شرعی مسأله:نماز و اوروج اجاره سی
یازار : میرزه عبدالصمد ملکی | بؤلوم : دین
+0 به یه ن
شرعی مسأله:نماز و اوروج اجاره سی
عزیزلرین بیری نئچه شرعی سؤال سوروشموشدو. بو سؤال جوابلاری سیزله پایلاشماغی فایدالی بیلدیم.
سؤال1:
منیم ایشیم چوخ اولور و بعضاً نماز قیلماغی یاددان چیخاردیرام. آما الله‌ا چوخ شکر، گلیریم یاخشیدی. اولار کی قضایا گئدن نمازلاریمی آیرلاری توتسون. ایستر پولسوز و یا پول قارشیلیغیندا؟
جواب1:
هر مکلف دیری ایکن نمازلاری و اوروجلارینی اؤزو یئرینه گتیرمه‌لیدیر. بیر انسانین نماز و یا اوروجو اوچون آیری آدامی اجیر ائتمک، یالنیز اونون دنیانی ترک ائتدیگی زمان ممکن اولار. یعنی بیر انسان وصیت ائله‌میش اولورسا، مرحوم اولاندان سونرا اونا قضا نمازی قیلدیریب و اوروج توتدورماق اولار.
سؤال2:
اجاره نمازی قیلانا (اجیر اولان شخصه) آشاغیداکی ایشلر واجبدیر یا یوخ:
1. اذان و اقامه دئمک، تسبیحات اربعه‌نی اوچ دفعه دئمک، سلاملارین هر اوچون دئمک.
2. نمازلاری ترتیب ایله قیلماق یعنی اول صبح نمازی سونرا گون اورتا سونرا ایکینجی سونرا شام و سونرا خفتن نمازی.
3. اجاره نمازی قیلاندا مرحومون آدینی و خصویتلرینی بیلمک.
جواب2:
اجاره عقدینده شرط اولورسا، اجاره نمازی یالنیز واجبی جزءلرله یئرینه گتیریله بیلر. آما مطلق قویولسا و یا مستحباتی ایله یئرینه گتیرلمه‌سی شرط اولورسا، متعارف مستحباتی یئرینه گتیرمه‌لیدیر.
نمازلاری قیلاندا یالنیز «گون اورتا و ایکینجی» و «شام و خفتن» نمازلاری آراسیندا ترتیب واجبدیر. یعنی اجیر ائلیه بیلر صبح نمازلارینی بیر یئرده قیلسین، سونرا شام-خفتن نمازلارینی قیلسین و سونرا گون اورتا-ایکینجی نمازلارینی.
مرحومون‌دا آدینی و خصویتلرینی بیلمک لازم دئییل. همین کی نمازی قیلاندا اجیر اولدغو شخصین طرفیندن نماز قیلدیغینی نیت ائله‌سه کفایت ائلر.