ایمام هادی (ع)
یازار : میرزه عبدالصمد ملکی | بؤلوم : دین
+0 به یه ن
 |
||
|
نقل اولوب كی خلیفه متوكلین یانیندا, ایمام هادینی (ع) سعایت ائله‌دیلر كی اونون ائوینده سلاح و آیری زادلار وار كی حكومت علئیهینه قیام ائله‌مگه حاضیرلاشیر. متوكل بو یالانا اینانیب بیر عیدّه‌نی یوللور كی او حضرتین ائوینی آختارسینلار. مأمورلار گئجه یاریسی او حضرتین ائوینه تؤكولورلر آما بیر شئی تاپا بیلمیرلر. ایمامی بیر اوتاقدا تك تاپیرلار كی یون پالتار گئییب و دؤشه‌مه‌سی قوم اولان بیر یئرده اوتوروب و عیبادته مشغولدور. ایمامی همن وضعیتده خلیفه‌نین یانینا آپاریب دئدیلر: ائوینده بیر شئی تاپانمادیق و اونو اوزو قیبله‌یه و قورآن اوخویان حالدا گؤردوك. متوكل ایمامی گؤرن لحظه, ایمامین عظمتی اونو توتدو و ایختیارسیز او حضرته احتیرام ائله‌دی و اؤز یانیندا اوتورتدو و الینده‌كی شراب شوشه‌سیندن اونا تعاروف ائله‌دی ! ایمام آند ایچیب و بویوردو: منیم قانیما و اتیمه بئله بیر شئی قاریشماییب, منی معاف ائله ! خلیفه ال چكدی و دئدی: شعر اوخو ! ایمام بویوردو: من چوخ شعر ازبر دئییلم. آما خلیفه ایصرار ائتدی كی گرك اوخویاسان. ایمام بو مضموندا بیر شعر اوخودولار: «(موقتدیر حاكیملر) داغلار باشیندا گئجه‌نی گونوز ائله‌دیلر بیر حالدا كی گوجلو كیشیلر اوندان موغایات اولوردولار, آما داغ باشلاری اونلاری (اؤلومدن) قورتارا بیلمه‌دی. اونلار ایللر بویو عیزّتدن سونرا, امن یئرلریندن آشاغی چكیلدیلر و قبیرلرینه یئرلشدیلر, نه پیس ائو و نه پیس آرامگاه ! تورپاغا تاپیشیریلاندان سونرا, مونادیدن بیر نیدا گلدی: هاردادی او فاخیر تختلر, تاجلار و پالتارلار؟ هاردادی ناز نعمتده بسلنمیش اوزلر كی اونلارین احتیرامینا پرده‌لر آسیلاردی؟ قبیرلر اونلارین یئرینه دئیه‌رلر: ایندی یئر قوردلاری او اوزلرین یئمه‌سی اوستونده ساواشیرلار ! اونلار اوزون مودّت یئر اوزونده یئییب ایچدیلر؛ آما بوگون او هر شئیی یئیه‌نلرین اؤزلری حشره‌لرین و قوردلارین خورگی اولوبلار ! نه ائولر دوزلتدیلر كی اونلاری قوروسون, آما نهایتده بیر مودّت سونرا, بو ائولر و عاییله‌لری تركیدیب قبر ائوینه قاچدیلار ! نه ماللار آنبار ائله‌دیلر, آما اونلاری تركیدیب گئتدیلر و اونلاری دوشمنلرینه بوراخدیلار ! اونلارین آباد ائولری و سارایلاری خرابایا چئوریلدی و ساكینلری قارانلیق قبیرلره گئتدیلر !» متوكل چالیشیردی كی جماعت یانیندا ایمامین مقام و موقعیتینی یئندیرسین آما ایشلر اونون ضررینه و ایمامین نفعینه قورتولدو. |
||
