تفكیك مكتبی، نجفین عیرفان مكتبی تأثیرینده یارانیب
یازار : میرزه عبدالصمد ملکی | بؤلوم : دین
+0 به یه ن
تفكیك مكتبی، نجفین عیرفان مكتبی تأثیرینده یارانیب
تفكیك مكتبیی، تاریخی جهتدن اخباری و شیخیّه مكتبلرینه چوخ اوخشارلیغی وار آما واقعیتده تفكیكی مكتبی، داها چوخ نجفین عیرفان مكتبی تأثیرینده یارانیب كی بیر سئری دگیشیكلیكلرله تفكیكی مكتبینه چئوریلیب. بونلارین شیخیّه و اخباری‌لیكله هئچ جور فیكری رابیطه‌لری یوخدور.
رحمتلیك قاضی و رحمتلیك سید احمد كربلایی موهیم چؤهره‌لریندن اولان نجفین عیرفان مكتبی، قورآندان و ریوایتلردن ایستیفاده ائله‌مگه چوخ تأكیدی وار. بو مكتب تعقیبچی‌لری قورآن و ریوایتلره موراجیعه ائله‌مگی اینانیر و بو مسأله‌یه عجیب ایناملاری و تعبّودلری وار و اونون یانیندا قلبی ایدراك و شهودا تأكید ائدیرلر.
نجفین عیرفان مكتبی‌نین سونراكی واریثلری ریوایتلردن مخصوص آلینتیلارینا گؤره، اونلارین فلسفی مسأله‌لریله توتماماسینی گؤردولر. بونا گؤره مجبور قالدیلار فلسفی نیظاملاری دانسینلار و فلسفی نیظاملاری‌نین موغالیطه‌لرینی نیشان وئرمگه، منطیق یولو ایله نقد ائلیه بیلمه‌دیكلری اوچون، نهایتده مجبور قالدیلار عقل و دلیلی ارزیشسیز سایسینلار. اونلار صراحتاً دئییرلر عاریفلرین اساس موشكولو دلیلدن تبعیّت ائله‌مكدیر بیر حالداكی دلیل بیزی واقعیّته چاتدیرماز و ارزیشی یوخدور.
تفكیكیلر عقلین منطیقلی صورتده صوغرا كوبرا دوزمه‌سیله موخالیدیلر و عقله آیری بیر تعریف وئریرلر. اونلارین نظرینه عقل اینسانین اورگینه ساچان حقیقت ایشیغیدیر و ایدّعا ائدیرلر كی ریوایتلرده گلن عقل‌ده بو معنادادیر.
تفكیكیلر دینی مسأله‌لره اهمیّت وئریرلر آما موتعالی حیكمتی، قورآن و ریوایتله موغاییر گؤردوكلری اوچون آرالاریندا فرق قویماغی و تفكیك ائتمگی اؤزلرینه وظیفه بیلیرلر. دئییرلر دیندن حاصیل اولان، آیری بیر شئیدیر و عقل و دلیلدن حاصیل اولان آیری بیر شئی.