حماسه آیی «محرم»
یازار : میرزه عبدالصمد ملکی | بؤلوم : دین
+0 به یه ن
حماسه آیی «محرم»
محرم، تایی اولمایان حماسه‌نین آیی و همیشه دیری قالان تاریخدیر. قانین قیلینجا ظفر چالدیغی آی، ناب اسلامین دیری قالماسینا سبب اولان الله‌ین اَن یاخشی بنده‌سی‌نین قانی‌نین یئره تؤكولدویو آی.محرمده تاریخ وسعتینده حماسه باش وئریب. بو آیدا یئر اوزونو پروردگارین اَن مظلوم بنده‌سی‌نین فراق غصه‌سی بورویوب كی یوزلر ایل بوندان اوّل پاكلارین نسلیندن بیر انسانین حقیقی سعادت یولوندا دوشمنلرین جنگینه گئتمه‌سینی و شجاعت و شهامت درسینی وئردیگینی بشرین یادینا سالسین.
اسلام فرهنگینده محرم جانلی تاریخدیر، آما عادی و گونده‌لیك تاریخ یوخ بلكه درین بیر تحوّل و تاریخ یارادان انقلاب و بوتون حماسه‌لرین منشأی.
امام حسین (ع) یزیدله مبارزه ائله‌سه ده حقیقتده بوتون جهالتلر و ضلالتلرله ساواشدی و بئله‌لیكله انسانلارا ظلم قارشیسیندا دایانماغی و حماسه یاراتماغی اؤیرتدی.
محرم آیی بؤیوك انسانلارین رشادت و شجاعتلری ایله بیر گلیر. او حساس زماندا ایثاردان و وفادان بؤیون قاچیرتمایان انسانلار: كربلانین سقّاسی آدلانان حضرت ابوالفضل (ع) و یئر اوزونده پیغبره (ص) سیرت و صورتده لاپ اوخشار شخص حضرت علی اكبر (ع) كیمی انسانلار بو گون شجاعتله مبارزه ائدیب شهادته چاتدیلار.
14 یاشلی نوجوان قاسم بن حسن (ع) شجاعت و شهامتله جهادا اوز توتدو و جنگ میدانیندا شجاعتله ساواشیب شهید اولدو.
دوشمن قوشونوندان امام حسینین (ع) لشكرینه قوشولان حربن بن ریاحی توبه ائله‌ییب امامدان جنگ اذنی آلاندان سونرا مبارزه میدانینا گئدیب عمر سعدین سردارلاریندان نئچه‌سینی اؤلدورندن سونرا شهادته چاتدی.
حضرت زینب (س) و امام سجاد (ع) كربلا صحنه‌لری‌نین شاهدی اولاندان سونرا كربلالیلارین شجاعت و رشادتلری‌نین راویسی اولدولار و یزیدی رسوای ائله‌مكله عاشورا واقعه‌سینی اؤز خطبه‌لریله جاویدان ائله‌دیلر.