلانان یئرلر توندرا كیمی اولدولار. هاوانین قیزیشماسی جنوب قوطبوندا ساحیل و مخروطی آغاجلاری وجودا گتیردی. سارا فیاكینز بیر شیمی موتخصیصی‌دیر كی زمین شناسی‌نین موختلیف دؤره‌لرین وضعیتلرین تشریح ائله‌مك اوچون شیمی علمیندن و اونون موختلیف حیوانلار و بیتكیلر اوستونده‌كی تأثیریندن ایستیفاده ائلیر. بو موحقیق جنوبی كالیفورنیا دانیشگاهی‌نین تحقیق گروهونون رئیسی‌دیر كی اخیراً حیرت آمیز مدركلر تاپیب. راس آدیندا مساحتی 187 مین كیلومتر موربعدن چوخ اولان بوز لایه‌سی‌نین قالیقلاریندان چوخ میقداردا یاغلی یارپاقلار تاپیلیب. قالیقلار میوسن دؤره‌سینده, یعنی بیر دؤران كی هاوا نیسبتاً موعتدیل ایدی, جنوب قوطبوندن خاریج اولوب و نهایتده اوقیانوسا گئدیب. بو حادیثه 15-20 میلیون ایل قاباق اولوب. پروفوسور فیاكینز دئییر كی بو یارپاقلارین اؤزلریندن علاوه كی جنوب قوطبی ساحیللرینده چوخلی بیتكیلرین اولماسیندان خبر وئریر, بو قالیقلارین شیمیایی آنالیزی گؤرسه‌دیر كی او زمان هاوا, قاباقجادان گومان ائله‌دیگیمیزدن داها چوخ ایستی‌ایدی. بو تحقیقلرین نتیجه‌سی گؤرسه‌دیر كی میوسن دؤره‌سینده هاوا ایندی‌نین اورتامیندان 11 درجه چوخیدی. پروفوسور فیاكینز دئییر: بیز بیلیردیك كی میوسن دؤره‌سی ایستی بیر دؤره‌ایدی آما حیرت آمیزدیر كی ایندی بیلیریك بو قدر ایستیدی. یاغلی یارپاقلار كئچمیشین هاوا وضعیتین گؤرسه‌دیرلر. بیر گیاه اؤلنده اونون چوخ قیسمتلری تجزیه اولار. آما اونون موم شكلینده اولان قیسمتی و توز دانالاری كی بوردا ایصطیلاحاً یاغلی بخشی دئییریك, آرادان گئتمیرلر و مختلیف قالیقلاردا تورا دوشورلر و مولكول فوسیلی كیمی قالیرلار. | ||
