نهج البلاغه مكتوبلار 18
یازار : میرزه عبدالصمد ملکی | بؤلوم : دین
+0 به یه ن
نهج البلاغه مكتوبلار 18
18-جی مكتوب
امام علی علیه السلامین، عبدالله ابن عباس اونون طرفیندن بصره‌نین حاكمی اولان زمان اونا یازدیغی مكتوبلارینداندیر:
ای عباسین اوغلو! بیل كی، بصره شیطانین ائندیگی یئر و فتنه‌لر تارلاسیدیر. (بو شهرین فتنه آختارانلاری چوخدور.) بونا گؤره ده او دیارین اهالیسینه یاخشیلیق ائتمكله، اونلاری شاد ائده‌رك سئویندیر. و (پیس داورانیشلا اونلاری عصیانا قالدیرما. اگر اونلار كئچمیش نالایق ایشلری نتیجه‌سینده قورخو و واهمه ایچینده‌دیرلرسه، سن) اونلارین قلبلریندن قورخو دویونونو آچ (اونلارلا ائله رفتار ائت كی، سنین اونلارین كئچمیش عمللرینه گؤز یومدوغونو باشا دوشسونلر).
سنین بنی تمیم قبیله‌سی ایله پیس رفتار ائتمه‌یین و گوبود داورانماغی‌نین خبری منه چاتدی. حقیقتاً بنی تمیمین بیر اولدوزو باتمامیش، دیگر بیر اولدوزو پارلاییب.
جاهلیت و اسلام دؤرونده هئچ كس انتقام آلماقدا اونلاردان قاباغا دوشمه‌ییب. (بونا گؤره ده بو جور آداملارلا گوبودلوق و سرتلیگه باشلاماق اولماز.) هابئله (اونلارا قارشی گوبودلوق ائدیلمه‌مه‌سی‌نین دیگر سببی بودور كی،) اونلار بیزه یاخین قوهومدورلار. (چونكی بنی هاشمله بنی تمیمین نسبی حضرت پیغمبرین 16-جی باباسی الیاس ابن مضرّه گئدیب چیخیر. بونا گؤره ده) بیزیم همین قوهوملوق تئللرینی بیرلشدیرمگیمیزده ثواب، قیرماغیمیزدا ایسه گناه واردیر. اودور كی، ای ابول عباس – الله سنی باغیشلاسین – الیندن و دیلیندن چیخان یاخشی و پیس ایشلرده (دانیشیق و داورانیشیندا رعیتله) یومشاق داوران. چونكی بیز دانیشیق و داورانیشیمیزدا بیر- بیریمیزله شریكیك. (اونا گؤره كی، سن منیم طرفیمدن حاكملیك ائدیرسن.) ائله اول كی، سنین باره‌نده یاخشی گماندا اولوم و سنین حقّینده فكریم سوستلاشما‌سین (هئچ واخت یئرسیز سؤز دانیشما، منیم گؤستریشیم اولمادان بیر ایش گؤرمه). سلاما لایق كیمسه‌یه سلام اولسون.
و من كتاب له علیه السلام إلى عبد الله بن عباس و هو عامله على البصرة
وَ اعْلَمْ أَنَّ الْبَصْرَةَ مَهْبِطُ إِبْلِیسَ وَ مَغْرِسُ الْفِتَنِ فَحَادِثْ أَهْلَهَا بِالْإِحْسَانِ إِلَیْهِمْ وَ احْلُلْ عُقْدَةَ الْخَوْفِ عَنْ قُلُوبِهِمْ وَ قَدْ بَلَغَنِی تَنَمُّرُكَ لِبَنِی تَمِیمٍ وَ غِلْظَتُك عَلَیْهِمْ وَ إِنَّ بَنِی تَمِیمٍ لَمْ یَغِبْ لَهُمْ نَجْمٌ إِلَّا طَلَعَ لَهُمْ آخَرُ وَ إِنَّهُمْ لَمْ یُسْبَقُوا بِوَغْمٍ فِی جَاهِلِیَّةٍ وَ لَا إِسْلَامٍ وَ إِنَّ لَهُمْ بِنَا رَحِماً مَاسَّةً وَ قَرَابَةً خَاصَّةً نَحْنُ مَأْجُورُونَ عَلَى صِلَتِهَا وَ مَأْزُورُونَ عَلَى قَطِیعَتِهَا فَارْبَعْ أَبَا الْعَبَّاسِ- رَحِمَكَ اللَّهُ- فِیمَا جَرَى عَلَى یَدِكَ وَ لِسَانِكَ مِنْ خَیْرٍ وَ شَرٍّ فَإِنَّا شَرِیكَانِ فِی ذَلِكَ وَ كُنْ عِنْدَ صَالِحِ ظَنِّی بِكَ وَ لَا یَفِیلَنَّ رَأْیِی فِیكَ وَ السَّلَامُ