علاقه (فانتاستیك پووئست) 3
یازار : میرزه عبدالصمد ملکی | بؤلوم : حكایه لر
+0 به یه ن
علاقه (فانتاستیك پووئست) 3
یازار: آنار
رسول اوغلو
***
قاری:
—بلی، — دئدی و اؤسكورمگه باشلادی، بو پاپیروسا آلوده اولموش آدامین اوزون سورن قورو اؤسكورگی ایدی.— اؤیرنجی اوتاغین موختلیف یئرلرین‌ده‌كی ایچی كؤتوك‌لرله دولو كولقابی‌لارا و بوش پاپیروس قوتولارینا فیكیر وئرمیشدی.
بیر قدر ساكیت اولدوقدان سونرا قاری:
—بلی، — دئدی — 20-جی مرتبه‌ده‌دیر اوتاق — و یئنه ده سوسوب درین خیالا گئتدی، دوشونجه‌لر عالمینه قرق اولدو.
اؤیرنجی بیر داها اوتاغا گؤز گزدیردی و باشا دوشدو كی، موصیبت، فاجعه تأثوراتی ندن دوغور — اوتاقداكی شوشه‌لی ایشكاف‌لار، دولاب‌لار، كیچیك تیلویزیون ائكرانی، بدن‌نوما گوزگو و حتّا كفكیرلی ایری دیوار ساعتی‌نین اوست‌لرینه اؤرتوك‌لر آتیلمیشدی. عادتاً ائوده مئییت وارسا و یاخود مئییت باسدیریلاندان سونرا قیرخ یاس گونو بئله ائدیلیر. قدیم عادته گؤره گوزگولرین، شوشه‌لرین اوزو اؤرتولور، سون واخت‌لار تیلویزیون ائكرانینی‌دا اؤرتورلر، آما اوستونه پارچا سالینمیش ساعتی اؤیرنجی ایلك دفعه گؤروردو. دوزدور بعضاً ساعتی ساخلاییرلار، وفات ائتمیش آدامین كئچیندیگی دقیقه اوزرینده دایاندیریرلار. آما بو اؤرتوكلو ساعت دایانمامیشدی، ایشله‌ییردی، اؤیرنجی بونو اؤرتوگون آلتیندا گئدیب-گلن كؤلگه‌دن-كفكیرین حركتیندن آنلامیشدی. ساعتین خفیف چیق-چیقی دا ائشیدیلیردی و حتی زنگی‌ده چالدی — آهنگدار صدا‌لار اون ایكی دفعه سسلندی — دئمه‌لی، گونورتا واختی ایدی.
دیوارلاردا چوخلو فوتو شكیل واردی. اونلارین چوخو اوتوز-قیرخ ایل بوندان قاباغین شكیل‌لری ایدی. شكیل‌لر هامیسی عئینی بویدادی. ندنسه اؤیرنجی‌نین آغلینا گلدی كی، بو آدام‌لاردان هئچ بیری ایندی ساغ دئییل. بعضاً فوتوشكیل‌لر آنلاشیلماز بیر سیرله تصویرینی ساخلادیغی آدامین دیری اولوب-اولماماسینی بوروزه وئریر. فوتولاردان یالنیز بیری باشقا اؤلچوده — دیگرلریندن چوخ ایری ایدی. بو شكیلده اورتا یاشلی، چاتما قاشلی، قارا بیغلی بیر كیشی عكس اولونموشدو، اونون گئن یاخا‌لی پئنجَیی و بیررنگ كراواتی واردی. كیشی‌نین گرگین باخیشی پاسپورت شكیل‌لرینی یادا سالیردی. آما اگر بو دوغرودان دا پاسپورت اوچون چكیلمیش شكیل ایدیسه، اوندا آزی یوز دفعه بؤیودولموشدو. فوتو توند رنگلی چرچیوه‌ده ایدی. بلكه ده چرچیوه‌نین رنگی تصادوفاً بئله ایدی، آما هر حالدا او، ماتم حاشیه‌سینه ده اوخشاییردی.
اؤیرنجی بو شكلین سئیرینه دالدی و دویدو كی، قاری‌دا اونون اؤزونو اوزون-اوزادی سئیر ائدیر. اؤیرنجی دوشوندو كی، قاری بیر داها اونونلا دانیشمایا‌جاق، آنچاق قاری غفیلدن دئدی:
—شهرین او بیری طرفینده، دنیز قیراغیندا 20 مرتبه‌لی ائو وار. اوتاق اوردا‌دیر، آخیرینجی مرتبه‌ده. بو منیم اوغلومون اوتاغی‌دیر — قاری دریندن كؤكسونو اؤتوردو. — داها اوتاق اونا لازیم دئییل. من بو اوتاغی كیرایه وئرمك ایسته‌ییرم... موعیّن مبلغه... — قاری سوسدو، سونرا یئنیدن داوام ائتدی. — بو اونون دا آرزوسودور. — قاری بو سؤزلری دئییب سون‌سوز كدرله باخیش‌لارینی همین كیشی‌نین شكلینه زیلله‌دی.
طبیعی كی، قاری «اوغلوم» دئینده اونو نظرده توتوردو. بو شكلی، اونون قارا حاشیه‌سینی قاری‌نین سؤزلریله، كدری ایله، آهی ایله، بوشالمیش، اونا گؤره‌ده آرتیق گرك اولمایان و اونا گؤره‌ده كیرایه وئریلن اوتاقلا توتوشدوراندا علاوه ایضاحا احتیاج قالمیردی. — هر شئی آیدین ایدی. قارینی بو باره‌ده سورغو-سوالا توتماق قانا‌جاق‌سیزلیق اولاردی. گؤرونور، یارا‌لار دا لاپ تزه ایدی، یقین آرواد اوغلونو لاپ بو یاخینلاردا ایتیرمیشدی — گوزگولر، شوشه‌لر هله ده اؤرتوك آلتیندا ایدی. اؤیرنجی بیرجه اونو دئدی كی، اوتاغا باخماق ایسته‌ییر.
قاری تلسیك:
—البتّه، — دئدی و غئیری-عادی بیر چئویك‌لیكله یئریندن سیچرادی. اؤیرنجی‌یه ائله گلدی كی، قاری اونونلا بیر یئرده ائوه باخماق اوچون گئتمگه حاضیرلاشیر. آما اونو ایفلیج بیلنده یانیلدیغی كیمی، ایندی ده قاری‌نین حركتینی دوز یوزمامیشدی. قاری، سانكی اؤیرنجی‌نین بوردا اولدوغونو بوسبوتون اونوتموشدو. او، اؤیرنجی‌نین قارشی‌سیندان كئچیب دیوار ساعتینا یاناشدی، اؤرتوگو چكدی، ساعته باخدی، یئنیدن اؤرتوگو سالدی و بو سفر تلسمه‌دن، آراملا اؤز یئرینه قاییتدی، كورسوسونه چؤكدو، گؤزلرینی یومدو. نه قدر واخت كئچدی؟ بیر دقیقه، یاریم ساعت، بیر ساعت؟ سونرا‌لار، قاری‌نین ائویندن چیخاندان سونرا اؤیرنجی ائله هئی بو باره‌ده دوشونوردو، آما یادداشینی نه قدر الك-ولك ائله‌سه ده، موعیّن‌لشدیره بیلمیردی كی، قاری‌نین ساعته طرف گئدیب-گلمسیله كورسوسونه چؤكوب مورگولمه‌سی آراسیندا نه قدر واخت كئچیب. دیوار ساعتی‌نین گون‌اورتانی وورماسینی — اون ایكی زنگ چالماسینی اؤیرنجی آیدین خاطیرلاییردی. قاری‌نین ائویندن چیخاندا دا قول ساعتینا باخدی — ایكی‌یه اون بئش دقیقه ایشلمیشدی. آما بو ایكی زامان نوقطه‌سی‌نین آراسینداكی مودّت هئچ جور اونون شعورونا سیغیشمیردی. بو مودّتده نه اولموشدو؟ بیر-ایكی كلمه سؤز، قاری‌نین ساعته طرف گئدیب گلمه‌سی و كورسوده مورگو دؤیمه‌سی. یعنی او بیر ساعت مورگوله‌ییب؟ تعجوب‌لو بیر شئی یوخدور، قاری بیر ساعت یوخ، بوتون گونو ده یاتا بیلردی، آما آخی بس اؤیرنجی اؤزو بوتون بو واخت عرضینده نئیلمیشدن — دوروب قاری‌نین كئشیگینیمی چكیردی، اوتاغی، فوتولاری نظردنمی كئچیریردی، آروادین اویانماسینی‌می گؤزلییردی؟ بلكه، بوتون بونلار بئله ایدی، اولموشدو، آما اؤیرنجی‌نین تصوّورونده بو ایشلرین هامیسی چوخ آز بیر واختین عرضینده جریان ائتمیشدی. هر حالدا بیر ساعت اولمازدی. قاری، دوغرودان دا مورگوله‌دی، آما — اؤیرنجی‌نین ظنّینجه — درحال دا اویاندی. ایندی ایسه بئله معلوم اولور كی، آزی بیر ساعت كئچیب. اویاندی و ساكیتجه دئدی:
—ایگیرمی مرتبه‌لی ائو. اوردا جمعی‌سی بیرجه دنه بئله هوندور بینا وار. آلتیندا دا چؤرك دوكانی. دوز ساعت آلتیدا اورا گلین. من سیزی اوردا گؤزله‌یه‌جگم. عونوانی یازین.
او، عونوانی آراملا دیكته ائتدی و اؤیرنجی یازان مودتده یئنیدن یوخویا گئتدی.
اؤیرنجی ویداعلاشما‌دان چیخدی. كوچه‌ده قول ساعتینه باخدی. معلوم اولدو كی، قاری‌نین اوتاغیندا ساعت یاریما یاخین اولوب.
***
ایگیرمی مرتبه‌لی بینا شهرین لاپ كناریندا ایدی. داها دوغروسو، بورادا شهر قورتاریر و چؤل-بیابان باشلانیردی. بو بینا بومبوش چؤلـله دنیز ساحلی‌نین آراسیندا، غریبه بیر تنها‌لیق ایچینده اوجالیردی. اطرافیندا بیر نئچه تپه‌جیك واردی و بو تپه‌جیك‌لرین اوستونده ایكی-اوچ مرتبه‌لی ائولر تیكیلمیشدی، آما ایگیرمی مرتبه‌لی گؤی‌د‌لنله موقاییسه‌ده اونلار بالاجا داخما‌لارا بنزییردی.
تاكسی سوروجوسو بو عونوانا آپارماغا هئچ جور راضیلاشمیردی. جوربجور بهانه‌لر گتیریردی:
—پاركا گئدیرم... نؤوبم قورتاریب... یولومون سمتی دئییل. اوزاق‌دیر... — و س. آخیردا بئله بیر شئی ده دئدی: — عمومیّتله او طر‌لر...
اؤیرنجی باشا دوشمه‌دی:
—نه‌دیر كی، او طرفلر؟
سوروجو دیلینی سورودو:
—یوخ، یعنی دئییرم... — سونرا غفیلدن راضی‌لاشدی: — یاخشی، گئدك.
یول بویو هئچ بیریسی — نه سوروجو، نه اؤیرنجی كلمه كسمه‌دیلر.
سوروجو:
—بو دا سنین بینان، — دئدی.
اونلار تزه، گؤرونور، لاپ بو یاخینلاردا ایستیثمارا وئریلمیش بینانین یانینا چاتمیشدی‌لار. سوروجو دوز چؤرك دوكانی‌نین قارشی‌سیندا ساخلادی.
اؤیرنجی حقّینی وئریب چیخدی. سوروجو، اؤیرنجی‌نین ظنّینجه حدّن زیاده تلسیك‌لیكله ماشینی دؤندردی و اوزاقلاشیب گؤزدن ایتدی. اطرافدا اینس‌جینس یوخ ایدی. قو دئسن قولاق توتولاردی. آما سكی‌نین یانیندا خئیلی ماشین دایانمیشدی، هامیسی دا اؤرتوك آلتیندا ایدی. چؤرك دوكانی باغلی ایدی. قاری‌نین بورا گلیب چیخاجاغینا اؤیرنجی‌نین گومانی آزدی: قوجا، خسته آروادین بئله بؤیوك بیر مسافه‌نی قطع ائدیب بورا گلجگینه اینانماق چتیندی و عمومیتله، بوتون بو ایشلردن اؤیرنجی‌نین هئچ گؤزو سو ایچمیردی. آما بینا، دوغرودان-دوغرویا واردی، اؤزو ده محض ایگیرمی مرتبه‌لی ایدی. اؤیرنجی مرتبه‌لری بیر-بیر ساییب آخیرینجی‌سینا چاتمیشدی كی، قاری‌نین سسینی ائشیتدی:
—اخی بیز دوز آلتی‌یا دانیشمیشدیق.
قاری هاردان پئیدا اولدو؟ اؤیرنجی نه آیاق سسی ائشیتمیشدی نه ماشین سسی، بورادا دوشنده قاریدان اثر-علامت یوخ ایدی. آما هر حالدا ایندی آرواد بورادایدی، دوز چؤرك دوكانی‌نین قاباغیندا دایانمیشدی. بایاقكی قارا پالتاردا، چینینده ده یون شال.
اؤیرنجی:
—باغیشلایین، — دئدی. — تقصیر تاكسی‌لرده‌دیر. ندنسه هئچ بیری بورا گلمك ایستمیر. اودور كی، من بئش دقیقه گئجیكدیم.
قاری جاواب وئرمه‌دی، اوزونو بینایا طرف چئویریب دئدی:
—گئدك.
بینانین گیریش قاپیسینا طرف آددیملادی. اؤیرنجی اونون آردینجا دوشدو. بینانین ایچینه گیردی‌لر. قاری لیفتین (آسانسور) دویمه‌سینی باسدی. لیفت، گؤرونور، چوخ اوزاق‌لاردان، داها دوغروسو، چوخ هوندورلردن ائنیردی و چوخ آغیر-آغیر گلیردی.
نهایت گلیب چیخدی، دایاندی، قاپیلاری تایباتای آچیلدی. اونلار كابینه‌یه داخیل اولدولار. كابینه اؤیرنجی‌یه غئیری-عادی گؤروندو. نه‌یه گؤره؟ قاری 20-جی مرتبه‌نین دویمه‌سینی باسدی. لیفت آراملا یوخاری دیرمانماغا باشلادی، هاراداسا یولون اورتاسیندا اؤیرنجی یئنیدن بو كابینه‌ده‌كی غریبه‌لیگی دویدو، آما بو غریبه‌لیگین محض نه‌دن عیبارت اولدوغونو یئنه ده تعیین ائده بیلمه‌دی. او، قاری حقینده دوشونمگه باشلادی و اؤز-اؤزونه فیكیرلشدی: گؤره‌سن، بو آرواد عؤمرونده هئچ بیر دفعه گولومسونوب؟ بو نه بوش سؤزدور. البته كی، گولومسونوب. ایندی ایسه، آیدین مسأله‌دیر، درد-غم باسیب اونو، ظارافات دئییل، داغ بویدا اوغلونو ایتیریب، بئله ایتكیدن سونرا نه گولوش-فیلان؟ آما ایش اوندا‌دیر كی، قاری‌نین صیفت جیزگیلری اونون عموماً گولوشه قابیل اولماسینا شوبهه اویادیردی. هئچ بیر واختدا، هئچ بیر شرایطده، هئچ بیر وجهله بئله صیفتین تبسّومونو تصوّور ائله‌مك اولموردو! بیر آن، بیرجه آن اؤیرنجی‌یه ائله گلدی كی، او كابینه‌نین غریبه‌لیگی‌نین محض نه‌دن عبارت اولدوغونو تاپیب و همین آنداجا بو ایختیراع شعوردان سیلینیب گئتدی؛ بو باره‌ده اطرافلی دوشونمگه ماجال تاپمادی: لیفت برك سیلكله‌نرك دایاندی، قاپیسی آچیلدی و اونلار چیخدیلار، 20-جی مرتبه‌ده ایدیلر.
پیلّه‌كن مئیدانچاسیندا یئگانه بیر قاپی واردی و بو قاپیدا منزیلین نؤمره‌سی یازیلمیشدی. بیر ده لؤوحه‌جیگین شوشه‌سی قالمیشدی، آما شوشه‌نین آلتینداكی لؤوحه بومبوش ایدی — فامیلیا‌سیز، آدسیز. قاپی مؤحكم دمیردن ایدی و چوخ تزه گؤرونوردو. قاری، قاپی‌یا یاناشدی، زنگی باسدی. «آروادین باشی خارابدی، — دئیه اؤیرنجی دوشوندو. — یقین اوغلونون دردیندن باشینا هاوا گلیب. یوخسا بوش منزیله زنگ نیه چالیر؟ یا بلكه منزیل بوش دئییل، اورادا كیمسه وار؟»
قاری، سانكی اونون فیكیرلرینی اوخویوبموش كیمی. — همیشه منزیله گیرمزدین قاباق زنگی باسین، — دئدی، — اگر منزیله قاز دولوبسا زنگین قیغیلجیمیندان منزیل پارتلایا بیلر.
—بس...
یئنه ده اونون دئییلمه‌میش سؤزلرینه جاواب اولا‌راق قاری:
—اؤزون پارتلاماقدانسا منزیل پارتلاسا یاخشیدیر، — دئدی و آچارلا قاپینی آچیب ایچری گیردی. — گلین.
بو یئنی ائولرده‌كی ان عادی منزیل‌لردن بیری ایدی و قاری‌نین اوتاغیندان فرقلی اولا‌راق چوخ سلیقه-ساهمانلی‌ایدی. هر بیر راحت‌لیغی دا واردی: ترتمیز مطبخ، دوم آغ كافئل‌لی (كاشی) حامام. اوتاغین اؤزو ده چوخ تمیز، گئنیش، ایشیقلی ایدی. اولدوغوندان دا گئنیش گؤرونوردو؛ اوّلا شئی-شوی آز ایدی — تاخت، ایستو◦ل (میز)، كیتاب ایشكافی، ایكی ایستوُل(صندل)، والسلام. ایكینجی‌سی ده دنیزه آچیلان ایری بیر پنجره‌سی واردی. پنجره‌دن بیر آخار-باخارلی منظره آچیلیردی — ایكی گؤز ایسته‌ییردی تاماشاسینا. اؤیرنجی كیتاب ایشكافی‌نین شوشه‌سی، دهلیزده‌كی گوزگو و دیوارداكی ساعتی اؤرتوكلنمیش گؤرنده تعجوبلنمه‌دی. دیوارلاردا چوخلو فوتوشكیل واردی. بو همین او قاری‌نین اوتاغین‌داكی آداملارین شكیل‌لری ایدیمی؟ یا یوخ؟ اؤیرنجی بونو دقیق موعیّن‌لشدیره بیلمزدی. گؤرونور، اورا‌داكی شكیل‌لری خئیلی واخت سئیر ائتمیشدیسه ده عمل‌لی-باشلی حافیظه‌سینده ساخلایا بیلمه‌میشدی. آما بیر شئیی بیلیردی كی، بو شكیل‌لر داها جاواندیرلار، عكس اولونموش آداملارین سینلرینه گؤره دئییل، اونلارین چكیلمه واختلارینا گؤره تزه ایدیلر، آداملار دا یاخین واختلارین دبلریله گئیینمیشدیلر. بوتون بو شكیل‌لر ده هامیسی عئینی بیچیمده، عئینی بویدا ایدیلر و بورادا دا یالنیز بیرجه شكیل — اورتا‌دان آسیلمیش گنج، گولش‌صیفتلی اوغلانین عكسی او بیری‌لریندن ایری ایدی. اوغلان كؤینكده ایدی، كؤینگی‌نین یاخاسی آچیق ایدی. بو همین او اوغلان ایدیمی، قاری‌نین ائوین‌ده‌كی شكیل و بو فوتو عئینی آدامین تصویری ایدیمی؟ قاری‌نین وفات ائتمیش (وفات ائتمیشمی؟) اوغلو (اوغلومو؟) و بو شكیلدهكی شخص عئینی آدام ایدیمی؟ بیر یاندان عئینی آدام ایدی — چاتما قاش، اوخشار صیفت جیزگیلری، او بیری یاندان — یوخ. قاری‌نین ائوین‌ده‌كی شكیل داها سینلی آدامین شكلیدی. بیغی واردی. هم ده بو ایكی شكیلدهكی ایفاده‌لر بام-باشقا ایدی.
اورادا گرگین، اؤزونو قیسمیش، حتّا ائله بیل نه‌دنسه قورخموش، نیگاران بیر آدامین صیفتی. بورادا ایسه یالنیز ایفاده یوخ، خاصیت‌ده سانكی باشقا ایدی — آچیق اوركلی، دئیَن-گولن، مهریبان، یاپیشیقلی بیر شخص... بلكه ده بو عئینی بیر آدامین موختلیف یاش‌لاردا، موختلیف شرایط‌لرده، موختلیف اؤوقاتلاردا چكیلمیش فوتولاری ایدی.
قاری‌نین سسی اؤیرنجینی فیكیرلریندن آییردی:
—نئجه‌دیر، بگنیرسینیز اوتاغی؟
اوچونجو بؤلومون سونو