گؤره‌سن ائلینی آبادالاماغا چالیشانین ائوی خرابا قالار؟
یازار : میرزه عبدالصمد ملکی | بؤلوم : دین
+0 به یه ن
گؤره‌سن ائلینی آبادالاماغا چالیشانین ائوی خرابا قالار؟
جامیعه‌ده‌كی تربیت و تعلیم اورگانلاری، عاییله‌لر، موعلیملر، روحانیلر و عالیملر یعنی اوست اوسته تعلیم و تربیت مسئول‌لاری‌نین ایشلری دوز اولسایدی جامیعه‌ده موشكوللرین چوخونا راستلانمازدیق. جامیعه‌میزده‌كی اینسانلارین چوخ آزی‌نین سؤزو ایله عملی بیر اولور و اكثراً اونلارین عئینی اولماسینا راست گلینمیر. بو مسأله‌نی قیسا بیر یازیدا آچماق اولماز آما اوسته اوسته دئمك اولار كی بونلارین فرهنگی ریشه‌لری وار. عاییله تربیتیندن باشلاییب جامیعه‌ده تربیت و تعلیم اورگانلارینا قدر بو ساحه‌ده تأثیرلیدیلرر. بو مؤعضله بیر ایكی سبب سایماق اولماز.
بیزده اولان بو موشكول، اخلاقی و فرهنگی موشكوللریمیزه تای اوزون سابیقه‌سی اولان اخلاق ضعیفلیگیدیر. آما هر حالدا بو موشكولون یارانماسیندا جامیعه‌ده‌كی تعلیم تربیت سیستملری‌نین بیرباشا تأثیری وار.
اینسانلارین سؤزلری و عمل‌لری‌نین بیر اولماماسی‌نین ضررلریندن بیری جماعتین بیر بیرینه اینانماماسیدیر. بیر جامیعه‌دن‌ده اینانماق حذف اولسا داش داش اوستونده دایانماز چونكی هئچ كس آیریسینا اینانمیر و جامیعه‌نین اساس تشكیل وئرنی‌ده اینانماقدان عیبارتدیر. هر شخص فقط اؤز منفعتلرینه دوشونور و اصلاً جمعی منفعتلره اهمیّت وئرمیر. اؤزلرینی‌ده بئله توجیه ائدیرلر كی هامی نئجه من‌ده ائله. بو مسأله او قدر بیزیم فرهنگیمیزه ریشه سالیب كی حتّا بئله بیر مثل چیخیب: «ائلینی آبادالاماغا چالیشانین ائوی خرابا قالار». هامی‌نین بیر مسیره گئتمگی واجیب اولان جامیعه‌ده، هر كسین اؤزونه مخصوص آیری یولو اولسا او جامیعه داغیلار.
ایندی بو بؤیوك موشكولون حل یولو نه‌دیر؟
جامیعه‌ده‌كی تربیت و تعلیم اورگانلاری، عاییله‌لر، موعلیملر، روحانیلر و عالیملر یعنی اوست اوسته تعلیم و تربیت وظیفه‌سی بویونلاریندا اولانلار، ایسته‌سه‌لر بو موشكول حل اولار.
بیلدیگیمیز كیمی‌ده اینسانلار سؤزله یوخ بلكه عمل‌له هیدایت اولارلار. پیغمبریمیز (ص) گؤزل اخلاقی و كیرداری ایله ایدی كی اینسانلاری بیر-بیر دوز یولا هیدایت بویوردو. یوخسا اونلارا یاخشی اولماغا امر ائله‌مكله یاخشی اولانمازلار.