آیت الله میرزه كاظم تبریزی
یازار : میرزه عبدالصمد ملکی | بؤلوم : دین
+0 به یه ن
آیت الله میرزه كاظم تبریزی
نجف و قم علمیه حوزه‌لری‌نین مشهور عالملریندن آیت الله میرزه كاظم تبریزی، 1299 هجری شمسی ایلینده تبریزده دنیایا گلدی. او، مقدمات و سطحی اوخویاندان سونرا 21 یاشیندا نجفه كؤچوب آیات عظام شیخ موسی خوانساری، شیخ محمدرضا آلیاسین و سیدمحسن حكیم كیمی بؤیوك عالملرین محضرندن فایدالار آپاردی.
آیت الله تبریزی 20 ایل بویوندا آیت الله سید ابوالقاسم خویی‌نین فقه، اصول، رجال و تفسیر كلاسلاریندان بهره آپاریب اونون اَن یوخاری شاگردلریندن ساییلدی. آیت الله تبریزی تحصیل ایله عین زماندا عالی سطحین تدریسینی‌ده عهده‌سینه آلمیشدی و نهایتده 1349-جو ایلینده قم شهرینه گلیب حوزه‌نین یوخاری سطحده اولان مجلسلری‌نین بیرینی تشكیل وئردی. آیت الله تبریزی مختلف علملره او جمله‌دن فقه، اصول، حدیث، رجال، تفسیر، تاریخ، ادبیات، ریاضیات، هیئت، هندسه، كلام، فلسفه و منطق علملرینه كامل تسلطّی واریدی و فرانسه و انگلیس دیللره‌نه ده تانیشیدی. او، اونلارجا كتاب یازمیشدی كی عروةالوثقی شرحی 150 جلدده، القواعد الفقهیه 50 جلدده، تطبیقاتُ الوسایل 20 جلدده، الاصول الجدیده 10 جلدده اونلارداندیر. بو بؤیوك عالم 1374-جو ایلینده 75 یاشیندا قم شهرینده دنیاسینی دَییشیب قم دا دفن اولدو.