باقر العلوم(ع)؛ سونّی و شیعه اونون علمیندن دانیشیر
یازار : میرزه عبدالصمد ملکی | بؤلوم : دین
+0 به یه ن
 |
||
|
ذیحجه‌نین یئددیسی ایمام باقرالعلومین (ع) شهادت گونو ایله موصادیفدیر. بیر ایمام كی موساعید اولمایان شراییطده حقیقت و ایلاهی معاریفین یایماسینا چالیشدی و گئنیش عملی فعالیت یاراتدی و ائلیه بیلدی كی شیعه‌نین حقانیّت اصولینی كامیل‌لتسین. شیعه‌لرین بئشینجی ایمامی اولان ایمام باقرالعلوم (ع) هیجرتین 57-جی ایلینده مدینه‌ده دونیایا گؤز آچدی. آدی محمد و كونیه‌سی ابوجعفر و لقبی باقرالعلومدیر. ایمام محمد باقرین(ع) آناسی (ام عبدالله) ایمام حسنین (ع) قیزیدیر و بو جهتدن او حضرت بیرینجی شخصدیر كی هم آنا و هم آتا طرفیندن فاطمی و علوی‌دیلر. او حضرتله موعاصیر اولان خلیفه‌لر بونلاردیر: ولید بن عبدالملك، سلیمان بن عبدالملك، عمر بن عبدالعزیز، یزیدبن عبدالملك وهشام بن عبدالملك. ایمام باقرین (ع) علمی او قدر یوخاریدیر كی طبری، بلاذری، سلامی، ابی داود و... كیمی سونّی عالیملر و تاریخچیلر اؤز كیتابلاریندا او حضرتین سؤزلریندن گتیریبلر و كیتابلاری‌نین یئر به یئرینده "قال محمدبن علی" و "قال محمدالباقر" جومله‌سی گؤزه دَییر. ایمام باقر (ع) زمانی چوخلاری مدینه‌یه گلدیلر كی او حضرتین علمیندن ایستیفاده ائتسینلر. ایمامین تربیت ائتدیگی شاگیردلردن جابر بن عبدالله انصاری، ابان بن تغلب، زراره بن اعین، حمران بن اعین وجابر جعفری‌یه ایشاره ائتمك اولار. |
||