ایمام حسن عسكری (ع)
یازار : میرزه عبدالصمد ملکی | بؤلوم : دین
+0 به یه ن
ایمام حسن عسكری (ع)
ایمام حسن عسكری‌نین (ع) ایمامت دؤورانی سیاسی-ایجتیماعی جهتدن مخصوص بیر دؤوران ایدی.
بیر طرفدن عباسی خیلافتی ضعیفله‌میشدی و توركلرین بیر عیدّه‌سی، خلیفه‌نین عزل و نصبینده گوجلری اولان حدّده، خیلافت دستگاهیندا نفوذ ائلیه بیلمیشدیلر. و بیر آیری طرفدن خیلافت علئیهینه اولان قیاملار باعیث اولموشدو عباسی‌لر چوخلو موشكوللرله اوز-اوزه قالسینلار. مخصوصاً زنگی‌لرین بصره‌ده‌كی قیامی كی عباسی خیلافتینی 14 ایل مشغول ائله‌دی.
بو احوالاتلا بئله، خیلافت دستگاهی ایمام حسن عسكری‌دن (ع) غافیل اولموردو، چونكی بیلیردی بو موقدّس وجود موسلمانلارین اون‌بیرینجی حقلی ایمامیدیر و پیغمبرین فرماییشینه گؤره اوندان سونرا ایمامتین آخیر حؤجّتی گله‌جك ایدی. ایمام حسن عسكری (ع) و كرامتلی آتاسی ایمام هادی‌نی(ع) نیظامی منطقه‌ده گؤز آلتیندا و حبسده ساخلاماقلاری بونا خاطیریدی كی ایمام حسن عسكری‌نین (ع) ائولنمه‌سینه و ایمام زمانین (عج) ویلادتینه مانع اولسونلار.
عباسی خیلافت دستگاهی چوخلو موشكوللرله اوز-اوزه قالماغینا رغماً ایمامی‌دا تماماً نظر آلتیندا ساخلامیشدی و او حضرتین مدینه‌یه قاییتماسینا ایجازه وئرمیردی.
ایمام عسكری‌نین (ع) بیر طرفدن وظیفه‌لری واریدی آتالاری كیمی اهل بیت (ع) معاریفی‌نین یایماسینا ایدامه وئرسین و آیری طرفدن‌ده حكومت مأمورلاری‌نین كونترولو و گؤزو آلتیندا حبس اولموشدو. بو اوزدن او حضرت دونیانین باشا-باشیندا اولان نوماینده‌لری ایله رابیطه قورماغا چتینلیك چكیردی و اونلارین بعضیسی ایله گیزلی قرارلار قویوردو.
حضرت بعضاً پیام و امر یوللاماق اوچون اؤز اعتیمادلی آداملارینی نوماینده‌لرینه طرف گؤندریردی و بعضاً اونلاری سامرایا چاغیریردی كی گلیب ایماملا گؤروشسونلر. آما بو گؤروشلر علنی یوخ بلكه گیزلی صورتده و طاباقچی و آل-وئرچی صورتینده اولوردی كی مأمورلار اونلارا شك ائله‌مه‌سینلر. اونلار او صورتده گلیردیلر و ایمام ظاهیرده آل-وئر اوچون و حقیقتده لازیم اولان امرلری وئرمك اوچون اونلارا یاخینلاشیردی و دانیشیردی و هابئله اونلارین سوآللارینا جواب وئریردی.