گؤز تنبللیگینی قارانلیقلا موعالیجه ائتمك اولارمی؟
یازار : میرزه عبدالصمد ملکی | بؤلوم : ساغلاملیق
+0 به یه ن
عالیملرین
دئدیگینه گؤره اولا بیلر قارانلیقدا قالماق گؤز تنبللیگینی موعالیجه ائله‌سین.
لایوساینزین وئردیگی خبره گؤره، كانادانین تورنتو دانیشگاهی‌نین موحقیقلری «موعاصیر بیولوژی» ژورنالیندا چاپ اولان تحقیق نتیجه‌لرینده دئییرلر: قارانلیغین تنبل گؤزونده اثرلی اولدوغونو پیشیك بالالاریندا گؤرسدیبلر، اوخشار نتیجه‌لری اینساندا دا اله گتیرمك اولسا، دونیادا میلیونلار نفرین گؤز تنبللیكلرینی موعالیجه ائتمك اولار.
فرقلی سببلره گؤره دونیا اهالی‌سی‌نین یوزده دؤردونون "آمبلیوپی" و یا «گؤز تنبللیگی» موشكولو وار. میثال اوچون كاتاراكت (آب موروارید) ایشیغین بیر گؤزه دوشمه‌سینه مانع اولا بیلر، نتیجه‌ده بئیین او گؤزدن گلن ایطیلاعاتین اِعمال ائتمگی دایاندیرار، بئله‌لیكله گؤزون گؤرمه‌سی ضعیفلر.
بو موحقیقلرین دئدیگینه گؤره گؤز تنبللیگینه موبتلا اولان اوشاقلاردا سالیم گؤزو باغلاییب عاریضه‌لی گؤزو ایشلمگه مجبور ائتمك اولار. آما گؤز باغلیسینی ساخلاماغا دؤرد بئش یاشلی اوشاغی قانع ائله‌مك چتین اولار و موعالیجه اولمامیش بؤیوكلرده‌ده گؤز باغلیسی باغلاماق گونلوك حیاتینی موختل ائده بیلر.
قارانلیق اوتاق
موحقیقلر نئچه پیشیك بالاسی‌نین بیر گؤزونو بیر هفته بویو باغلادیلار سونرا نئچه هفته اونلارین گؤزلرینی آچدیلار یعنی عملاً اونلاردا تنبل گؤز یاراتدیلار.
سونرا بو پیشیكلری آیری پیشیكلرله بیرلیكده زیل قارانلیق بیر اوتاقدا ساخلادیلار. 10 گوندن سونرا بو پیشیكلری قارانلیقدان چیخارتدیلار. نئچه هفته‌نین عرضینده بللی اولدو كی اونلارین گؤز تنبللیكلری موعالیجه اولوب.
بو موحقیقلر تاپدیقلارینا اساساً اعتیقادلاری وار قارانلیق پیشیكلرین گؤرمه سیستملرینی اوّلیّه حالته قایتاریر بئله‌لیكله تازادان تنظیملشمگه ایمكان تاپیر.
بو مئتودون اینسانلار اوسوتونده آزماییش اولماسیندان اوّل، گؤز تنبللیگی‌نین موعالیجه‌سی اوچون هانسی یاشدان، نه زمان قارانلیقدا قالماقلاری و قارانلیغین شیدّتی بللی اولمالیدیر.