قدر گئجه‌سی‌نین عمللری
یازار : میرزه عبدالصمد ملکی | بؤلوم : دین
+0 به یه ن
قدر گئجه‌سی‌نین عمللری
1. غسل ائتمك. غسل ائدركن بئله نیّت ائتمه‌لی‌دیر: "احیا گئجه‌سی‌نین غسلونو ائدیرم قربتاً الی الله". بو غسلون بؤیوك ثوابی واردیر.
2. سحره قدر اویاق قالیب عبادتله مشغول اولماق. سحره قدر اویاق قالیب عبادتله مشغول اولماغین معناسی بودور كی، انسان دئییر: "ایلاهی، سن بو گئجه منه قرآن نازل ائدیرسن و من‌ده بو گئجه سحره قدر اویاق قالیب اونو قارشیلاییرام."
3. مسجده گئتمك. مسجده گئتمگین معناسی بودور كی، انسان اؤز مقصدینی تعیین ائدیر. یعنی: "ائی الله‌یم، بو گئجه من فساد و پوزغونلوق اولان یئرلره گئده بیلردیم. لاكن من سنین راضی‌لیغینی قازانماق اوچون سنین ائوینه گلمیشم و گله‌جك خوشبختلیگیمی معیّن‌لشدیریرم."
4. قدر گئجه‌سی‌نین نمازی، قدر گئجه‌سینده قیلینان نمازین بؤیوك شرافتی واردیر. قدر گئجه‌سی‌نین نامازی شام و خیفتن نامازلاری ایله صبح نامازی آراسین‌داكی واختدا قیلینیر. قدر گئجه‌سی‌نین نمازی‌نین قایداسی بئله‌دیر:
نیت: "قدر گئجه‌سی‌نین نمازینی قیلیرام قربتاً الی الله". صبح نمازی كیمی ایكی ركعتلی‌دیر. لاكن هر حمد سوره‌سین‌دن سونرا 7 دفعه مبا‌رك "اخلاص" سوره‌سی اوخونما‌لی‌دیر. نمازی قورتاردیقدان سونرا آلینی سجده‌یه قویا‌راق یئتمیش دفعه "استغفرالله و اتوب الیه" دئییلیر.
امام صادق (ع) بویورور: "هر كس بو نمازی قیلدیقدان سونرا سجده‌یه گئدیب یئتمیش دفعه " استغفرالله و اتوب الیه" دئیرسه، سجده‌دن قالخمامیش الله تعالا اونون اؤزونون و آتا- آناسی‌نین گناهلارینی باغیشلایار."
5. قرآنی باشا قویوب الله تعالا ، پیغمبرین و اماملارین آدلارینا آند وئرمكله الله تعالا گناه‌لاری‌نین باغیشلانماسینی، دنیا و آخرت ایستكلرینی بیلدیرمك. بو عملین معناسی الله تعالا انسان اوچون گؤندردیگی كتابی باشی اوسته قورویوب ساخلاماق دئمكدیر. یعنی: "ائی الله‌یم، سن منه حرمت ائدیب كتاب گؤندریرسن، من‌ده اونو اؤزوم اوچون رهبر و یول گؤرسه‌دن تعیین ائدیر و اونو همیشه باشیم اوستونده قورویوب ساخلایاجاغام". حضرت پیغمبر (ص) بویورور: "هر كس قرآنی اؤزونه رهبر ائتسه، قرآن اونو جنّته آپارار. هر كس قرآنی آرخادا قویسا و اونو اؤزونه رهبر ائتمه‌سه، قرآن اونو جهنّمه طرف یؤنلدر." (یعنی، هر كیم قرآنی اوخویوب اونا عمل ائدرسه و اونا تابع اولارسا، قرآن اونو جنّته آپاریب چیخارار. لاكن قرآنا تابع اولمایان شخص، قرآن اوخوماغینا باخمایا‌راق، جهنمه واصل اولار.)
قرآنی باشا قویوب الله تعالا و 14 معصوما آند وئرمگین معناسی بودور كی، "ائی الله‌یم، من سنه و سنین ان ایستكلی بنده‌لرینه آند وئریب توبه ائدیرم و سندن اؤز ایستك و احتیاجلاریمی دیله‌ییرم.