علاقه (فانتاستیك پووئست) 2
یازار : میرزه عبدالصمد ملکی | بؤلوم : حكایه لر
+0 به یه ن
علاقه (فانتاستیك پووئست) 2
یازار: آنار
رسول اوغلو
***
— اؤیرنجی‌یه عشق اولسون! ایشلر نئجه‌دیر؟
اؤیرنجی چئوریلیب باخدی و ماتی-قوتو قورودو قارشی‌سیندا همین اوغلان — كسیلیب گئتمیش یاتاق‌خانا قونشوسو دایانمیشدی. او، یاشیل كؤینكده ایدی و اؤیرنجی‌یه باخیب گولومسونوردو. اؤیرنجینی تعجوبلندیرن او دئییلدی كی، جمعی‌سی اوچجه نفری تانیدیغی بئله بؤیوك شهرده محض بو اوچ نفردن بیری‌سی راستینا چیخیب. اؤیرنجی اونا مات قالمیشدی كی، ایكیجه دقیقه بوندان قاباق باشقا بیر آدامی محض بو اوغلانا اوخشاتمیشدی و درحال دا اوغلانین اؤزو تینی بورولوب اونون قاباغینا چیخمیشدی. اؤیرنجی «تئلئپاتیادیر» دئیه دوشوندو. اوّل‌لر ده اونون باشینا بئله تصادوف‌لر گلردی: كیمین باره‌سینده‌سه دوشونور، یا كیمیسه كیمه‌سه اوخشادیردی و بیر نئچه دقیقه‌دن سونرا ان گؤزلنیلمز یئرده و ان آغلا سیغماز بیر شراییطده همین آداما — حاقّیندا دوشوندوگو و یا كیمیسه اوخشاتدیغی آداما راست گلردی. بئله تصادوف‌لری «تئلئپاتیا» دئیه موعیّنلشدیرمیش و اونلارین سیرّی اؤیرنجی‌یه بیردفعه‌لیك ایضاح اولونموشدو. باشقا بیر غریبه‌لیك ده واردی، آما او دا اؤیرنجی اوچون ایضاح اولونماز سیرّ دئییلدی؛ گؤرورسن، بعضاً او تانیمادیغی بیر شهره یا بیر طبیعت گوشه‌سینه دوشوردو و قطعی بیلیردی كی، هئچ بیر زامان — هئچ كؤرپه‌لیكده ده بو یئرده اولماییب، لاكین ندنسه گؤردوك‌لری اونا چوخ تانیش گلیردی. یاخود هئچ بیر واخت یئمه‌دیگی بیر خؤرگین، هئچ بیر واخت گؤرمدیگی بیر مئیوه‌نین دادینی ایلك دفعه دویاركن بعضاً اونا ائله گلیردی كی، بو طعم، بو داد اونا یاخشی تانیش‌دیر. هارا‌دان؟ بونون سبب‌لرینی تعیین ائده بیلمیر و اذیّت چكیردی. سبب‌لرین تاپا بیلمه‌دیگی اوچون یوخ، حادیثه‌نین اؤزونون غریبه‌لیگی اونون دوشونجه‌لرینی مشغول ائدیردی. نهایت، بیر گون اؤیرنجی هاراداسا اوخودو كی، ایرثیِّت ژِن‌لری‌نین اؤز یادداشی وار، نسیل‌دن-نسله كئچن یادداشی. بو یادداش هم ده بعضاً بیرباشا، موستقیم خطله دئییل، دیو كانال اوزره — هانسی اولو خالا‌دانسا، اولو عمی‌دنسه كئچیب گلیر. بونو اوخویان كیمی اؤیرنجی ساكیت اولدو. غئیری-رئال و غئیری-مومكون تصادوف‌لرین غریبه سیرّی داها اونون دوشونجه‌لرینی یورموردو.
كوچه یئنه‌ده بومبوش، آدا‌مسیز ایدی. سابیق اوتاق قونشوسو سلام وئریب اؤتدو، بلكه‌ده آیاق ساخلاییب گؤروشر، دانیشاردی، آما تله‌سه‌نین قاراقاباق، قیلیق‌سیز آدام اولدوغونو خاطیرلاییب گئتدی.
اؤیرنجی یئنی‌دن لؤوحه‌یه طرف چئوریلدی و بیردن-بیره آشاغیدا ایندی‌یه قدر ندنسه گؤزدن قاچیردیغی بیر اعلانی گؤردو. اعلان چوخ ایری ایدی. «نئجه اولوب كی، من بو بویدا اعلانی گؤزدن قاچیرمیشام؟» — دئیه تعجوبلندی. — هم ده اعلانین ائله بیر خصوصیّتی واردی كی، درحال اونو نظره چارپدیرما‌لی ایدی. ماكینادا چاپ اولونموشدو، آما نوت كاغیذی‌نین اوستونده: بئش پارالئل نوت خطی، اوستونده ده حرف‌لر. هله نوت خطی‌نین باشیندا كامان و باس آچارلاری دا چكیلمیشدی.
اعلاندا گؤستریلن‌لر اؤیرنجی‌نین دوز بیر هفته‌دیر سوراغیندا اولدوغو شئی‌لر ایدی: تك اوتاق كیرایه وئریلیر: پنجره‌لری دنیزه. بوتون راحات‌لیق‌لاری وار. تیلیفون، ائیوان، لیفت، 20-جی مرتبه‌ده. «مگر بو شهرده. 20 مرتبه‌لی بینا وار؟» دئیه اؤیرنجی دوشوندو، او، شهره پیس بلد ایدی. «مادام كی، 20-جی مرتبه‌ده‌كی اوتاق كیرایه وئریلیر، دئمه‌لی، ایگیرمی مرتبه‌لی بینا دا وار». ان غریبه‌سی ایسه ایستنیلن مبلغ ایدی. مبلغ، او قدر كیچیك ایدی، هئچ اینانماق اولموردو. ائله بیل اونون رئال یوخ، رمزی اهمیتی واردی. بو اؤیرنجینی هر شئیدن آرتیق شوبهه‌لندیردی. آخی آختاردیغینی تاپاندا و تاپدیغی‌نین محض سن آختاردیغین اولدوغونو گؤرنده بیر قدر شوبهه‌لنیرسن. مومكونمودور؟ بئله خوش تصادوف اولا بیلرمی؟ اگر اؤیرنجی گئجیكسه‌یدی و معلوم اولسایدی كی، بیر گون، یا بیر ساعت بوندان قاباق كیمسه اونو قاباقلاییب، گؤزل واریانت الدن چیخیب، او زامان بو سعادت، دوغرودان‌دا ایتیریلمیش حقیقت اولاردی. هر حالدا تلسمك لازیم‌دیر، بیرجه دقیقه‌ده یوبانماما‌لی! او، عنوانی یازدی.
****
اعلاندا گؤستریلمیش كوچه، شهرین كؤهنه حیصه‌سینده ایدی. گئج-تئز سؤكوله‌جك بیرمرتبه‌لی ائولر، اَیری-اویرو دار كوچه‌لر، بو كوچه‌لری باسمیش غئیری-موعیّن آخینتی‌لار، داعوا‌لی، تویلو، یاسلی حَیَطلر...
بئله ظالیم زارافات نییه گركدیر؟ مگر بو اعلان‌لارا نظارت ائدن-زاد یوخ‌دور كی، كیم آغلینا نه گلسه یازیب لؤوحه‌یه وورور؟ نییه آدام دولاماغا بو جور ایمكان یارادیلیر؟ 20-جی مرتبه! بو دا سنین ایگیرمینجی مرتبه‌ن. بئله دوشونه-دوشونه اؤیرنجی بیرمرتبه‌لی ائولره گؤز گزدیریردی: باخ، بوتون بو كوما‌لاری یان-یانا یوخ، اوست-اوسته دوزسن اوندا دوغرودان دا ایگیرمی نه‌دیر، لاپ یوز مرتبه‌لی بینا اولار! آما بئله دوشونمه‌سینه باخمایا‌راق اؤیرنجی‌نین گؤزلری یئنه‌ده 17-ی رقمینی آختاریردی: اعلاندا بو نؤمره گؤستریلمیشدی. نهایت، اؤیرنجی رقمی گؤردو، همین رقم گؤی‌د‌لن بینانین دئییل، ایكی مرتبه‌لی مول-گون اوستونده وورولموشدوسا دا، اؤیرنجی ندنسه درحال آرخایین‌لاشدی. بو آن اونا دوغرودان دا ائله گلدی كی، اعلاندا یازیلان‌لار ظارافات دئییل، گئرچك‌دیر. ائو كوچه‌نین او بیری طرفینده ایدی. اؤیرنجی كوچه‌نی كئچیب 17 نؤمره‌لی ائوین قارشی‌سیندا دایاندی. قاپی‌دان ایری بیر قیفیل آسیلمیشدی. ایكینجی مرتبه‌ده بالاجا تاختا بالكون واردی. اوتاقدان اورا چیخان قاپی بیر قدر آچیق ایدی و اورا‌دان قارا تول پرده‌نین اوجو چیخمیشدی. ائیواندا گیل قاب‌لاردا غئیری-موعیّن رنگ‌لی سوست بیتكی‌لر واردی، گؤرونور، اونلارا چوخدان سو وئرن اولمامیشدی. حركتی‌نین بوتون معنا‌سیزلیغینی درك ائده-ائده اؤیرنجی ایكی دفعه قاپینی دؤیدو، سونرا چئوریلیب گئتمك ایسته‌دی. آما ائله بو واخت قونشو داروازا آچیلدی، اورا‌دان اورتا یاشلی بیر قادی‌نین باشی گؤروندو و قادین آجیقلی بیر ادایلا:
—كیمی ایستییرسیز؟ — دئیه خبر آلدی.
اؤیرنجی بیلمه‌دی نه جاواب وئرسین، آخی اعلاندا فامیلیا یازیلمامیشدی.
—من اعلانا گؤره گلمیشم، — دئدی، — بو كوچه، بو ائو، نؤمره‌سی...
قادین داها دا برك حیرصلندی:
—بوردا چوخدان هئچ كس یاشامیر، — دئدی و داروازاسینی اؤرتدو. آنجاق اؤیرنجی‌یه ائله گلدی كی، قادین داروازانین آردیندان چكیلمه‌ییب، دایانیب دئشیك‌دن اونو ایزله‌ییر.
اونو چاغیردیلار، اؤیرنجی لاپ آیدین ائشیتدی كی، محض اونو سسله‌دی‌لر، آما آدینی چكدیلرمی، یوخمو — بونو دقیق دئیه بیلمزدی. هر حالدا اونا موراجعت ائدیردی‌لر. «آه» قدر قیسا بیر نیدایلا اونو هایلادی‌لار، اؤیرنجی چئوریلدی و دوغرودان دا ایكینجی مرتبه‌ده ائیوانا آچیلان قاپی‌نین آردیندا قوجا بیر قارینی، داها دوغروسو، قادی‌نین گوجله سئزیلن سیلوُئتینی (شبحینی)، كؤلگه‌سینی گؤردو. اؤیرنجی‌یه، حتی ائله گلدی كی، اونا ال ائله‌دی‌لر، ایشاره وئردی‌لر، آما بونون بئله اولوب-اولمادیغینی قطعی دئیه بیلمزدی. هر حالدا اؤیرنجی قیفیل‌لی قاپی‌یا یاناشدی و ائیوانین دوز آلتیندا دایاندی. گؤرونور، دوغرودان دا اونو چاغیرمیشدی‌لار، چونكی هاراداسا، لاپ یاخیندا دانیشیق ائشیدیلدی، نه باره‌ده‌سه قیزغین موباحیثه ائدیردی‌لر: اؤیرنجی بیرجه كلمه سؤزو ده سئچه بیلمیردی، آما موباحیثه‌نین گرگین‌لیگینی آنلاییردی. سونرا بایاقكی داروازا آچیلدی، اورتا یاشلی قادین چیخدی. ایندی اونون یانیندا بالاجا یاش بیر قیز دا واردی. اونلار دینمز-سؤیله‌مز 17 نؤمره‌لی ائوین قاپی‌سینا یاناشدیلار، قادین خالاتی‌نین جیبیندن بیر دسته آچار چیخارتدی و قیفیلی آچدی. او یئنه ده اوّلكی كیمی آجیقلی ایدی و چوخ قابا بیر طرزده اؤیرنجی‌یه:
—یوخاریدا‌دیر، — دئدی — پیلّه‌كنله قالخ.
سونرا كوبود شكیلده قیزین بئلیندن یاپیشدی، بوینونا بیر قاپاز ووردو، قولتوغونون آراسینا آلیب آپاردی، داروازا‌دان ایچری گیردی. قیز بركدن آغلاماغا باشلادی. قادین اونا بیر قاپاز دا ووروب داروازانی چیرپدی، كیلیدله‌دی.
اؤیرنجی دار، قارانلیق، پیشیك ایگی وئرن پیلّه‌لرله ایكینجی مرتبه‌یه قالخدی. پیلّه‌لر ایكینجی مرتبه‌ده قورتاریردی و بورادا یئگانه بیر قاپی واردی — هر طرفینه بنؤوشه‌یی موركّب چیلدیرلامیش كؤهنه قاپی،
—گلین، — بو سس ایچریدن ائشیدیلدی، شوبهه‌سیز ایندیجه ائیوان قاپی‌سیندان باخان قاری‌نین سسی ایدی.
اؤیرنجی داخیل اولدو. اوتاق چوخ باخیمسیز و باسیریق بیر شكیلده ایدی، نیمداش، ایشلنیب ایثبات‌دان چیخمیش شئیلرله دوپ-دولو ایدی. اوتاقدان قوجا‌لیق و ایقتیدارسیزلیق قوخوسو گلیردی، كؤهنه دیوانین اوزو سوزولوب تؤكولموشدو، جیریقلاریندان پروژین‌لرین سیوری اوجلاری چیخیردی. عجاییب بوروملو آیاقلارا مالیك اولان هوندور، آرخا‌لی كورسولر ده بئله‌جه كؤهنه، الدن دوشموش ایدی. اوتاقدا چوخلو ایری یؤندمسیز ایشكاف واردی. ائله بیل اونلارین رنگ-روفو قوجالیقلاریندان توتولموش، توندلشمیش، قارالمیشدی. تاواندان ایری و توزلو آباژور آسیلمیشدی. اونون قوتازلارینی هؤرومچك تورو بوروموشدو. دیوارلاردا چوخلو میسمار واردی. بو میسمارلار موختلیف سویّه‌لرده وورولموشدولار — هوندور یئردن وورولانی دا واردی و ائله آشاغیدا وورولان‌لاری دا واردی كی، بو سویّه‌ده شوبهه‌سیز، اونلاردان بیر شئی آسماق مومكون دئییلدی. بوتون بونلار عجاییب-غرایب تصّوورات اویادیردی. آما بو عجاییب‌لیكدن باشقا اوتاق هم ده نه ایسه فاجیعوی بیر اؤوقات اویادیردی. بئله اؤوقات نه‌دن دوغوردو، اؤیرنجی دقیق تعیین ائده بیلمه‌میشدی، آما بو دویومو چوخ آیدین حیسّ ائدیردی. اوتاغا نظر سالان كیمی نه‌دنسه اوندا آنلاشیلماز بیر ایستك — تئز، بیر آن بئله یوبانما‌دان بورا‌دان — بو اوتاقدان، بو ائودن، بو كوچه‌دن قاچیب قورتارماق ایستگی اویاندی. سس ائشیتدی:
—نه لازیم‌دیر سیزه؟ — كونجده، هوندور كورسونون ایچینه چؤكوب قالمیش قارینی گؤردو. ایستی‌یه باخمایا‌راق اوتاغین بوتون پنجره‌لری كیپ باغلی ایدی، قاری دا بوغازیناجان دویمه‌لی اوزون قارا پالتار گئیمیشدی، هله اوستوندن چیگنینه قارا یون شال دا سالمیشدی. نه‌دنسه اؤیرنجی‌یه ائله گلدی كی، قاری ایفلیج‌دیر، حركت‌سیزدیر. قاری‌نین صیفتیندن اونون اصل-نجابتلی آدام اولدوغو سئزیلیردی و فانتازیانی بیر آز ایشلتسن اونو چوخ ایللر بوندان قاباق، اوزاق گنجلیگینده گؤزل وارلیق كیمی خیالدا جانلاندیرماق مومكون ایدی. آما ایندی بو اؤتوب گئتمیش گؤزل‌لیك اونو صیفتی‌نین و بدنی‌نین بوتون گوشه‌لریندن آمان‌سیزجاسینا قووولموشدو و یالنیز بیرجه یئرده — گؤزلری‌نین دیبسیز كدرینده ایلیشیب قالمیش، اؤزونه اورادا سون مسكن تاپمیشدی. گؤزل زیل قارا گؤزلری‌نین كدرینده نه ایسه بیر مشوملوق (شوملوق) دا واردی.
—من اعلانا گؤره گلمیشم. دئیه‌سن، سهو ائتمیشم.
—سهو؟ — دئیه قاری تكرار ائتدی. — یوخ، بو اعلانی من وئرمیشم. سیزه اوتاق لازیم‌دیر؟
اؤیرنجی:
—بلی، — دئدی، — آما اورادا صؤحبت 20-جی مرتبه‌دن گئدیر و یازیلیب كی... — او، سؤزونو یاریمچیق قویوب سوسدو. اگر اعلانی بو قاری وئریبسه، اوردا یازیلان‌لاری اونون اؤزونه صادالاماغا نه حاجت؟ هر حالدا اؤز یازدیق‌لارینی بیلیر . . .
ایكینجی بؤلومون سونو