اربعین گونو و كربلا اسیرلری
یازار : میرزه عبدالصمد ملکی | بؤلوم : دین
+0 به یه ن
اربعین گونو و كربلا اسیرلری
صفرین ایرمیسی، امام حسین (ع) و وفالی كؤمكلری‌نین شهادتیندن 40 گون سونرا «اربعین» گونونه معروفدور. بعضی روایتلرده بو گونون عزیزلنمه‌سینه اشاره اولوب. امام حسن عسكریدن (ع) نقل اولان بیر روایتده اربعین زیارتی مؤمن انسانین علامتلریندن ساییلیب. بو حدیثده امام (ع) بویورور: «مؤمن انسانین علامتی بئشدیر: گئجه گوندوزده 51 ركعت نماز قیلماق (17 ركعت واجب و 34 ركعت مستحب). 2. ساغ اله اوزوك تاخماق. 3. آنلی تورپاغا سورتماق. 4. نمازلاردا «بسم الله الرحمن الرحیم»ی اوجا سسله دئمك. 5.اربعین زیارتی.[1]
شیخ طوسی‌نین امام صادقدن (ع) نقل ائله‌دیگی[2] بو زیارتده چوخ دَیَرلی سؤزلر وار. بو زیارتین بیر بؤلومونده امام حسینین (ع) قیام هدفینی رسول اكرمین (ص) هدفی تانیتدیریلیر. "و بذل مهجته فیك لیستنقذ عبادك من الجهالة و حیرة الضلالة"[3] امام حسین بنده‌لری جهالت و ضلالتدن قورتارماق اوچون جانینی وئردی.
تاریخی منبعلرده اربعین داها چوخ ایكی جریانا اشاره ائلیر:
1ـ اسیرلرین شامدان مدینه‌یه قاییتماق تاریخی.[4]
2ـ جابر بن عبدالله انصاری‌نین امام حسینین (ع) مزارینی زیارت ائله‌دیگی گون.[5]
آما اسیرلرین محض بو گونده كربلایه چاتماقلاریندا جدی تردید وار.
شیخ مفید مسار الشیعه كتابیندا یازیر: «اربعین گونو اهل بیتین (ع) شامدان مدینه‌یه قاییتدیقلاری گوندور و هابئله جابر بن عبدالله انصاری‌نین امام حسینین (ع) زیارتی اوچون كربلایه داخل اولدوغو گوندور».[6]
شیخ طوسی مصباح المتهجد كتابیندا [7] و ابن اعثم الفتوح كتابیندا دا [8] همان سؤزو یازیبلار.
شیخ مفیدین یازدیغیندان، اربعین گونونو اسیرلرین شامدان مدینه مقصدینه خارج اولدوقلاری گونو بیلیریك، مدینه‌یه چاتدیقلاری گون یوخ.[9] سید بن طاوس لهوف كتابیندا اربعین گونونو اسیرلرین شامدان كربلایه خارج اولدوقلاری گونو ذكر ائدیر. او یازیر: «كربلا اسیرلری شامدان عراقا طرف قاییداندا كروان‌باشینا دئدیلر: «بیزی كربلایه آپار». بونا گؤره اونلار امام حسینین (ع) شهید اولدوغو یئره گلدیلر. سونرا اوردا عزادارلیق ائله‌دیلر . . .» [10] «ابن نما حلی»ده اربعین گونونو اسیرلرین شامدان كربلایه قاییتدیقلاری و جابر و بیر عدّه بنی هاشم ایله گؤروشدوكلری گونو بیلیر.[11]
آما لهوف كتابی بو روایته سند ارائه ائله‌میر. شیخ عباس قمی‌ده اسیرلرین بیرینجی اربعینده كربلایه چاتا بیلمكلرینی بعید بیلیر. [12]
جابر بن عبدالله انصاری و اربعین گونونده امام حسینین(ع) زیارتی:
آما جابر بن عبدالله انصاری‌نین هجرتین 61-جی ایلینده كربلایه چاتماسیندا تاریخی منبعلر آراسیندا چوخ اختلاف یوخدور. شیخ طوسی یازیر: « اربعین گونو رسول الله صحابه‌سی اولان جابر بن عبدالله انصاری‌نین امام حسینین (ع) مزارینی زیارت مقصدی ایله مدینه‌دن كربلایه گلدیگی گوندور. او، شریف قبرین بیرینجی زیارتچیسی ایدی. امام حسینین زیارتی بوگون مستحبدیر و اربعین زیارتی ائله بودور». [13]
شیخ طوسی عبارتی‌نین ظاهری، جابرین مدینه‌دن زیارت مقصدی ایله حركت ائله‌مه‌سی و صفرین 20-سینده كربلایه داخل اولماسیدیر. نه اینكی او تصادف اوزوندن شهادتدن 40 گون سونرا اورا چاتسین. چونكی اهل بیتین كوفه‌یه چاتماسیندان سونرا، ابن زیاد، عبدالملك بن الحارث السلمی‌نی امامین و كؤمكلری‌نین شهادتینی مدینه والیسی عمرو بن سعید بن عاص اموی‌یه خبر وئرمه‌سی اوچون عراقدان شاما گؤندردی. عبدالملك گؤزله‌مه‌دن مدینه‌یه گئدیب امامین شهادت خبرینی رسمی شكلده مدینه والیسینه ابلاغ ائله‌دی. بئله اولاندا اولا بیلر جابر بن عبدالله انصاری، امامین شهادتیندن خبردار اولور اولماز، مدینه‌دن حركت ائتمیش اولسون و امامین اربعینده زیارت سنّتی، اونون الی ایله تأسیس اولونسون.[14] جابرله بیرلیكده كربلایه داخل اولان شخص، عطیه بن سعد عوفی كوفی ایدی. عطیه‌نین آدینی حضرت علی (ع) اونا قویموشدو.
بشاره المصطفی كتابیندا بئله گلیب: جابر بن عبدالله انصاری ایله بیرلیكده امام حسینین (ع) قبرینی زیارت مقصدی ایله كربلایه داخل اولدوق. جابر فرات شریعه‌سینه طرف گئتدی. غسل ائدیب یاخشی پالتارلار گئیدی . . . سونرا مطهر قبره طرف یوللاندیق. جابر هر آددیمیندا الله ذكری دئییردی. قبره یاخینلاشدیق. او منه دئدی: «منه قبره چاتدیر».[15] من اونون الینی قبرین اوستونه قویدوم. جابر قبرین اوستونه دوشوب غش ائله‌دی. اونون اوزونه بیر آز سو سپدیم. اؤزونه گلندن سونرا اوچ دفعه یا حسین دئدی. سونرا دئدی: «ائی حسین نیه منیم جوابیمی وئرمیرسن؟» سونرا اؤزونه دئدی: «بوغازی‌نین دامارلارینی كسدیكلری حالدا و باشینلا بدنین آراسیندا فاصله دوشدوغو حالدا نئجه جواب وئره بیلرسن . سنین خاتم النبیین و سید المؤمنین اوغلو اولدوغونا . . . و كساء اهلی‌نین بئشینجیسی اولدوغونا . . .شهادت وئریرم. الله‌ین سلام و صلواتی سنه اولسون». سونرا امام حسینین (ع) قبری اطرافینا حركت ائدیب دئدی: «السلام علیكم ایتها الارواح التی حلت بفناء الحسین... اشهد انكم اقمتم الصلاة واتیتم الزكاة وامرتم بالمعروف ونهیتم عن المنكر...» .[16]