نیظام انیتیظاملا شادلیق و موفقیتین آراسینداكی رابیطه
یازار : میرزه عبدالصمد ملکی | بؤلوم : دین
+0 به یه ن
نیظام انیتیظاملا شادلیق و موفقیتین آراسینداكی رابیطه
شخصی و ایجتیماعی یاشاییشدا نیظام انیتیظاملی اولان اینسانین دوشونجه‌لری مخصوص حالدا تصنیفلشمیش اولار، بونا گؤره‌ده موفقیّت آددیملارینی راحاتلیقلا یوخاری گئدیب روحی فیشاردان آماندا اولوب فرحلی اولار. بوتون وارلیغین اساسی نیظام انیتیظام اوستونده‌دیر و اوندا هر بیر شئیین اؤزونه مخصوص یئری و رولو وار. سما جیسملری‌نین حركتی، فصللرین اینتیظاملی دولانماسی، گئجه گوندوز، اینسان بدنی‌نین اورگانلاری‌نین ایشی و حركتی هامیسی اینتیظامین اهمیّتینی گؤستریر. خیلقتده اینتیظامی یارادان آللاه اونو اینسانین فردی و ایجتیماعی یاشاییشیندا دا سئویر.
ایجتیماعی اولماق و جامیعه طرفیندن قبول اولمانین بیر یولو جامیعه‌ده‌كی اینتیظامی و قایدالاری رعایت ائله‌مكدیر. قایدالار فردلرین داورانیشینی كونترول ائلر و هدفلی و موفق یاشاییشا سبب اولار. قورآن كریم قمر سوره‌سی‌نین 49-جو آیه‌سینده بویورور: بیز هر شئیی اندازه‌سی قدر یاراتمیشیق.
آما اساس مسأله بو اینتیظامین نئجه اولماسیندادیر و اونون اؤریرنماغی‌نین نئجه‌لیگینده‌دیر. بو سوآلین جوابینا موختلیف نظرلر وار. چونكی بو موضوع تمامیله بیر میلّتین كئچمیشینه و فرهنگینه باغلیدیر.
اینضیباطدان مقصد اینسانین جامیعه‌ده‌كی قایدالارلا اویغون اولا بیلمه‌سیدیر. بیر طرزده كی فردلر اؤز داورانیشلارینی یاشادیقلاری جامیعه‌نین ایستكلری و طلبلریله اویغونلاشدیرسینلار. قایدالارین رعایتی نه فقط عادتلرین رعایتی باخیمدان اهمیّتلیدیر بلكه اینسانین شاد و ساكیت یاشاماسیندا دا اهمیّتی وار. اینتظام، اینسان یاشاییشیندا شادلیغین اساسلاریندان بیریدیر.
ایسلامین كرامتلی بؤیوكلری، اینتظامی اینسان یاشاییشی‌نین موهوم مسأله‌لریندن بیری ساییبلار. مولا علی (ع) ایمام حسن (ع) و حسینه (ع) وصیتینده بئله بویورور: سیز و بوتون اوشاقلاریم و بو مكتوبون یئتیشدیگی هر كسه آللاهدان قورخماغی و ایشلرده نیظام اینتیظامی رعایت ائله‌مگی وصیّت ائلیرم. (نهج البلاغه، خوطبه157، نامه 47)
اینتیظام، مقصده چاتماغا بیزیم چكدیگیمیز زحمتی آزالدار آما اینتیظامسیزلیق چوخ واختلار عصبلشمك، ایسترس و حتّا مغلوبیته‌ده گتیریب چیخارار.
اینتیظامسیزلیق آیری موشكوللر ده یارادار كی خولاصه اولاراق اونلارا ایشاره ائدیریك:
- اینسانین ایجتیماعی شخصیّتین پوزار
- آیریلارین حقّینی آیاقلاماغا سبب اولار
- اینسانین مادی سرمایالار و عؤمرونو هدر وئرر
- یاشاییش و ایش مسأله‌لرینی بیر-بیرینه وورار
یاشاییشیندا اینتیظاملی اولان شخص، گئیینیش، بزك، كلمه‌لردن ایستیفاده ائله‌مكده و جومله‌لرین تنظیمینده، عهده وفا ائله‌مكده، ایش و یاشاییش یئرینی بزه‌مكده آیریلار اوچون مودئل اولار. نتیجه‌ده اونلارین محبتی و موراجیعه‌سینه توش گلر و بئله‌لیكله فردین شادلیغی اؤز یاشاییشیندا چوخالار.