امام حسین (ع) باره‌ده غلو ائدنلر
یازار : میرزه عبدالصمد ملکی | بؤلوم : دین
+0 به یه ن
امام حسین (ع) باره‌ده غلو ائدنلر
تاریخ بویو مذهبی اعتقادلاردا غُلُو ائدنلرین شاهدی اولموشوق كی شیعه مذهبینده‌ده واردیلار.«غالیلر» اؤزلرینی مسلمان گؤسترنلردیلر كی اماملرین نقشی باره‌ده غلو ائدیب اماملارین مقامی باره‌ده اعتدالدان كنارا چیخانلاردیلار. اونلار اماملار باره‌ده اساس‌سیز سؤزلر دانیشیرلار. اماملار بو جور انحرافلاری آشكار صورتده قیناییب دانلاییبلار.
حضرت علی (ع) و اوغلو امام حسندن (ع) سونراكی اماملارین هئچ بیری‌نین سیاسی مقامی یوخیدی. بو استثنا امام رضا (ع) باره‌ده ده اولور چونكی امام رضا (ع) ولیعهدلیك مقامینی مجبوری و عزل-نصبی اختیاری اولمادیغی تقدیرده قبول ائله‌دی.
سیاستله جدّی صورتده رابطه‌ده اولماماق، شیعه حدیث حوزه‌سینی آیری بیر سمته چكدی. امام خصوصیّتلری بحثلرینده مطرح اولان سؤزلر و امام اقتداری‌نین حوزه‌سی باره‌ده اولان بحثلر، غیر سیاسی جنبه‌لرین داها چوخ مطرح اولونماسینی گؤستریر. بو باره‌ده اَن بؤیوك شاهد امامت بحثی‌نین كلام بحثی داخلینده یعنی عقیده اصولو ضمنینده اولماسی اولا بیلر. بیر حالدا كی اونون عملی جنبه‌لری فوری اولسایدی فقه حوزه‌سینه تاپیشیریلاردی. بو وضعیتده تماماً سیاسی و نظامی اولان كربلا واقعه‌سی، تصوّف حركتینده حل اولدو.
امامت مفهومونون و هابئله كربلا واقعه‌سی‌نین غیر سیاسی اولماسیندا، غالی‌لرین چوخ نقشلری وار. اونلارین اماملارا لاهوتی نظر وئرمكلری، امامتین سیاستدن آیری اولماسیندا، گؤزه گلیم تأثیری واریدی. غالیلر بو آیه‌نین تفسیرینده: :«هو الذی فی السماء اله و فی الارض اله» دئییردیلر كی یئرده‌كی «اله» همان امامدیر. اونلارین بو سؤزلری باعث اولدو امام صادق (ع) اونلاری مشركلردن داها پیس سایسین.
غالی‌لرین بیر عدّه‌سی ادعا ائلیردیلر (نعوذ بالله) جبرئیل پیغمبرین سئچمه‌سینده خطا ائدیب و حضرت علی‌نی (ع) سئچمه‌لی ایدی.
غالیلر كربلا واقعه‌سینه عجیبه نظرلری وار. اونلار امام حسینی (ع) بو حادثه‌ده عیسی بن مریمین (ع) اولدوغو موقعیّتینه اوخشاتدیلار. نئجه كی یهودیلر مسیحین یئرینه آیری آدامی صلیبه چكدیلر. كربلادا دا كوفه‌لیلر حنظله بن اسعد شامینی امام حسینین (ع) یئرینه اؤلدوروبلر ! یاخشی اولار همان روایتی بوردا نقل ائدك. علامه مجلسی حدیثین ترجمه‌سینی بئله یازیب:
ابن بابویه معتبر سندله روایت ائلیر كی اباصلت هروی امام رضایه (ع) دئییر: «كوفه‌ده بیر عده حسین بن علی‌نین (ع) شهید اولماماسینی ادّعا ائلیرلر و ادّعا ائلیرلر الله تعالی حنظله بن سعدی اونا اوخشاتدی و او حضرتی گؤیلره آپاردی، عیسی‌نی گؤیلره آپاردیغی كیمی. اونلار بو آیه‌نی حجت و دلیل گتیریرلر: «و لن یجعل الله للكافرین علی المومنین سبیلا» (نساء/141) الله كافرلری مؤمنلره مسلط ائله‌مز»
حضرت بویوردو: «یالان دئییلر، الله-ین لعنتی اونلارا اولسون. اونلار پیغبری (ص) تكذیب ائله‌مكله كافر اولوبلار چونكی پیغمبر (ص) او حضرتین شهادتیندن خبر وئرمیشدی. آند اولسون الله-ـا كی حسین اؤلدورولدو و حسیندن یاخشی اولان‌دا اؤلدورولدو، یعنی امیرالمؤمنین و امام حسن (علیهما السلام) و رسالت اهل بیتی‌نین هامیمیز شهید اولاروق و منی مكر و حیله ایله زهر ایله شهید ائلیه‌جكلر. و بو منه پیغمبردن (ص) خبر چاتیب. و او حضرتی، الله طرفیندن جبرئیل خبردار ائله‌ییب. الله تعالی‌نین او آیه‌ده‌كی منظورو بودور كی كافرین مؤمنه حجّتی یوخدور. نئجه اولا بیلر بوجور اولسون بیر حالداكی الله تعالی قرآندا پیغمبرلرین ناحق یئره كافرلر طرفیندن اؤلدورولمه‌سینی خبر وئریب. لیكن اونلارین اؤلماقلاریله بئله، پیغبرلرین حجّتی اونلارا غالب ایدی و حقیقتلری ظاهریدی.