عاشورا سحری خطابه‌لری
یازار : میرزه عبدالصمد ملکی | بؤلوم : دین
+0 به یه ن
عاشورا سحری خطابه‌لری
عاشورا سحری چاتماقلا، امام كؤمكلری ایله صبح نمازینی قیلدی. نمازدان سونرا، حضرت 32 نفر آتلی و 40 نفر پیاده‌دن عبارت اولان قوشونون منظم ائله‌دی. «زهیر بن قین»-ی قوشونون ساغ قانادی و «حبیب بن مظاهر»-ی قوشونون سول قانادی‌نین امیری ائله‌دی. جنگ بایراغینی‌دا قارداشی حضرت عباسه (ع) تاپیشیردی. امامین امر ایله كؤمكلر خیمه‌لری دالیدا قویوب اونون اطرافیندان قازدیقلاری خندقی قمیش و اودونونان دولدوروب اودلادیلار كی دوشمن حمله‌سیندن آماندا قالسین.
میدانین او بیری اوجوندا دا عمر بن سعد صبح نمازین قیلیب قوشون امیرلرینی معیّن ائدیب امام حسین ایله (ع) ساواشماغا حاضرلاشدی. امام دوشمن قوشونونون چوخلوغونو گؤرنده اللرینی گؤیه قووزاییب بئله دعا بویوردو: «اللّهمّ انت ثقتی فی كلّ كرب و رجائی فی كلّ شدّة، و انت لی فی كلّ امر نزل بی ثقة وعدّة، كم من همّ یضعف فیه الفؤاد و تقل فیه الحیلة و یخذل فیه الصدیق و یشمت فیه العدوّ بك و شكوته الیك رغبة منّی الیك عمّن سواك ففرّجته و كشفته فانت ولیّ كلّ نعمة و صاحب كلّ حسنة و منتهی كلّ رغبة؛ الله، بوتون چتینلیقلاردا و بلادا اومیدیم و دایاغیم سنسن. بوتون مشكل‌لرده اومیدیم فقط سنه‌دیر، نه چوخ غم كی اورگی تابدان سالار و اونو آرادان آپارماغا یول اولماز. نه چوخ غصّه‌لرده كی دوستلاریمیز بیزی بوراخار و دوشمن شماتت ائلر. اؤز رغبتیمله سنه و نه آیریسینا شكایتیمی گتیرمیشم و سن اوندا منیم اوچون فرج قویوبسان و اونو منه هامار ائدیبسن. هر نعمتین ولیسی سنسن و بوتون یاخشیلیقلار سنه عایددیر و هر مقصدین هدفی سنسن».
عمر بن سعدین قوشونو جنگه حاضرلاشدی. دوشمنین بیر دسته‌سی آتلارینی امام حسینین (ع) خیمه‌لری اطرافیندا، چاپدیردیلار و دالیدان خیمه‌لره یاخینلاشدیلار. اونلارین بیری یاخینلاشیب بیر خیمه‌لره و بیر یانار اودا باخدی. آما خندق و اود آلوولارینی گؤرنده قاییتماقدان ساوای چاره گؤرمه‌دی. بو آندا اوجادان قیشقیردی: «ای حسین (ع)! قیامت چاتمامیشدان اودا طرف گئدیبسن». امام بویوردو: «بو كیمدی؟ دئیه‌سن شمر بن ذی الجوشندی». دئدیلر: «الله سنین ایشینی صلاحا گتیرسین، اؤزودور». امام بویوردو: «ای كئچی اوتاران آروادین اوغلو ! سن اوددا قالماغا داها لایقسن». بو آندا «مسلم بن عوسجه» یایینا بیر اوخ قویوب حضرته عرض ائله‌دی: «بو فاسق الله دوشمنلریندن و ظالملرین یئكه‌سیدیر، ایندی الله سیزه اونا مسلط ائدیب [اجازه وئرین اونو ایندیجه اؤلدوروم]» آما امام اونو بو ایشدن ساخلاییب بویوردو: «بئله ائله‌مه، چونكی ایسته‌میرم جنگی باشلایان من اولام».
عاشورا سحرینده بُرَیرین خطابه‌سی
جنگین باشلاماسنیدان اوّل، امام حسین (ع) بیر عده كؤمكلری ایله، حجّتی تمام ائله‌ماق اوچون آتا مینیب دوشمن لشكرینه طرف گئتدی. امام، بریر بن خضیره بویوردو: «ای بریر! بونلارا دانیش و نصیحت ائله». بریر، عمر بن سعد قوشونونون قاباغیندا دایانیب بئله دئدی: «ای جماعت، الله-دان قورخون. ایندی پیغمبر خاندانی سیزین آرازا گلیب و بونلار پیغمبرین اوشاقلاری، خاندانی، قیزلاری و اونون حرمی (یاخینلاری) دیلار. اورگیزده اولانی دیلیزه گتیرین و اونلارلا نه ائلیه‌جگیزی دئیین». دئدیلر: «ایستیریك اونلاری امیر عبیداللّه بن زیادین اختیاریندا قویاق كی اونلار باره‌ده نظر وئرسین».
بریر دئدی: «راضی اولماسیزمی كی گلدیكلری یئره قاییتسینلار؟ وای اولسون سیزه، ای كوفه‌لیلر! اونلارا یوللادیغیز نامه‌لری، اونلارا وئردیگیز تعهّدلری یاددان چیخاردیبسیز؟ الله-ین شاهدلیغی یئتر. وای اولسون سیزه! پیغمبر خاندانینی چاغیردیز و بئله گمان ائله‌دیز كی جانیزی اونلارین یولوندا قربان وئره‌جكسیز، آما سیزین یانیزا چاتاندان سونرا اونلاری عبیدالله-ـا تسلیم ائله‌دیز و اونلارلا یهود و نصارانین ایچدیگی، و ایتلرین و دونوزلارین اوندا یووارلاندیغی، فرات چایی آراسیندا فاصله سالدیز. محمددن (ص) سونرا اونون خاندانی ایله نه پیس رفتارلار كی ائله‌مه‌دیز. سیزه نه اولوب؟ الله سیزی قیامت گونو سیراب ائله‌مه‌سین نه پیس جماعتسیز».
بو آندا قوشوندان بیر عده اونا دئدی: «ای بریر! بیز سنین نه دئدیگینی بیلمیریك». بریر دئدی: «حمد اولسون الله-ـا كی منیم معرفتیمی سیزدن چوخ ائله‌ییب. پروردگارا! من بو قومون رفتاریندان بیزارام، سن اؤزون اونلارین ایچینه ائله اوخلار آت كی اونلاردان غضبلی اولدوغون آندا، سنی ملاقات ائله‌سینلر». بو آندا، عمر بن سعد قوشونو اونا طرف اوخ آتدیلار و بریر دالی قاییتماغا مجبور قالدی.
عاشورا سحرینده امام حسینین (ع) خطابه‌سی
امام، دوه‌سینی ایسته‌ییب اونا میندی و دوشمن قوشونو اوز به اوزونده اوجا سسینن اونلارا دانیشماغا باشلادی: « ای جماعت سؤزومه قولاق آسین و جنگه تلسمه‌یین كی سیزی، منه اداسی واجب اولان شئیه و سیزین منیم بوینومدا اولان حقّیزه موعظه ائله‌یم و حقیقتی سیزه دانیشام. انصافیز اولسا سعادتلی اولاجاقسیز آما عدالت و انصافدان اوزاق اولساز قراریزا عمل ائله‌یین و منله جنگ ائله‌یین. البته منیم ولی‌م قرآنی گؤندرن الله-دی و او لایق انسانلارین كؤمگی و ولیسیدیر».
سونرا، الله-ین حمد و ثناسینی دئدی و پیغمبره (ص) و ملكلره و الهی پیغمبرلره سلام گؤندردی. حرم اهلی، امامین سؤزلرینی ائشیدنده آغلاشدیلار. امام (ع) حضرت عباس(ع) و علی اكبری(ع) اونلاری آراملاشدیرماغا گؤندردی. سونرا بویوردو: « ای جماعت منیم نسبیمی یادیزا سالین و گؤرون من كیمم. اؤزوزه گلین و اؤزوزو دانلایین. باخین گؤرون منی اؤلدورمك و حرمتیمی سیندیرماق جایزدیر؟ مگر من سیزین پیغمیریزین قیزی و خلیفه‌سی و عمی اوغلوسونون اوغلو دئییلم؟ همان كس كی هامیدان اوّل ایمان گتیریب پیغمبری (ص) الله طرفیندن گتیردیگینه تصدیقله‌دی؟ مگر سید الشهداء حمزه، منیم عمیم دئییل؟ مگر ایكی قانادی ایله جنّتده اوچات جعفر طیّار منیم عمیم دئیی؟ بیلمیرسیز كی پیغمبر (ص) قارداشیملا منیم باره‌مده بویوروب: بو ایكیسی جنّت جوانلاری‌نین آغاسیدیلار؟ منیم سؤزلریمی تصدیقله‌سیز حق هماندیر. آند اولسون الله-ـا، یالانچی‌نین الله دوشمنی اولدوغونون بیلن گوندن، یالان دانیشمامیشام. آما منه اینانماساز دا، ایچیزده بعضیلریندن سوروشساز سؤزلریمی تصدقله‌یرلر، جابر بن عبدالله انصاری، ابوسعید خدری، سهل بن سعد ساعدی، زید بن ارقم و انس بن مالك‌دن سوروشون كی پیغمبرین، قارداشیم و منیم باره‌ده، دئدیقلارینی سیزه دانیشسینلار و منیم سؤزومون دوزلوغو سیزه اثبات اولسون. بو شاهدلر منیم قانیمی تؤكمگه مانع اولمور؟»
بو آندا، شمر بن ذی الجوشن دئدی: «سن دئین كیمی اولسا من ایندیه قدر الله-ی دوز عقیده ایله عبادت ائله‌مه‌میشم». حبیب بن مظاهر دئدی: «آند اولسون الله-ـا كی سنی عبادتده تردیدلی گؤرورم و من شاهد كئچیرم كی سن دوز دئییرسن و اونون دئدیگینی آنلامیرسان، الله سنین اورگینه غفلت مؤهرو ووروب».
امام بویوردو: «بو مسأله‌ده تردید ائله‌سز ده، مگر بوندا دا شبهه‌ز وار كی من پیغمبر قیزی‌نین اوغلویام؟ آند اولسون الله-ـا كی شرقدن غربه مندن باشقا پیغمبر قیزی‌نین اوغلو یوخدور. وای اولسون سیزه! مگر سیزدن بیرینی اؤلدورموشم كی قانینی مندن ایستیرسیز؟ مگر سیزدن مال چالمیشام؟ و یا سیزی یارالامیشام كی قصاص ایستیرسیز؟» كوفه لشكری بو آندا ساكتیدی و بیر سؤز دئمیردیلر.
سونرا امام سؤزلرینه ادامه وئریب بویوردو: «اى شبث بن ربعى، و اى حجار بن ابجر، و اى قیس بن اشعث، و اى یزید بن حارث، بو سیز دئییلدیز كی منه یازدیز: میوه‌لر یئتیشیب و باغلار یاشیللانیب و چایلار داشیب، سن گلسن، كؤمگینه گلن قوشونا داخل اولاجاقسان؟» قیس بن اشعث دئدی: «بیز سنین نه دئدیگینی آنلامیریق، آما عمی اوغلونون (یزید بن معاویه‌نین) امرینه بویون وئر، چونكی او سنین بار‌ه‌نده سئومه‌دیگین ایشی گؤرمه‌یه‌جك!» امام حسین (ع) بویوردو: سن همان قارداشین قارداشیسان، ایستیسن بنی هاشم، مسلم عقیلین قانیندان آرتیغین سندن ایسته‌سینلر؟ آند اولسون الله-ـا نه ذلّت الی سیزه وئره‌جگم و نه بنده‌لر كیمی قاچاجاغام». سونرا بویوردو: «ای الله-ین بنده‌لری! من قیامت گونونه اینانمایان عصیانچیلار الیندن، اؤزومون و سیزین الله-ینا پناه آپاریرام». سونرا امام دوه‌نی اوتوردوب اوندان پیاده اولدو.
عاشورا سحرینده زهیر-ین خطابه‌سی
امامین خطابه‌سیندن سونرا «زهیر بن قین» باشدان آیاغا سلاحلا و قویروغو توكلو آتلا دوشمنه طرف گئدیب كوفه اهلینه خطابه اوخودو: «ای كوفه اهلی! من سیزی الله عذابیندان قورخودورام. البته مسلمانلارین بیر-بیرینه نصیحت وئرمك، بویونلارینداكی وظیفه‌لردندیر. آرامیزدا قیلینج دوشمه‌یینجه قارداشیق و بیر دین و بیر امّتدنیك و بیزه نصیحت حقّیز وار. آما آرامیزا قیلینج دوشسه بیز آیری امّتدن و سیز آیری امّتدن اولاجاقسیز. آگاه اولون كی الله بیز ایله سیزی، پیغمبری‌نین اوغوللاری ایله امتحان ائله‌ییب كی گؤرسون اونلارلا نئجه رفتار ائلیریك. و ایندی بیز سیزی اونلارین كؤمكلیگینه و عصیانچی عبیدالله بن زیادین علیهینه ساواشماغا چاغیریریق. سیز عبیدالله بن زیاد و دده‌سی‌نین حكمرانلیغی زمانیندا پیسلیكدن باشقا هئچ نه گؤرمه‌دیز. ائله بونلاری ایدیلر كی سیزین گؤزوزه شیش سالدیلار و ال قولوزو كسیب سیزی مثله ائله‌ییب خرما آغاجلاریندان آسدیلار و حجر بن عدی و كؤمكلری و هانی بن عروه كیمی بؤیوكلریزی و قاری‌لریزی اؤلدوردولر».
بو آندا، عمر بن سعد قوشونو، اونو یامانا قاتدی و عبیدالله-ی ستایش ائله‌مكله بیرلیكده دئدیلر: «آند اولسون الله-ـا سنین مولانی و كؤمكلرینی اؤلدورمه‌میش و یا عبیدالله-ـا تسلیم ائله‌مه‌میش بیر یئره گئتمیه‌جه‌ییك». زهیر دئدی: «ای الله-ین بنده‌لری فاطمه‌نین (س) اوغلو، دوستلوغا سمیه‌نین اوغلوندان داها لایقدیر. اونا كؤمك‌ده ائله‌مه‌سیز، الله-ـا پناه آپارین و الیز اونون قانینا بلشدیرمه‌یین. گلین حسین بن علی‌نی (ع) عمی اوغلوسو ایله باش باشا قویون. جانیما آند اولسون یزید، حسینی (ع) اؤلدورمه‌دن‌ده سیزین اطاعتیزدن راضیدیر».
بو آندا، شمر بن ذی الجوشن اونا طرف اوخ آتیب دئدی: «دینمه، الله سنی سوسدورسون، چوخ دانیشماغین بیزی یوردو». زهیر دئدی: «ای آیاق اوسته ایشیه‌نین اوغلو! من هاواخت سن ایله دانیشدیم؟ سن حیوانسان. آند اولسون الله-ـا كی سن قرآندان ایكی آیه ده بیلمیرسن. بیل كی قیامت گونو عذابلی درده مبتلا اولاجاقسان». شمر دئدی: « ایندی، الله سنی و اربابینی اؤلدوره‌جك». زهیر دئدی: «منی اؤلومدن قورخودورسان؟ آند اولسون الله-ـا حسین ایله (ع) اؤلمك سیزینله ابدی یاشاماقدان منه داها سئویملیدیر». سونرا جماعته اوز چئویریب دئدی: «ای الله بنده‌لری! اولماسین كی بئله آلچاقلار سیزی دینیزدن اوزاق سالسین. آند اولسون الله-ـا كی الله، محمدین (ص) اوشاقلاری و خاندانی‌نین قانینی تؤكنلر و كؤمكلری و مدافعلرینی اؤلدورنلری، او حضرتین شفاعتینه چاتدیرمایاجاق». بو اثنادا امام قوشونو ایچیندن بیر نفر قیشقیردی: «ابا عبدالله بویورورلار قاییت. آل فرعونون مؤمنی، قومونو نصیحت ائله‌دیگی كیمی، سن‌ده بونلاری نصیحت ائله‌دین، فایدا وئرسه بو قدر یئتر».