علاقه (فانتاستیك پووئست) 1
یازار : میرزه عبدالصمد ملکی | بؤلوم : حكایه لر
+0 به یه ن
یازار: آنار
رسول اوغلو
بو یایین ایستی‌سی بیر اؤزگه ایستی ایدی. عادتاً، ان قیزمار یای آیلاریندا بئله هاوانین یاپیشقان كیمی چیریش كئچدیگی دؤزولمز بوركو گون‌لریندن سونرا شهره قفیل دنیز كولگی هوجوم چكیردی، آچیق قالمیش پنجره‌لرین شوشه‌لرینی قیریب تؤكوردو و آداما ائله گلیردی كی، بو چیلیك-چیلیك سینیب تؤكولن ایستی‌نین، بوركونون اؤزودور. بیر نئچه گون سونرا یئنه ده هاوا‌دان اود تؤكولردی، آما آرادا قالان بو قیسا مودّتده شهر اعتبارسیز سرینلیگین لذتینی صحرا یانغی‌سیندا قارشییا چیخان قویو سویو كیمی باشینا چكیردی.
بو آوقوست باشقا آوقوست ایدی: دؤردونجو هفته ایدی كی، حرارت اؤلچه‌نین جیوه‌سی 39-40 درجه‌دن آشاغی ائنمیردی كی، ائنمیردی. هاوا شفّاف، اما بیر قدر بولاشیق هوررانی آندیریردی. بو هوررا‌دان گؤرونمز آزمان-شوشه‌اوفورن عجایب فورما‌لار دوزلتمیشدی — ائولر، آغاج‌لار، ماشین‌لار، اینسان‌لار آراسیندا قالان، كوچه‌لر، میدان، موختلیف بوشلوق‌لار — بئله عجاییب شوشه — هوررا-هاوا فورما‌لار ایدی. بیر واخت‌لار بئله بیر اویونجاق واردی: شوشه كوره، ایچینه‌ده جوربجور، رنگبرنگ چینقیل‌لار، یارپاقجیق‌لار — اصل كهریبادا حكّ اولوب قالمیش یارپاق‌لار كیمی. ایندی سما تاغی‌نین آلتیندا ایستی‌دن چابالایان شهرین دام‌لاری، قولـله‌لری‌ده سانكی شفّاف یاریم‌داییره‌نین قاتی مادّه‌سینه حكّ اولونموشدو. فابریك بورولاریندان چیخان توستولر گؤیه اوچوب گئتمیر، هاوادا اریمیردی. توستولر كئچه كیمی سمایا دؤشنیردی. بو بولانیق بوز توستو زولاغین‌دان باشقا سمانین هر طرفی آپاچیق ایدی. بیر پارچا بولود بئله گؤرونموردو. گؤی‌لرین ماوی‌سی سولموشدو. سما كیرلی پامبیق رنگیندیدی. گئجه‌لر سما تاغی قاترانی آندیریردی؛ ائله بیل قیر قازانینا بیر قوم گؤز آتمیسان، سونرا دا قازانی ترسینه چئویرمیسن — گئجه دوشنده شهر ایشیق‌لاری كؤزَرَن پاپیروس‌لارا اوخشاییردی، سون‌سوز كیرداب‌لاردان گلن اولدوز ایشیق‌لاری ایسه، سانكی بوش فضا‌دان كئچمیر، قاتی، قالین بیر مادّه‌نی دئشیب چیخیردی‌لار.
اوتوز گون ایدی جان قورتاران كولك اسمیردی كی، اسمیردی. آغاج یارپاق‌لاری، كؤو‌رك، اینجه سؤیود سالخیم‌لاری حركت‌سیز آسیلیب قالمیشدی‌لار، ائله بیل هاوانین قاتی‌لیغینا یاپیشدیریلمیشدی‌لار، شهر جیواریندا، چؤللوكده آتیلمیش كاغیذ، قزئت پارچا‌لاری دا بئله‌جه تورپاغا یاپیشیب، داها دوغروسو، میخلانیب قالمیشدی. اهتیزازسیز، ترپنیش‌سیز. آتیلمیش سیقارئت یئره میسمار كیمی دوشوردو. سونرا كیمسه اونو تاپدالاییر، ازیردی، آسفالتا حكّ ائدیردی و او زامان توتون قیریق‌لاری دا عئینی جور حركت‌سیز دونوب قالیردی.
شهرین ساكین‌لرینه ائله گلیردی كی، هامی‌سی یاواش-یاواش اری‌ییر، تره چیخیر. بیر نئچه گون، بیر نئچه ساعت دا بئله داوام ائتسه اونلار اری‌ییب آتیلمیش دوندورما كیمی قابیق پالتارلاریندان سوزوله‌رك كوچه‌لرله آخیب گئده‌جك‌لر. بو یالنیز جیسمانی بیر دویوم دئییلدی، هم ده شعورلو حیسّ ایدی. هر حالدا اؤیرنجی (بیر هفته ایدی كی، اونون اؤیرنجی آدلانماغا حقوقو واردی، بیر هفته بوندان قاباق كؤكس تپه‌سیندن آتیلیب چیخماغا حاضر اولان قلبی‌نین، سانكی ایچیندن دیشاریدا سس‌لنن دؤیونتولری آلتیندا او، آدینی اینستیتوتا قبول اولونموش‌لار سیاهی‌سیندا اوخودو) اؤزونو محض بئله حیسّ ائدیردی: ائله بیل بئینی ایستی‌نین تأثیری نتیجه‌سینده نه ایسه باشقا بیر شئیه — مایع‌می، بوخارامی چئوریلیردی. سبب یالنیز ایستی‌لرده ایدیمی؟ گؤره‌سن، نیه عؤمرون واجیب سیناقلاریندان بیری — عالی مكتبه قبول ایمتاحان‌لاری ایلین ان بوركو آیینا دوشور؟ بوتون بونلار هامی‌سی تانیمادیغی یاد جنوب شهری (او بو شهره ایلك دفعه بیر آی بوندان قاباق گلمیشدی و ایندی آزی بئش ایل بورادا یاشامالییدی)، قبول ایمتاحان‌لاری‌نین اوزوجو گرگین‌لیگی، ایستی‌لر، ایستی‌لر و نهایت بختی‌نین اوغورو — اینستیتوتا دوشمه‌سی (بو اوغور اونون دوشوندوگون‌دن ده چوخ تأثیر ائتدی اؤیرنجی‌یه)، بلی، بوتون بونلار بیرلیكده — اؤیرنجینی آیدین شعورلا درك اولونمایا‌جاق، غئیری-موعیّن، غئیری-رئال بیر حالا سالمیشدی ایندی بوتون هیجان‌لار، تلاش‌لار سوووشان‌دان سونرا، اؤیرنجی درس‌لرین باشلانماسینا قدر قالان بو مودّتده، بو قیسا بئكارلیق فاصیله‌سینده نه ائدجگینی، ندن باشلایاجاغینی بیلمیردی. هر حالدا بیر شئیی او، قطع ائتمیشدی — یاتاق‌خانادا قالمایا‌جاق. آرتیق اونون یاتاق‌خانادا قالماغا تام حقوقو واردی، اما او، حقوق‌دان هئچ وجهله ایستیفاده ائتمزدی. طبیعتاً اؤیرنجی آدامایوووشماز ایدی، اؤزونه قاپیلمیش، ایچینه چكیلمیش اینساندی و قبول ایمتاهانی زامانی اوچ نفر باشقا آبیتوریئنتله بیرلیكده یاتاق‌خانا اوتاغیندا قالماق مجبوریّتی اونو بیر داها ایناندیردی كی، آدام‌لارلا، ایللاه دا یاد آدام‌لار اولا، هئچ جور دیل تاپا، اونسیّت، اولفت باغلایا، علاقه یارادا بیلمیر. بو تشبّوث‌لر اونونچون دؤزولمز ایشگنجه‌یه چئوری‌لردی. اؤیرنجی تعجوبلنیردی كی، اوتاق‌داكی اوچ دیگر قونشوسو — اوّلجه‌دن بیر-بیرلرینی تانیماسا‌لار دا ائله ایلك گون گون‌اورتایا یاخین جور اولموشدولار — بیر-بیرلری‌نین سؤزون‌دن، سیرّین‌دن آگاه ایدی‌لر. بیر ده اؤیرنجینی مات قویان او ایدی كی، بو اوچ اوغلان بیر-بیرینه رقیب كیمی باخمیردی‌لار. حال بوكی، اونلاردان ایكی‌سی عئینی اینستیتوتون عئینی فاكولته‌سینه داخیل اولماق ایستییردی. اؤیرنجی ده سندلرینی محض او اینستیتوتون او فاكولته‌سینه تقدیم ائتمیشدی. دؤردونون آراسیندا اؤیرنجی ائله بیر او اولدو. اوغلان‌لاردان بیری ائله ایلك ایمتاحان‌لاردانجا كسیلدی. او بیری ایكی اوغلان اونون حالینا، اورك‌دن و صمیمی آجیدی‌لار، آما اؤزلری‌نین ده عاقیبتی ائله اولدو. قالان ایكی اوغلان‌دان بیری ایكینجی ایمتاحاندان، ایكینجی‌سی ایسه آخیرینجی ایمتاحاندان كسیلدی. بیر گون سونرا ایسه اؤیرنجی‌نین داخیل اولدوغو بیلیندی. آنجاق اؤیرنجی‌نین ایكی قونشوسو (بیرینجی اوغلان كسیلن كیمی یاتاق‌خانا‌دان گئتمیشدی) هئچ ده اونا حسد آپارمیر، پاخیل‌لیق ائتمیردی، عكسینه، دئییردی‌لر كی، گل بو خوش حادثه‌نی بیرلیكده قئید ائدك. اؤیرنجی بیر بهانه تاپیب بویون قاچیردی. بو آدام‌لارلا هئچ بیر علاقه یاراتماق ایسته‌میردی، فیكیرلشیردی كی، نه اونون اونلارا، نه اونلارین اونا خصوصی رغبت بسلمه‌سینه اساس یوخدور. اونلارین اوغورسوزلوق‌دان سونرا اؤزلرینی سیندیرماما‌لاری، اؤزلرینی توخ توتما‌لاری، ظارافات‌لاری، لطیفه‌لری، اؤز آرا‌لاریندا، یاتاق‌خانا‌داكی باشقا اوغلان و قیزلارلا مهریبانچی‌لیق‌لاری، اونسیت‌لری، آسان تماس‌لاری بیر نؤع اؤیرنجینی داها دا ازیردی، چونكی قیلیق‌سیزلیغینی، اولفت‌سیزلیگینی بیر داها گؤزه چارپدیریردی. اودور كی، سیناق‌دان قالیب چیخیب، بیر نفر تانیش-بیلیشی اولمایان شهرده یاشایاجاغینی بیلن كیمی، اؤیرنجی قالاجاغی یئر حاقیندا دوشونمگه باشلادی. او بورا گلمه‌میش‌دن بیلیردی كی، یاتاق‌خانادا تك قالماق ایمكانی اولمایا‌جاق، اودور كی، اؤیرنجی‌لیك حیاتینا حاضیرلاشاركن یاواش-یاواش كیچیك بیر مبلغ ییغیب حاضیرلامیشدی. مبلغ كیچیك اولسا دا، بالاجا بیر اوتاق، یا گوشه توتماغا بس ائدردی. اینستیتوتا دوشدوگونو بیلن كیمی او، آختاریشا باشلادی. اؤیرنجی بیلیردی كی، بئله آختاریش‌لاری ایكی یوللا آپارماق مومكون‌دور، یا شیفاهی شكیلده، تانیش-بیلیش‌لر واسطه‌سیله، سوراغلاشا-سوراغلاشا (اونون دا دئدیگیمیز كیمی، بورادا هئچ بیر تانیش-بیلیشی یوخ ایدی)، یا دا یازیلی، یعنی اعلان‌لار واسطه‌سیله. آللهین وئر گونو اؤیرنجی اعلان لؤوحه‌سی آسیلمیش بالاجا كوچه‌یه اوز توتوردو، بورا جوربجور آدام‌لار توپلاشاردی — ائو، منزیل، اوتاق، گوشه كیرایه وئرن‌لر، كیرایه گؤتورن‌لر، دَییشن‌لر، چئشید-چئشید دلّال‌لار و بیر ده آوارا بئكارلار. اونلار ایری لؤوحه‌نین قاباغینا ییغیشار، ال ایله، یا ماكینادا یازیلمیش، لؤوحه‌یه یاپیشدیریلمیش اعلان‌لاری اوخویار، موذاكیره، موباحیثه ائدر، چنه-بوغاز اولاردی‌لار.
دوز آلتی گون ایدی
كی، اؤیرنجی بو لؤوحه‌نین قارشی‌سینا گلیردی. هامی‌سی دا هدر. بو گون لؤوحه‌نین
قاباغیندا آدام آز ایدی، اؤیرنجی یاریم ساعتا قدر دایاندی، اعلان‌لارین هامی‌سینی
ائله‌دن بئله اوخودو و یئنه‌ده موناسیب بیر شئی تاپماییب كور-پئشمان یولا دوزلدی.
آنجاق بیر آددیم آتیب دایاندی. اؤیرنجی‌یه ائله گلدی كی، اونو چاغیردی‌لار، آدینی
چكدی‌لر. شوبهه‌سیز او یانیلمیشدی، چونكی بو شهرده اوچ نفر یاتاق‌خانا قونشوسون‌دان
باشقا هئچ كس اونون آدینی بیلمیردی. اونلار دا بو شهردن چیخیب گئتمیشدی‌لر. آنجاق غریبه‌دیر
كی، اؤیرنجی یالنیز آدینی ائشیتمه‌دی، عئینی زاماندا اونا زیللنمیش ظندلی باخیش‌لاری
دا حیسّ ائتدی. اؤیرنجی چئوریلیب باخدی: كوچه بومبوش ایدی، لؤوحه‌نین قارشی‌سیندا
آلتی نفر (اؤیرنجی تئزجه سایدی اونلاری) دایانمیشدی. اونلار دیقّتله اعلان‌لاری
اوخویوردولار. اونلاردان ایكی‌سی جیب دفترلرینی چیخاریب اعلان‌لاری اورا كؤچوردو،
هر حالدا هئچ بیری نه اؤیرنجی‌یه باخماق، نه ده اونو چاغیرماق فیكرینده دئییلدی. اؤیرنجی
آراملا كوچه‌یه گؤز گزدیردی، سونرا باشینی قالدیریب كوچه‌نین هر ایكی طرفینده
یئرلشمیش بیر و ایكی‌مرتبه‌لی ائولره باخدی. پنجره‌لری ده نظردن كئچیردی، آخی اونا
دیكیلن باخیش‌لار پنجره آرخاسین‌دان دا زیل‌لنه بیلردی. بوتون پنجره‌لر ایستی‌یه
باخمایا‌راق، یا بلكه ده ائله ایستی‌یه گؤره — كیپ باغلی ایدی. هئچ یئرده هئچ كیم
گؤرونموردو. لؤوحه قارشی‌سین‌داكی ایكی نفر لازیم بیلدیك‌لرینی جیب دفترچه‌لرینه كؤچوروب
یولا دوزلدی‌لر، اوچ نفر باشقاسی دا لؤوحه‌دن آرالانیب تینی بورولدو. گئدیش-گلیش
آز ایدی بو كوچه‌ده. آنجاق تین‌دن غئیری-عادی درجه‌ده اوزون بیر ماشین —
رئفرئژئراتور بورولدو و بوتون كوچه‌نی — تین‌دن-تینه توتدو. بو ماشین نه ایسه یئر
اوزونده چوخ‌دان محو اولوب ایتمیش قدیم حئیوان‌لاری — كرتنكه‌له‌نین نهنگ اجدادینی
خاطیرلادیردی. محض ائله كرتنكه‌له كیمی، نهنگ، ایلان كیمی قیوریلا‌راق تینی
بورولدو، بیر آزدان قویروغو دا چكیلیب گؤزدن ایتدی. و آنجاق، بوندان سونرا اؤیرنجی
لؤوحه قارشی‌سیندا قالمیش یئگانه آداما — گؤی كؤینك‌لی، هوندور اوغلانا دقت
یئتیردی. بو، اؤیرنجی‌نین اوتاق قونشولاریندان بیری — همین او ایلك ایمتاحاندان
كسیلن اوغلان ایدی. اؤیرنجی‌یه ائله گلیردی كی، اوغلان بو شهردن چیخیب گئتمیش‌دیر.
اونلارین چارپایی‌لاری یان-یانا ایدی: اوغلانین غریبه شاكری واردی — گئجه یوخودا
كیمینله‌سه بركدن موباحیثه ائدر، قیزیشیب قیشقیرار، سؤیردی، هر حالدا اؤیرنجی‌نین
اونونلا گؤروشمگه، دایانیب كلمه كسمگه هئچ بیر هو‌سی یوخ ایدی. آما اوغلان
چئوریلیب اؤیرنجی‌یه طرف آددیملادی. غریبه‌دیر. گولومسه‌ین اوغلان — اؤیرنجی‌یه
ائله گلیردی كی، اوغلان محض اونا گولومسونور — یاخینلاشاركن اؤیرنجی گؤردو كی، بو
هئچ ده همین اوغلان — اونون یاتاق‌خانا قونشوسو دئییل. دوزدور بیر قدر اونا سویو
چكیر، آما هر حالدا او دئییل و طبیعی كی، هئچ گولومسونوب ائلمیردی ده، اؤیرنجی‌نین
یانین‌دان دا یاد آدام كیمی ساكیتجه كئچیب گئتدی. آما بو آنین گله‌جكده جریان ائده‌جك
ایشلر اوچون موعیّن اهمیتی اولدو: چونكی محض بوندان سونرا ائله بیل كیمسه اؤیرنجی‌یه
دئدی كی، لؤوحه‌یه بیر ده یاناش، اعلان‌لاری بیر ده گؤزدن كئچیر. اؤیرنجی اعلان‌لاری
بؤیوك دیقّتله باشدان-آخیراجان اوخوموشدوسا دا، هر حالدا، غریبه بیر داخیلی تكانین
نتیجه‌سینده یئنی‌دن لؤوحه‌نین قارشی‌سینا قاییتدی و اعلان‌لاری بیر-بیر یئنی‌دن
اوخوماغا باشلادی. اؤیرنجی بو ایشی سون درجه بؤیوك بیر واسواسی‌لیقلا ایجرا
ائدیردی. حال بوكی، بیلیردی — اعلان‌لاری ایندیجه اوخویوب، موناسیب بیر ایش یوخدور
و اونلاری یئنی‌دن — ایكینجی دفعه اوخوماق معنا‌سیز ایشدیر. بیردن عئینی زاماندا
او هم كیمینسه باخیشینی حیسّ ائتدی، هم ده سس ائشیتدی. سس چوخ گومراه و نیكبین
ایدی، هم ده اؤیرنجی‌یه چوخ تانیش گلیردی
بیرینجی بؤلومون سونو