جهالت آدیندا بیر ناخوشلوق
یازار : میرزه عبدالصمد ملکی | بؤلوم : حكایه لر
+0 به یه ن
جهالت آدیندا بیر ناخوشلوق
سقراط بیر اوغلانا راستلاشیر و گؤرور چوخ ناراحات و كدرلیدیر. سببینی سوروشاندا او بئله جواب وئریر: یولدا گلیردیم. تانیشلارین بیرینی گؤردوم. اونا سلام وئردیم آما او نه اینكی جوابیمی وئرمه‌دی بلكه منه قولای بیر سؤز ده دئدی. من اونون بو ایشیندن چوخ ناراحاتام و حیرصلنمیشم».
سقراط دئییر: «نییه ناراحات اولدون كی؟»
اوغلان تعجوب ائدیب دئییر: «بللیدیر، بو جور بیر ایش آدامی حیرصلندیرردا !»
سقراط دئییر: «یولدا بیرینی گؤرسه‌یدین كی یئره ییخیلیب و سانجیدان قیوریلیر. اونا حیرصلنردین؟»
جواب وئریر: «یوخ ! نیه كی؟ آدام بیری‌نین ناخوش اولماغینا گؤره‌ده حیرصلَنَر؟»
سقراط سوروشور: «حیرصلنمزدین، بس نه ائدردین؟»
شخص جواب وئریر: «اونا رحمیم گلردی و اورگیم یاناردی. چالیشاردیم الیمدن گلن كؤمگی ائدم. دؤكتوره آپارام و یا هر نه الیمدن گلسه».
سقراط یئنه ایدامه وئریر: « سن بو ایشلری اونا گؤره ائدرسن كی اونو ناخوش بیلیرسن و گؤرورسن كی كؤمگه احتیاجی وار. اینسانلارین فقط جیسملری ناخوش اولماز. اونلارین روحلاری‌دا ناخوشلایا بیلر. كیرداری و داورانیشی پیس اولان اینسان ناخوش ساییلیر. بئله آدامین ناخوشلوغو جهالت ناخوشلوغودور. سنه توهین ائدن او شخص‌ده بو ایشی جهالت اوزوندن مورتكیب اولوب و سن گركمز اونون الیندن غضبلنه‌‌سن، بلكه اونا رحمین گلمه‌لیدیر و اونا كؤمك ائتمك فیكرینده اولمالیسان.»