حضرت علی علیه السلامین حكمتلی سؤزلری 3
یازار : میرزه عبدالصمد ملکی | بؤلوم : دین
+0 به یه ن
حضرت علی علیه السلامین حكمتلی سؤزلری 3
وَ قَالَ علیه السلام الْبُخْلُ عَارٌ وَ الْجُبْنُ مَنْقَصَةٌ وَ الْفَقْرُ یُخْرِسُ الْفَطِنَ عَنْ حُجَّتِهِ وَ الْمُقِلُّ غَرِیبٌ فِی بَلْدَتِهِ وَ الْعَجْزُ آفَةٌ وَ الصَّبْرُ شَجَاعَةٌ وَ الزُّهْدُ ثَرْوَةٌ وَ الْوَرَعُ جُنَّةٌ
امام علی (علیه السلام) (خسیس‌لیك، قورخاقلیق، كاسبلیق، یوخسوللوق و عاجزلیگین مذمّتی و صبرلی‌لیك، زاهدلیك و گناهلاردان اوزاق اولماغین مدحینده) بویورموشدور:
خسیس‌لیك عاردیر. (چونكی جماعت خسیس آدامی دنیا مالینا باغلیلیغینا گؤره مذمّت ائدیر.) قورخاقلیق نقصان و چاتیشمازلیقدیر. (اونا گؤره كی، هر هانسی بیر مقام و درجه‌‌یه چاتماق شجاعت و جسورلوقدان سونرا ممكن اولا بیلر.) كاسبلیق زیرك شخصی، دلیل و ثبوتونو بَیان ائتمكده لال و دیلسیز ائدیر (نئجه كی، وارلیلیق آلچاق و نادانی ناطقلشدیریر). یوخسول اؤز شهرینده غریبدیر (هئچ كس اونونلا گئت-گل ائتمیر). عاجزلیك (انسانی الدن سالان) بلا و بیچاره‌لیكدیر. صبر شجاعتدیر. زاهدلیك ثروتدیر. (چونكی زاهد، هئچ كسه احتیاجی اولمایان وارلی شخص كیمی دنیا و اونون مالینا محتاج دئییل.) گناهلاردان اوزاقلیق (ایلاهی عذاب مقابلینده) قالخاندیر. (قالخان انسانی قیلینجدان قورودوغو كیمی پرهیزكارلیق دا اونو دنیا و آخرت چتینلیكلریندن خلاص ائدیر.)