زینب كبری (س) حسینی عیزّتین مونادیسی
یازار : میرزه عبدالصمد ملکی | بؤلوم : دین
+0 به یه ن
زینب كبری (س) حسینی عیزّتین مونادیسی زینب كبری (س) حسینی عیزّتین مونادیسی ایدی كی شوجاعت و دؤزومله، حسینی حماسه‌نی تاریخده همیشه‌لیك قالارگی ائله‌دی. دونیادا سایسیز قیاملار و اینقیلابلار اولوب آما اونلارین چوخ آزی اثر قویان و قالارگی اولوب كی اونلارین اَن موهومّی اباعبدالله الحسینین(ع) عاشورایی نهضتی دیر. بو بؤیوك واقیعه‌نی هئچ كس اهل بیت(ع) مخصوصاً سیدالساجدین(ع) و بنی هاشم عقیله‌سی زینب كبری(س) كیمی اؤز اودلی و فصاحتلی خوطبه‌لری ایله جماعتی تأثیر آلتینا آپاردیقلاری كیمی، تبلیغ ائلیه بیلمزدی. شكسیز عاشورایی اسیر كاروانی‌نین، تبلیغی نهضتینده، حضرت زینب(س) و امام سجادین(ع) قالارگی تأثیرلری واریدی. بو مؤحترم بانونون كوفه شهرینده‌كی خوطبه‌سی اُموی‌لرین كربلادا‌كی حیاسیز جنایتلریندن پرده گؤتوردو و اونلارین یالانچی و ریاكار و ظالیم اولدوقلارینی آشكار ائله‌دی. هابئله كوفه‌لیلرین وفاسیزلیقلارین و گله‌جكده‌كی آجی گونلرینی آیدینلاتدی. اونلاری مونقلیب ائله‌دی و ظولم دستگاهی‌نین پایالارینی تیترتدی.