ایفراطچی بوداییلار میانماردا یوزلرجه ائوی و مسجیدی اودا چكدیلر
یازار : میرزه عبدالصمد ملکی | بؤلوم : خبرلر
+0 به یه ن
ایفراطچی بوداییلار میانماردا یوزلرجه ائوی و مسجیدی اودا چكدیلر
میانمارداكی خشونتلرین تازا دؤرونده، ایفراطچی بوداییلار موسلمانلارین یوزلرجه ائو، مسجید و توكانینی غارت ائدیب اودا چكدیلر.
فارسین وئردیگی خبره گؤره ایفراطچی بوداییلار «راخین» بؤلگه‌سینده موسلمانلارین یوزلرجه ائو، مسجید، تیجارت مركزی و توكانینا حمله ائله‌مكله اونلاری غارت ائدیب اودا چكدیلر.
رویترزین میانمار پولیسینه اساساً وئردیگی خبره گؤره، خشونتلر بیر موسلمان خانیمین خیاباندان كئچركن بودایی بیر راهیبه دَیمه‌سی‌ایله باشلاندی!
بو خبره اساساً بو حمله سه‌شنبه گونو اولدو و میانمارلی موسلمان عاییله‌لر، آماندا قالماق اوچون جنگلده سیغینیب ائولری‌نین اودا چكیلمه‌سینه شاهید اولدولار. بو وحشی‌یانا حمله‌لرده ایكی مسجید ده اودا چكیلیب بوتونلوكله داغیلدی.
بو حمله‌لر بیر شراییطده باش وئریر كی میانمار پولیسی حادیثه‌لرده اصلاً دخالت ائله‌میر. بعضاً ائله صحنه‌لر گؤروشور كی بوداییلار، پولیسین گؤزونون قارشیسیندا وحشیلیگه ال وورورلار. دوشنبه گونو میانمار مجلیسی‌نین تحقیق كومسیونو دوشوندوروجو بیر ایقدامدا، دؤولتی وظیفه‌لندیردی كی خشونتلرین آزالماسی اوچون موسلمانلارین چوخالماسی‌نین قارشیسینی آلسین.
«روهینگا» موسلمانلاری میانمارین 60 میلیون نفرلیك اهالی‌سی‌نین یوزده بئشینی تشكیل ائدیرلر. اونلار 1948 دن یعنی میانمارین ایستیقلایندان بو طرفه دواملی حالدا شیكنجه، اذیت و دیقتسیزلیكله اوزلشیبلر. پایتختین 130 كیلومترلیگینده یئرلشن «میكتیلا» شهرینده كئچن آی باش وئرمیش خشونتلرده 200 نفردن آرتیق موسلمان اؤلدورورلوب و 12000 مین نفر آوارا اولوب. میانمارین بیر ایل اؤنجه خشونتلری‌ده یوزلرجه موسلمانین اؤلومو و آزیندان 150000 نفرین آوارا اولماسینا سب اولدو.
دئمه‌لی‌ییك دونیا ایجتماعیّتی ایندیه قدر موسلمان اقلیتیندن حیمایت اوچون هئچ اثرلی ایقدام گؤرمه‌ییب.