din xadimi دین خادمی

	قوربان بایرامیز موبارك اولسون
قوربان سؤزو, معنا جهتدن یاخینلاشما آنلامیندادیر. یعنی اینسان آللاها یاخینلاشماق اوچون بیر وسیله‌دن ایستیفاده ائدیر. ایسلامی منبعلره اساساً اینسان تاریخینده بیرینجی قوربانلیغی حضرت آدمین (ع) اوشاقلاری یعنی هابیل و قابیل وئردیلر كی قابیل بیر آز بوغدا و هابیل بیر قوچ آللاهین درگاهینا یاخینلاشماق اوچون قوربان وئردیلر. هابیلین نیّتی و اعمالی دوز اولدوغو اوچون اونون قوربانی قبول ائدیلدی و قابیلین‌كی رد اولدو.   قورآن كریم بو باره بئله بویورور: پس اونلار ایكیسی قوربان وئردیلر, بیریندن قبول ائدیلدی و او بیریندن قبول ائدیلمه‌دی. «اذ قربا قربانا فتقبل من احدهما و لم تقبل من الاخر» (مائده 27) آما بو گون بیز قوربان بایرامی كیمی عزیز سایدیغیمیز گون او گونه موصادیفدیر كی حضرت ابراهیم (ع) آللاه یولوندا بیر قوچ قوربان ائله‌دی. حضرت ابراهیم (ع) ائولاد صاحیبی اولموردو و همیشه آللاه درگاهینا دوعا ائدیردی آللاه اونا صالح ائولاد نصیب ائله‌سین. (رب هب لی من الصالحین) بیر حالدا كی حضرت ابراهیمین (ع) 86 یاشی واریدی آللاه تعالا اونون دوعاسینی موستجاب ائدیب اونا اسماعیلی وعده وئردی (فبشرناه بغلام حلیم) حیرت آمیز یوخو حضرت اسماعیل(ع) یئنی‌یئتمه‌لیك یاشلارینا چاتاندا حضرت ابراهیم (ع) حیرت آمیز بیر یوخو گؤرور. او یوخودا گؤرور كی آللاه طرفیندن امر گلیب كی تكجه اوغلونو آللاه یولوندا ذیبح و قوربان ائله‌سین. (البته دیقّت یئتیرمك لازیمدیر كی پیغمبرلردن سووای هئچ كسین یوخوسو بو معنانی داشیماز) ابراهیم ماجرانی اوغلونا دانیشیر. فلما بلغ معه السعی قال یا بنی انی اری فی المنام انی اذبحك فانظر ما ذا تری؛(صافات 102) «او چالیشما یاشینا چاتاندا, دئدی ائی منیم بالام من یوخودا گؤردوم كی سنی ذیبح ائدیرم, سنین نظرین نه‌دیر؟» حضرت اسماعیل‌ده بو سیناقدان باشی اوجا چیخدی. قَالَ یَا أَبَتِ افْعَلْ مَا تُؤْمَرُ سَتَجِدُنِی إِنْ شَاءَ اللَّهُ مِنْ الصَّابِرِینَ؛(صافات 102) «دئدی: آتا جان! امر اولدوغونا عمل ائت, آللاه ایسته‌سه منی صبر ائدنلر سیراسیندا گؤره‌جكسن.»   فَلَمَّا أَسْلَمَا وَتَلَّهُ لِلْجَبِینِ. وَنَادَیْنَاهُ أَنْ یَا إِبْرَاهِیمُ. قَدْ صَدَّقْتَ الرُّؤْیَا إِنَّا كَذَلِكَ نَجْزِی الْمُحْسِنِینَ. إِنَّ هَذَا لَهُوَ الْبَلَاءُ الْمُبِینُ. وَفَدَیْنَاهُ بِذِبْحٍ عَظِیمٍ. وَتَرَكْنَا عَلَیْهِ فِی الْآخِرِینَ(صافات 103- 108) «هر ایكیسی تسلیم اولاندان سونرا اونو آنلی اوسته آتدی. بیز نیدا ائله‌دیك كی ائی ابراهیم ! سن یوخونا عمل ائله‌دین و صادیق اولدون و البته كی بیز یاخشی عمللی اینسانلارا پاداش وئره‌ریك. بو آشكار بیر سیناق ایدی. و اونو بؤیوك ذیبحله آلدیق و اونون یاخشی آدینی گله‌جك نسله بوراخدیق.» بئله‌لیكله آللاه اسماعیلین یئرینه آیری قوربان گؤندردی.