نهج البلاغه مكتوبلار 1
یازار : میرزه عبدالصمد ملکی | بؤلوم : دین
+0 به یه ن
نهج البلاغه مكتوبلار 1
1-جی مكتوب
امام علی علیه السلامین مدینه‌دن بصره‌یه (طلحه، زبیر و اونلارین طرفدارلاری ایله جنگه) گئدركن یولدان كوفه اهلینه گؤندردیگی مكتوبلارینداندیر. (او، ماء‌العُذیبه چاتاندا بو مكتوبو كوفه اهلینه یازدی و اونلاری عثمانین اؤلدورولمه سببیندن خبردار ائده‌رك اؤز كؤمگینه چاغیردی. مكتوبو كوفه‌یه امام حسن و عمّار ابن یاسر ایله گؤندردی) :
الله‌ین بنده‌سی امیر المؤمنین علی‌دن عالیجناب یاردیمچی و عربین شرافتلیلریندن اولان كوفه اهلینه:
الله‌ـا حمد و پیغمبره سلامدان سونرا، من سیزی عثمانین ایشیندن (و اونون اؤلدورولمه سببیندن) ائله خبردار ائدیرم كی، اونو ائشیتمك گؤرمك كیمی اولسون. (كوفه اهلیندن همین حادثه‌‌ده اولمایانلار اورادا اولانلار و گؤرنلر كیمی اولسونلار.) جماعت (یاراماز عمللرینه گؤره) عثمانا چیركین و نالایق سؤزلر دئدی. من (حضرت پیغمبرله مكّه‌دن مدینه‌یه صلح و آسایش اوچون گلمیش) مهاجرلردن بیری ایدیم كی، (فتنه- فساد و قان تؤكولمه‌سینه نفرت بسله‌یه‌رك اوندان اوزاق گزیردیم و) جماعتین اوندان راضی اولماسینی چوخ ایسته‌ییر، اونو آز مذمّت ائدیردیم. (اونا همیشه اؤیود- نصیحت وئریر و داورانیشینی دیَیشمگه چاغیریردیم.) و (آمّا) طلحه و زبیرین اونون باره‌سینده‌كی ان یونگول داورانیشلاری كسكین موقع توتماق، ان یاواش سوق ائتمه‌لری ایسه (وضعیتین كسكینلشمه‌سینی) داها دا سرعتلندیرمك ایدی.
هابئله عایشه فكرلشیب دوشونمه‌دن، غفلتاً اونون باره‌سینده غضبلندی.
سونرا (طلحه، زبیر و عایشه جماعتی اونو اؤلدورمگه سوق ائتدیلر و) بیر دسته حاضرلاشاراق اونو اؤلدوردو. (بونا گؤره ده اونلار عثمانین انتقامینی آلماق فكرینه دوشمه‌مه‌لیدیرلر، بلكه اونلاردان انتقام آلینمالیدیر.) جماعت هئچ بیر اكراه و مجبوریت اولمادان اؤز میل و ایستگی ایله منه بیعت ائتدی. (بس گؤره‌سن طلحه، زبیر و اونلارین اطرافینداكیلارین منه قارشی چیخمالاری‌نین و فتنه و چاخناشما یاراتمالاری‌نین سببی نه دیر؟!)
و بیلین كی، (طلحه، زبیر و عایشه‌نین فتنه‌لری نتیجه‌سینده) هجرت دیاری (مدینه) بوشالیب و اهالیسی اوندان اوزاقلاشیب. (من ناچار قالیب اوردان چیخدیم.) فتنه قازانین قایناماسی كیمی قاینایاراق جوشا گلیب. (هرج- مرجلیك سببیندن اورانین ساكتلیك و آسایشی آرادان گئدیب.) فتنه (دینین) قطبونه (یعنی، امام علیه السلاما) قارشی یؤنه‌لیب. اودور كی، اؤز امیر و امامیزا دوغرو تله‌سین (اونا كؤمك و یاردیم ائدین) و الله‌ین ایستگی ایله دوشمنلریزله (طلحه، زبیر و اونلارین اطرافینداكیلارلا) جنگ ائتمگه چالیشین.
و من كتاب له علیه السلام إلى أهل الكوفة عند مسیره من المدینة إلى البصرة
مِنْ عَبْدِ اللَّهِ عَلِیٍّ أَمِیرِ الْمُؤْمِنِینَ إِلَى أَهْلِ الْكُوفَةِ جَبْهَةِ الْأَنْصَارِ وَ سَنَامِ الْعَرَبِ أَمَّا بَعْدُ فَإِنِّی أُخْبِرُكُمْ عَنْ أَمْرِ عُثْمَانَ حَتَّى یَكُونَ سَمْعُهُ كَعِیَانِهِ إِنَّ النَّاسَ طَعَنُوا عَلَیْهِ فَكُنْتُ رَجُلًا مِنَ الْمُهَاجِرِینَ أُكْثِرُ اسْتِعْتَابَهُ وَ أُقِلُّ عِتَابَهُ وَ كَانَ طَلْحَةُ وَ الزُّبَیْرُ أَهْوَنُ سَیْرِهِمَا فِیهِ الْوَجِیفُ وَ أَرْفَقُ حِدَائِهِمَا الْعَنِیفُ وَ كَانَ مِنْ عَائِشَةَ فِیهِ فَلْتَةُ غَضَبٍ فَأُتِیحَ لَهُ قَوْمٌ قَتَلُوهُ وَ بَایَعَنِی النَّاسُ غَیْرَ مُسْتَكْرَهِینَ وَ لَا مُجْبَرِینَ بَلْ طَائِعِینَ مُخَیَّرِینَ وَ اعْلَمُوا أَنَّ دَارَ الْهِجْرَةِ قَدْ قَلَعَتْ بِأَهْلِهَا وَ قَلَعُوا بِهَا وَ جَاشَتْ جَیْشَ الْمِرْجَلِ وَ قَامَتِ الْفِتْنَةُ عَلَى الْقُطْبِ فَأَسْرِعُوا إِلَى أَمِیرِكُمْ وَ بَادِرُوا جِهَادَ عَدُوِّكُمْ إِنْ شَاءَ اللَّهُ