نیفاق، خطرلی اخلاق ناخوشلوغو
یازار : میرزه عبدالصمد ملکی | بؤلوم : دین
+0 به یه ن
دونیانین تحقیرین و آخیرتین دهشتلی عذابینی تؤحفه وئرن، اخلاق ناخوشلوقلارین اَن خطرلیسی نیفاقدیر. بونا گؤره بو ناخوشلوغو تانی‌ییب كؤكونو ایچریدن قوروتمالی‌ییق. نیفاق باعیث اولار مونافیق هر گروه و صینفله دوشَنده اونلار كیمی اولسون و حتّا اونلارین عقیده و ایناملاریندان دیفاع ائله‌سین. بو وضعیتین جامیعه‌یه بؤیوك خطری وار. پیغمبر اكرم (ص) بو باره‌ده بویوروب: من اومّتیم اوچون نه مؤمیندن قورخورام نه‌ده موشریكدن، چونكی مؤمین ایمانی اثرینده مؤمین قارداشینا ضرر یئتیرمز، موشریكی‌ده آللاه شیركینه گؤره محو ائدر. من سیزین اوچون فقط سیز بیلیب عمل ائدیب اونا دایاندیقلاریزی دیلی ایله دانیشان، آییق مونافیقدن قورخورام. (1)
نیفاق اینسانین جانینا نفوذ ائله‌سه اونون دونیا و آخیرتینی یوخ ائلر. آللاه تعالا توبه سوره‌سی‌نین 28-جی آیه‌سینده مونافیقلره و كافیرلره جهنم اودونو وعده وئریب. نساء سوره‌سی‌نین 138-جی آیه‌سینده ده بویوروب: مونافیقلر بشارت وئر كی دردلی عذاب اونلاری گؤزلور. ایمام صادق‌ده (ع) بویوروب: موسلمانلارلا ایكی اوزلو ایكی دیللی اولانلار، قیامت گونو ایكی اودلی دیل ایله محشر چؤلونه داخیل اولاجاقلار. (2)
نیفاق علامتلری
- نامازی ایشتیاقسیز و كسالتینن اوخویارلار. قورآن بویورور مونافیقین علامتی اودور كی نامازا دوراندا حالسیز و كسیل اولار. (نساء 142)
- موردّد و گؤیولسوزدولر. آللاه بویورور: گؤیولسوز و موردّدیلر. نه ایمان گتیریب مؤمینلره طرف گئدیرلر نه كافیرلره طرف. (نساء 143)
- ثیباتلاری یوخدور و موقعیتلرینی دَییشیرلر. قورآن بویورور: مؤمینلرله اوز اوزه گلنده «بیز سیزینله‌ییك» دئییرلر آما شیطان و مونافیقلرله اوزلشنده «سیزینله‌ییك» دئییرلر و مؤمینلری مسخره ائدیرلر. (بقره 14)
- مونافیقلر ریا اهلی اولوب آللاه ذیكرینی آز دئیرلر. (نساء 142)
- یالتاقلیق، غیبت و پاخیللیق. ایمام باقر (ع) بویوروب: ایكی اوزلولر و ایكی دیللی‌لر پیس آدامدیلار. اینسان حضوروندا اونو تعریفلرلر و دالیسیجا غیبت ائدرلر. اونلارا كؤمك اولونسا پاخیللیق ائدرلر، فلاكته دوشنده اونلاری ترك ائدرلر. (3)
- موتمادی اولاراق پیس ایش گؤروب عوذر ایسترلر. ایمام حسین (ع) بویوروب: سونرا اوندان عوذر ایستیه‌جگین ایشدن كنار گز؛ چونكی مؤمین ایشتیباه‌دا ائله‌مز عوذر ده ایسته‌مز. مونافیق هر گون پیس ایش گؤرر و عوذر ایستر. (4)
- ناخوشدولار. قورآن بویورور: مونافیقلرین اورگینده ناخوشلوق وار. آللاه‌دا اونلارین مرضینه آرتیرار و آخیرتده یالان دانیشدیقلارینا گؤره اونلارا دهشتلی عذاب وئرر. (بقره 7)
- چوخ آند ایچرلر. مونافیقلر آللاه یولونو جماعت اوزونه باغلاماق اوچون اؤز آندلارینی قالخان ائلرلر. (منافقون 2)
- آشكاردا گوناه ائدرلر و قورخولاری اولماز. قورآن بویورور: مونافیقلر آللاهی اونودوبلار. مونافیقلر آشكار گوناه ائدن گوناهكارلاردیلار. (توبه 67)
هر كس پیس عملینه قدر موجازات اولار. آللاه عذابلاری‌نین درجه‌لری وار. عذاب بعضاً دردلی، بعضاً عظیم و بؤیوك، بعضاً تحقیر ائدیجی و بعضاً قالارگی اولار. مونافیقلری جامیعه‌ده داغیدیجی نقشلرینه گؤره عذابلاری دردلی اولاجاق. قورآن بویورور: مونافیقلر جهنمین لاپ آشاغی یئرینده‌دیلر. (نساء 145)