آللاها توكّول ائتمگین فایداسی
یازار : میرزه عبدالصمد ملکی | بؤلوم : دین
+0 به یه ن
آللاها توكّول ائتمگین فایداسی
مادّه عالمینده مقصده چاتماغا بیر سئری طبیعی دلیل‌لر و بیر سئری روحانی و نفسانی دلیل‌لر احتیاجدیر.
قورآن كریم موختلیف یئرلرده آللاها توكّول ائتمگی ایمانلی اینسانلارین خصوصیّتلریندن ساییر و بویورور: « وعلی الله فتوكلوا ان كنتم مؤمنین» ایمانیز اولسا آللاها توكّول ائدین. (مائده سوره‌سی آیه 23)
علامه طباطبایی توكّولون تعریفینده بئله یازیب:
مادّه عالمینده ایراده‌نین نفوذونا و مقصده چاتماغا، بیر سئری طبیعی دلیل‌لر و بیر سئری روحانی و نفسانی دلیل‌لره احتیاج وار. اینسان، عمل میدانینا گیرنده و بوتون طبیعی عامیل‌لر حاضیر اولان زمان، اونونلا مقصد آراسیندا فاصیله یارادان ایراده سوستلوغو، قورخو و آیری روحی عامیل‌لردیلر.
بو وضعیّتده اینسان آللاها توكّول ائدیر‌سه، ایراده‌سی گوجلو و عزمی ثابیت اولوب روحی مانعلر و موزاحیملر اونون موقابیلینده خونثا اولاجاق. چونكی توكّول مقامیندا اینسان سببلر سببی ایله بیرلشه‌جك و بو بیرلشمكله نیگرانچیلیغا یئر قالمایاجاق.
امیرالمؤمنین علی (ع) توكّول باره‌سینده بویوروب: « من توكل علی الله ذلت له الصحاب و تسهلت علیه الاسباب و تبوء الخفض و الكرامه» هر كیم آللاها توكّول ائلیه چتینلیگلر اونا یوموشانار و وسیله‌لر اونا فراهم اولار و راحالیقدا و ووسعتده و كرامتده یئر آلار.
توكّول اینسانین بوتون ایجتیماعی و شخصی ایشلرینه اثر قویار او جومله‌دن تصمیم توتماغا. توكّول باعیث اولار اینسان تصمیمینده قاطع و قرارلی اولسون. بو باره‌ده قورآندا چوخلو آیه وار.
توكّولون ایكینجی ثمره‌سی شوجاعتدیر. اینسان آللاها توكّول ائدیب میدانا گیرنده هئچ زاددان و هئچ كسدن قورخوسو اولماز.
توكّلون اوچونجو فایداسی گوناهدان و شیطان سولطه‌سیندن اوزاق اولماقدیر. قورآن بو باره‌ده بویورور:
« فقالوا علی الله توكلنا ربنا لاتجعلنا فتنه للقوم الظالمین» دئدیلر آللاه بیز سنه توكّول ائدیریك ! بیزی ظالیم قوومون فیتنه‌سی آلتیندا قویما!»
توكّولون اثرینه ریوایتلرده ده ایشاره اولوب. پیغمبر (ص) بویوروب: « من احب ان یكون اقوی الناس فلیتوكل علی الله» هر كیم جماعتین اَن گوجلوسو اولماق ایستیر، آللاها توكّول ائله‌سین.
ریوایتلرده توكّولون اثرلریندن یوخاری هیمّته‌ده ایشاره اولوب. ریوایتلرده وار پیغمبر (ص) بیر عیدّه‌نی گؤرور اوتوروبلار و اكینچیلیك دالیسیجان گئتمیرلر. بویورو: «نه ایش گؤرورسوز؟» دئییرلر: «بیز توكّول ائدنلریك. آللاها توكّول ائله‌میشیك». حضرت بویورور: «سیز توكّول ائدنلر دئییلسیز بلكه جماعته یوكسوز».
ایمام سجّادین (ع) دوعاسینا اساساً مؤمین اینسان اؤز ایشلرینی آللاها تاپیشیرار و یاشاییش مرحله‌لرینده اونو اؤزونه دایاق بیلر. حضرت بویورور: «ائی آللاه! تكجه سنه یالواریرام و سنه اومودوم وار و تكجه سنی چاغیرب سنه پناه گتیریرم و تكجه سنه اینانیرام و سنی اؤزومه دایاق بیلیرم و سنه ایمان گتیریرم و تكجه سنه توكّول ائدیرم».