كربلا شهیدلری‌نین دفنی
یازار : میرزه عبدالصمد ملکی | بؤلوم : دین
+0 به یه ن
كربلا شهیدلری‌نین دفنی
امام حسین (ع) و وفالی كؤمكلری‌نین شهادتیندن سونرا عمر بن سعد اؤز قوشونون اؤلولری‌نین قویلانماسینا و امام حسین(ع) و كرامتلی كؤمكلری‌نین باشسیز و مطهر جسدلری‌نین تورپاق اوستونده بوراخیلاماسینا امر وئریر. آما چوخ زمان كئچمه‌دی كی بنی اسد جماعتی بو مطهر بدنلری دفن ائله‌دیلر.
كربلا شهیدلری‌نین دفن اولونماسی‌نین گونو و نئجه‌لیگی باره‌ده اسلامی منبعلرده یقینلی سند یوخدور و تاریخچیلر آراسیندا بو باره‌ده اختلاف وار. اونلارین بیر عدّه‌سی بو ایشین اون‌بیرینجی[1] گون گؤرولدویونه اینانیرلار. بیر عدّه‌سی محرمین اون اوچونجو گونونو[2] شهیدلرین دفن اولان گونونو بیلیرلر. اهل سنتین هامیسی، شهیدلرین محرمین اون بیرینجی گونونده دفن اولدوقلارینی دئییرلر.[3] شیعه عالملریندن شیخ مفید الارشاد كتابیندا، سید بن طاوس لهوف كتابیندا و ابن شهر آشوب المناقب كتابیندا دا شهیدلرین بنی اسد طایفاسی طرفیندن اون بیرینجی گون قویلانماقلارینی تأیید ائلیرلر.
بو كتابلاردان نقل اولان روایتلرین جمعیندن، شهیدلرین عمر بن سعدین كربلادان چیخدیغی گونونده قویلاندیقلاری بللی اولور؛ یعنی اون بیرینجی گون. بئله اولاندا شهیدلرین دفنی آخشام باشی اولوب چونكی تاریخه اساساً عمر بن سعد اون بیرینجی گونو ناهاردان سونرا كوفه‌یه یوللاندی.[4]
بعضی روایتلره گؤره، ابن سعدین قوشونو گئدندن سونرا، كربلا یاخینلیغیندا منزل‌لری اولان بنی اسد طایفاسیندان بیر عدّه، كربلا صحنه‌سینه داخل اولورلار و شهیدلرین مطهر جسدلرینی او وضعده گؤرنده آغلاماغا باشلیرلار و گئجه دوشمن شرّیندن اوزاق، اونلارا نماز قیلیب دفن ائلیرلر. امام حسینی (ع) ایندیكی مكاندا و علی اصغری او حضرتین آیاق طرفینده قویلادیلار. امامین اهل بیتینه ده آیری و كؤمكلرینه ده آیری بیر قبر قازدیلار. عباسین (ع) مبارك بدنینی‌ده شهید اولان یئرینده یعنی همان ایندی اولان یئرده دفن ائله‌دیلر.[5]
آما بیر آیری روایته گؤره، بنی اسد اوچون شهیدلرین دفنی امكانسیز ایدی. چونكی اونلار جنگده حاضر اولمایان كندلی‌لری ایدیلر و شهیدلری تانیان بیری‌نین كؤمگی اولمادان اونلاری تانیا بیلمزدیلر. اوسته‌لیك جسدلر ده باشسیز ایدیلر. آیری طرفدن شیعه اعتقادینا گؤره امامی امامدان باشقا هئچ كس دفن ائلیه بیلمز. پس مسأله بئله اولاندا اونلارین دفنینده حتماً امام سجادین (ع) حاضر اولماسی لازم ایدی. امامین حضورو دا خارق العاده قدرتلرله اولمالی ایدی. چونكی امام سجّاد او آندا كوفه‌ده دوشمن الینده اسیر ایدی.
بونا اساساً بعضی شیعه منبعلری بئله یازیبلار:
شهیدلرین كوفه‌لیلر طرفیندن باشسیز قالدیقلاری و بدنلرین تانیلماز دورومدا اولدوقلاری اوچون، بنی اسد، كربلا شهیدلرین دفنینده حیران قالمیشدیلار. بو آندا امام سجاد (ع) كربلایه تشریف گتیردیلر و اونلارا بو مسأله‌ده كؤمك اولدولار. او حضرت بنی اسد كیشیلری‌نین كؤمگی ایله آتاسی‌نین مطهر جسدینی تاپیب عزادارلیقدان سونرا بیر پارچا حصیرین اوستونه قویوب ایندیكی مزارینا گتیردیلر. سونرا دفن اولونان یئرین تورپاغیندان بیر آز كنارا ووردولار بیر آندا حاضرلانمیش قبر ظاهر اولدو. امام زین العابدین (ع) اللرینی امام حسینین (ع) مبارك بدنی آلتینا قویوب بویوردولار: «بسم الله وفی سبیل الله وعلی ملة رسول الله صدق الله ورسوله ما شاء الله، ولا حول ولا قوة الا بالله العلی العظیم.» سونرا اؤزلری تك، مطهر بدنی قبره قویدولار. اونلار اورداكیلاری كؤمكدن مانع اولاراق بویوردولار: «منه كؤمك ائله‌ینلر واردیر». حضرت بدنی قبره قویاندان سونرا مبارك اوزونو ابی عبدالله الحسینین(ع) كسیلمیش بوغازینا قویوب گؤزلریندن یاش آخاركن بویوردو: « طوبی لأرض تضمنت جسدك الطاهر فان الدنیا بعدك مظلمه والآخره بنورك مشرقه واما اللیل فمسهد والحزن فسرمد او یختار الله لاهل بیت دارك التی انت بها مقیم وعلیك منی السلام یابن رسول الله وبركاته؛ سنین مطهر بدنینی قوینونا آلان تورپاق مباركدی؛ دنیا سندن سونرا قارانلیقدیر و آخرت سنین جمالی‌نین ایشیغی ایله ایشیقلی. ائی الله رسولونون اوغلو! الله، اهل بیتینی سنین مقیم اولدوغون ائوه چاتدیرمایینجا گئجه‌لریمیز سندن سونرا چتین و غملریمیز اوزون اولاجاق. الله‌ین سلامی، رحمتی و بركتی سنه اولسون». سونرا قبری اؤرتدو و مبارك بارماغی ایله قبره یازدی:
«هذا قبر الحسین بن علی بن ابیطالب(ع) الذی قتلوه عطشانا غریبا.»
سونرا كرامتلی قارداشی علی اكبری (ع) او امامین آشاغی طرفینده و سایر هاشمی‌لری آیری و كؤمكلری‌ده آیری قبرده امامین قبری آشاغیسیندا دفن ائله‌دیلر. سونرا امام (ع) بنی اسد ایله بیرلیكده علقمه نهری‌نین كنارینا گئتدیلر؛ اوردا عمیسی عباسین (ع) مبارك بدنینی گؤرنده اؤزونو اونون اوستونه آتدی و مطهر بوغازینی اؤپدو. امام شدّتلی آغلایاراق بویوردو: « علی الدنیا بعدك العفا یا قمر بنی هاشم وعلیك منی السلام من شهید محتسب ورحمة الله وبركاته؛ سندن سونرا بو دنیانین باشینا كول اولسون ائی قمر بنی هاشم و منیم سلامیم و الله‌ین رحمتی و بركتی سنه اولسون». سونرا اونا بیر قبر قازیب شهید آتاسی كیمی اونو تكلیكده قبره قویوب بنی اسده بویوردو: «منه كؤمك ائله‌ین وار». سونرا عباسین (ع) شریف بدنینی دفن ائله‌دیلر»[6].
بو روایتی تأیید ائله‌ین، امام رضادان (ع) نقل اولان بیر روایتده وار. راوی دئییر: « من امام رضانین (ع) محضرینده اولاندا علی بن ابی حمزه، ابن سراج و ابن مكاری حضرته وارد اولدولار. علی او حضرت ایله امامتلری باره‌ده دانیشاندان سونرا دئدی: «آتالاریزدان بیزه روایت اولوب كی امامین ایشینی اؤزونه تای امامدان باشقا هئچ كس گؤرمز. [نئجه اولدو پس سیزین كرامتلی آتاز امام موسی كاظم (ع) شهید اولاندا سیز حاضر دئییلدیز و كفن و دفن ایشینی گؤرمه‌دیز؟] امام بویوردو: «دئ گؤروم حسین بن علی(ع) امام ایدی یا یوخ؟» دئدی: «امام ایدی». بویوردو: «كیم اونون ایشلرینی گؤردو؟» دئدی: « علی بن الحسین(ع)». بویوردو:« علی بن الحسین(ع) هاردایدی؟» دئدی: «كوفه‌ده ابن زیادین زندانیندا». بویوردو: «نئجه زنداندا اولاركن آتاسی‌نین ایشلرینی گؤردو؟» دئدی: « اونلارین گؤزوندن اوزاق گئدیب آتاسینی كفن دفن ائله‌ییب قاییتدی». امام بویوردو: «علی بن حسینه (ع) كربلایه گئدیب آتاسی‌نین ایشینی گؤرمگه امكان وئرن، بو ایشین صاحبینه ده بغدادا گئدیب آتاسی‌نین ایشینی گؤرمگه امكان وئرر.[7]
بو روایتده صراحتله اشاره اولان مسأله، امام سجادین (ع) بنی اسدله بیرلیكده شهیدلرین دفنینده شركت اتمه‌سی‌نین، خارق العاده اولماسیدیر.
هابئله نقل اولوب كربلا شهیدلری‌نین دفن زمانی حر بن ریاحی‌نین قوهوملاری و بیر روایته گؤره آناسی، اونون جنازه‌سینی ایندیكی یئره آپاریب دفن ائله‌ییبلر.[8]
هابئله نقل اولوب: بنی اسد طایفاسی عمی اوغلانلاری –حبیب بن مظاهر- ین امامین او بیری كؤمكلری اینن برابر دفن اولونماسینا راضی اولماییبلار و اونو آیری یئرده بو گون حبیبین قبری تانینان یئرده امامین باشی اوستونده قویلاییبلار.[9]