امام رضانین (ع) واقفیه مقابلیندهکی ساواشی
یازار : میرزه عبدالصمد ملکی | بؤلوم : دین
+0 به یه ن
امام رضانین (ع) واقفیه مقابلیندهکی ساواشی
سککیزینجی امامین زمانی، شیعهنین خارجی مشکللریندن علاوه داخلی مسألهلریده اورک آچان دئییلدی. او دورهنین مشکللرینی تانیماق بو گونکی بعضی مشکللرین حلّینهده کؤمک اولا بیلر.
امام رضا (ع) زمانی شیعهنین ایچینده زیدیه، اسماعیلیه، فطحیه، واقفیه و غالیلر کیمی مختلف فرقهلر یاراندی. بو فرقهلرین ایچینده شیعه غالیلری و واقفیه فرقهسی امام رضا (ع) ایله لاپ چوخ مخالفتچیلیغی ائلهدی.
امام رضانین (ع) امامتینی قبول ائتمهین فرقه
واقفیه فرقهسی 183 هجری قمری ایلینده امام موسی کاظمین (ع) شهادتیندن سونرا او حضرتی قائم و مهدی امام ساییب او حضرتده توقف ائتمکله امام رضانین (ع) اماملیغینی قبول ائلهمهدیلر.
بو فرقهنین اؤزونه مخصوص خصوصیتلری، اونون سرعتله یاییلماسینا سبب اولدو. بو خصوصیتلردن بیری بو فرقهنین رهبرلری ایدی. اونلار جماعتین ایچینده یوخاری علمی، اجتماعی و دینی موقعیتلرینه مالک ایدیلر. جماعت اونلارین آدلارینی فقیه، ثقه و مشهور کیمی صفتلرله همراه ائلیردیلر. اونلارین بعضیسی قاباقکی اماملارین بلا واسطه نمایندهلری ایدیلر.
واقفیلر اؤز عقیدهلرینین ثبوتی اوچون او زمانین رسانهلری یعنی کتاب، مختلف کلاسلارین تشکیلی و تحریف اولموش حدیثلرین یایماسی ایله اؤز عقیدهلرینی یایماغا اقدام ائلیردیلر. اونلارین اساس هدفلری امام کاظمین حضرت مهدی اولماسینی ثابت ائلهمگیدی.
اونلار بو ایش اوچون موعود مهدی بارهسینده اولان چوخلو حدیثلری اؤز نظرلرینه گؤره تفسیر و معنا ائلیردیلر.
امام رضا (ع) بو فرقهنین قاباغیندا چوخ شدّتلی دایانیردی. او حضرت واقفیه ایله مبارزهده نئچه ابزاردان استفاده ائلیردیلر:
1.مکاتبه: امام رضا (ع) آتاسی امام کاظمین (ع) نمایندهلری اولان علی بن ابیحمزه بطائنی و زیاد بن مروان قندی و عثمان بن عیسی رواسییه نامه یازیب اونلاردان آتاسینین اموالینی او حضرته تحویل وئرمگی ایستهدی.
2.شیعهلرین شبههلرینه جواب وئرمک: امام رضا (ع) مناظره، دانیشیق و مکاتبه یولو ایله شیعهلرین شبههلرینه جواب وئریردیلر و بو یول ایله چوخلارینی حقه قایتاردیلار.
3.حدیثلری تحریفدن تمیزلهمک: او حضرت واقفیه طرفیندن تحریف اولان حدیثلرین دوزونو شیعهلره دئییب واقفیهنین یالانچی اولدوقلارینی جماعته آچیقلادیلار.
4.واقفیلرین ماهیتینی شیعهلره تانیتدیرماق: امام رضا (ع) مختلف موقعیتلرده واقفیلرین یالانچی و دنیا مالی دالیسیجا اولدوقلارینی شیعهلره دئدیلر و اونلارین ماهیتلرینی تانیتدیردیلار.
5.واقفیهنی تحریم ائتمک: امام رضا (ع) اؤز شیعهلرینی واقفیه ایله رابطهده اولماق و اونلارا زکات وئرمکدن منع ائلهدیلر.
6.واقفیلری نفرین و لعن ائلهمک: امام رضادان (ع) نقل اولان چوخلو حدیثلرده او حضرتین واقفیلری نفرین و لعن ائلهمگی مطرح اولوب. بو حدیثلرین زمانلاری نظرده آلینیرسا او حضرت امامت دورانینین چوخونو اونلارلا مبارزهده اولوبلار. مثال اوچون امام رضانین (ع) ابوسعید مکارینی نفرین ائلهمگی نقل اولوب. امام اونا بویوروب: « الله چیراغینی سؤندورسون و ائوینه یوخسوللوق گتیرسین . . . سنی گؤروم قارداشسیز قالاسان! سن منیم شیعهم دئییلسن . . .» ابوسعیدین اورگی کور ایدی سونرالار گؤزلریده کور اولدو.
7.اؤز علمی کرامتلرینی ارائه وئرمکله: حضرت اؤز علمی کرامتلرینی بیان ائلهمکله یولدان آزمیش شیعهلری دوز یولا قایتارماغا چالیشدی و جهالت اوزوندن منحرف اولانلاری حق یولونا قایتارا بیلدی.
قایناق: امام رضا (ع) و شیعه فرقهلری کتابی
قیزلار نهدن سوبای یاشاماغی سئویرلر؟
یازار : میرزه عبدالصمد ملکی | بؤلوم : اجتماعی
+0 به یه ن
قیزلار نهدن سوبای یاشاماغی سئویرلر؟
جامعهشناسلاری فکره سالان و جامعهمیزی بوروین مشکللرین بیریده جوانلاریمیزین ائولنمگه رغبتسیزلیگی و ائولنمک یاشینین چوخالماسیدیر.
بیر عدّهنین نظرینه گؤره بو مسألهنین اساس عاملی قیزلاردیر. اونلار بئله اینانیرلار کی اجتماعی استقلال و مالی امکانلارین اولماسی قیزلاریمیزی ائولنمگه رغبتسیزلندیریب.
اؤلکهمیزین بؤیوک شهرلرینده آپاریلان تحقیقلره استناداً ائولنمه آمارینین آزالما سببلریندن بونلاری سایماق اولار: بوشانما، مخصوصاً ائولنمکدن آز فاصله ایله اولان بوشانمالارین چوخالماسی، خیانتین چوخالماسی، اقتصادی عامللر، فردی و اجتماعی فرهنگین دَییشیلمهسی، ایشسیزلیک و ایش امنیتینین اولماماسی.
جامعهده یارانان کاذب احتیاجلار انسانلاری آرتیق و داها آرتیق خرجلهمگه مجبور ائلیر و اقتصادی وضعین یاخشی اولماماسیدا اونلاری بیر جور چیخیلماز یولا سالیر و نتیجهده جوانلار بونلاری گؤرمکله ائولنمکدن چکینیر و عایله دولاندیرماق مسئولیتی آلتینا گئتمیرلر.
قیزلاریمیز ائولنمکدن سونرا، سوبایلیقدا اللرینده اولان امکانلاردان داها آرتیغینی گؤزلورلر و عکس تقدیرده ائولنماغاگه رغبت گؤسترمیرلر. اونلارا گؤره خانواده تشکیل وئرمک اقتصادی وضعیتلرینی چتینلدیرسه و اونلاری دردسره سالیرسا نه یاخشی کی ائولنمهسینلر و سوبای قالسینلار.
دنیانین لاپ مدرن چرخی
یازار : میرزه عبدالصمد ملکی | بؤلوم : تكنولوژی
+0 به یه ن
دنیانین لاپ مدرن چرخی
آلمانین فورد شرکتی بالاجا بیر کیفه یئرلشه بیلن دنیانین اَن مدرن چرخینی تولید ائلهدی.
دنیانین مدرن تکنولوژیلرینه مجهز اولان MoDe:Pro چرخینده، امنیت سئنسورلاری و ماشینلارین حرکتینی تشخیص وئرن سئنسورلار وار. بو چرخین فرمانیندا مسیر بللی ائلهین ویبراتورلار وار و عاغیللی گوشیلارین اپلیکیشنلرینه وصل اولا بیلر.
بو چرخین برقی موتورو دا وار.
یاغ اریدن یئمهلیلر
یازار : میرزه عبدالصمد ملکی | بؤلوم : ساغلاملیق
+0 به یه ن
یاغ اریدن یئمهلیلر
کؤکلمگین قارشیسینی آلماق اوچون مناسب یئمکلر یئمهلیسیز. گریپ فروت، آلما، ایستی اوت و یومورتا کیمی مادهلر بدندهکی آرتیق یاغلاری اریدرلر.
گریپ فروت: یئمکدنن اوّل یاریم گریپ فروت یئمک انساندا دویماق حسّی یارادار و بو میوهده اولان C ویتامینی یاغلاری اریتمگه کؤمک ائلر.
ایستی اوت: ایستی اوتدا اولان پیپرین مادهسی بدنده یاغلارین آزالماسینا سبب اولور.
یومورتا: یومورتا آز کالریلیدیر. مطالعهلر، سحرلر بیر یومورتا یئمگین گون بویو کالری مصرفین آزالماسینا سبب اولدوغونو نشان وئریب. یومورتادا اولان پروتئین قارین ناحیهسیندهکی یاغلاری اریدیر.
آلما: میوهلر مخصوصاً آلما بدنین قندینی یاخشی صورتده و ضررسیز تأمین ائلیر. بو میوه بول فیبرلی اولدوغو اوچون انسانا دویما حسی وئریر.
ساده و آیدین ارتباط اوچون یئددی یول (2)
یازار : میرزه عبدالصمد ملکی | بؤلوم : اجتماعی
+0 به یه ن
ساده و آیدین ارتباط اوچون یئددی یول (2)
گوندهلیک یوللادیغیز ایمیللر، قویدوغوز قرارلار، دانیشدیغیز تلفونلار، جماعت ایله دانیشیق و بحثسیز سیزین اجتماعی ارتباطیزی تشکیل ائلیر. بعضیلریمیزین گونو باشا باش ارتباطلا کئچیر. و بو ارتباطلارین نئجهلیگی یاشاییشمیزا چوخ تأثیر قویور.
اجتماعی رابطهنین بو قدر اهمیتینه گؤره، بو ارتباطلارین کیفیتی و نئجهلیگینه آرتیق دقّت یئتیرمهلیییک. بو یازیدا دوزگون و یاخشی رابطهنین نئجهلیگی بارهده 7 یول تقدیم اولونور. بو یئددی قایدا، انگلیس دیلینده هرهسینین اوّلی C ایله باشلایان بیر کلمه ایله نشان وئریلیب. اونا گؤره بو یئددی قایدایا «یئددی C» آدی وئریریک:
یاخشی بیر دانیشیق و ارتباط، بو «یئددی C»یه احتیاجی وار:
اؤنجه کی یازیدا قایدالارین ایکیسینی سایدیق ایندی یازی نین ادامه سی:
(Concrete) آیدین:
دئدیگیز سؤز آیدین اولسا، قولاق آسانلار سیزین نه دئمک ایستهدیگیزی بیلرلر. سؤزده آیدینلیق، فقط بیر نقطهیه متمرکز اولان لیزر اشعهسی کیمیدیر.
پیس ارتباطین مثالی: علی کیف تبلیغاتی اوچون بئله تبلیغات وئریب:
«بو ناهار کیفلری ایله سیزین بیر داها واخت پرابلمیز قالمایاجاق !»
بو تبلیغات آیدین دئییل و محصول بارهده هئچ بیلگی وئرمیر. احساساتدان بوشدور و آلانلاردا انگیزه یاراتمیر.
یاخشی ارتباطین مثالی: کیف تبلیغاتی بئله یازیلیب:
اوشاقلاریزا غذا حاضرلاماغا داها آرتیق واخت قویماق لازم دئییل. اوشاقلارین غذاسینی بو کیفلره قویون، ایستی و یا سرین، نئجه قویموسوز ائلهده قالاجاق.
(Correct) دوزگون:
ایشلتدیگیز کلمهلر دوز اولسا، مخاطب جذب اولار یوخسا اعتمادی سلب اولار. باشارمادیغیز تکنیکی و تخصصی کلمهلری ایشلتمهیین. سؤزلری اشتباه یازماق و یا دئمک بؤیوک فاجعه ساییلیر.
پیس ارتباطین مثالی:
«سیزین ذهنیزدهکی آرزولاری حدیث ووروب اونلارا اساساً برنامه قورموشوق. پوللاریزی بیزیم بانکا تاپیشیرین».
بو تبلیغی یازان، «حدس» سؤزو یئرینه «حدیث» سؤزونو یازیب کی اوخویانلارین اعتبارینی قازانا بیلمز.
(Coherent) ییغجام:
دانیشیغیز ییغجام و منسجم اولسا منطقلیده اولار. اونون بوتون اجزاسی بیر-بیرینه و اصلی موضوعا مربوطدور. دانیشیق لحنی موضوعنون ییغجاملیغیندا دا چوخ تأثیری وار.
(Complete) بوتون و کامل:
بوتون و کامل دانیشقدا، سیزین مخاطبیز لازم اولان سؤزلری آرتیق-اسکیک اولمادان تحویل آلار. اونا ناقص بیلگی چاتماز و او سیزین سؤزلریزه فکرلشیب جواب اوچون تصمیم توتا بیلر.
مخاطبیزدن بیر ایشین گؤرمگینی ایستهسز، بو سؤزو اونا کامل انتقال وئرین کی او دا نه ائدهجگینی بیلسین. مثلاً آدلاری، آدرسلری، تاریخلری و یئرلرین هامیسینی کامل صورتده انتقال وئرین کی او گیج قالماسین.
پیس ارتباط اوچون مثال:
«سلام دوستلار! ایندیدن صاباحین قرارینی یادیزا سالیرام!»
بو پیامدا هانسی قرار و هاردا اولدوغو بللی اولماییب.
یاخشی ارتباطین مثالی:
«سلام دوستلار! سیزه صاباحین قرارینی خاطرلادیرام. صاباح سحر ساعت آلتیدا عینالی داغینین اتگینده اولمالییوق. لطفاً گلیب گلهمیهجگیزی اعلام ائدین».
(Courteous) اردملی و ادبلی:
ادبلی ارتباط، دوستیانا رابطهدیر. عین حالدا صادقانهدیر. ادبلی ارتباطدا جملهلرین ایچینده گیزلی توهین و یا گوشه-کنایه یوخدور.
پیس ارتباطین مثالی:
«سلام علی! هفتهلیک جلسهلریمیزده، دانیشانین فقط سیز اولدوغوندان خوشوموز گلمهمگی بیلمهلیسیز. بیزیمده چوخلو پروژه و نظرلریمیز وار کی اونلار بارهده دانیشماق ایستیریک. بیزیم اختیاریمیزدا کفایت قدر واخت قویماغا اطمینانین اولسا، جلسهیه گلک یوخسا گلمهیک».
گؤردویوز کیمی بو، ایمیلدن چوخ بیر دعوا مئساژینا اوخشور. اوندا، ادب رعایت اولمامیشدی و احساساتیدا یاخشی دئییلدی.
یاخشی رابطهدن مثال:
« سلام علی! کئچن هفته سیزینله اولان جلسهمیزده، سیزین گروه اؤز طرحلری و برنامهلری بارهده یاخشی سؤزلر دئدی. سندن خواهش ائلیرم بو هفته ده بیزیم گروها اؤز برنامهلری و طرحلرینی ارائه وئرمگه اجازه وئریله».
منبع: mindtools