پرتغال اسانسی‌نین استرسی آزالتماقدا تأثیری
یازار : میرزه عبدالصمد ملکی | بؤلوم : ساغلاملیق
+0 به یه ن
آمریکانین جورج واشینگتون دانشگاهی‌نین محققلری بیر تحقیق ضمنینده پرتغال اسانسی‌نین قورخو و استرسین آزالماسیندا تأثیرلی اولدوغونو بیلدیلر. بو آزمایشده، محققلر پرتغال اسانسی‌نین قورخو و استرسه اولان تأثیرینی آراشدیردیلار.
بو آزمایشده محققلر، سیچانلاری قورخودوب اونلاری یئرلرینده قورودان بیر سس یاراتدیلار. بو سیچانلار اوچ دسته‌یه بؤلونموشدولر. اونلارین بیر دسته‌سی فقط سس معرضینده اولدولار، بیر تعدادی سسدن اؤنجه و سونرا سو معرضینده اولدولار و بیر ساییسی‌دا سسدن اؤنجه و سونرا پرتغال اسانسی معرضینده اولدولار.
محققلر گؤردولر کی پرتغال اسانسینی اییله‌ین سیچانلار داها آز قورخوبلار.هابئله اونلارین امنیت سلول‌لاری بو اسانسی دادمایان سیچانلارا گؤره فرقلی ایدی.
مدیکال دیلی‌نین یازدیغینا گؤره، پرتغال اسانسی داوالارا گؤره داها صرفه‌لی و داها آز عارضه‌لی‌دیر.
بو تره‌وزلری پیشمیش یئیین
یازار : میرزه عبدالصمد ملکی | بؤلوم : ساغلاملیق
+0 به یه ن
تره‌وزلرین چیی یئییلمه‌سینه همیشه تأکید اولونور. بو مسأله تره‌وزلرین چوخوندا صادق اولسا دا بعضیسینده اونلارین پیشمیش یئییلمه‌سی داها فایدالی اولور.
تره‌وزلرده یوخاری مقداردا آنتی اوکسیدان وار. آنتی اوکسیدانلار، بدنده‌کی آزاد رادیکال‌لاری آرادن آپاریب خسته‌لیکلرین چوخونون قارشیسینی آلار. بونا گؤره تره‌وزلرین مصرفی اورک دامار و سرطان ریسکینی آزالدار.
بامادور، یئرکؤکو و بروکلی کلمی‌نین پیشیریلمه‌سی اونلارین ارزشینی آرتیرار. یعنی بو تره‌وزلرده فیتوکمیکال ترکیبلری حرارت گؤرمز‌سه‌لر سلول جداریندا حبس قالارلار.
بامادور
بامادور، علمی لحاظدان میوه‌لر سیراسیندا یئر آلیر. آما پیشیریلدیگی زمان تره‌وز ساییلیر. بامادور چوخ فایدالی و ث ویتامینی و لیکوپن ایله دولودور. لیکوپن اونون قیرمیزیلیغینا سبب اولان فیتوکمیکالدیر.
بامادورو سودا و یا بوخاردا پیشیرمک اوندا اولان لیکوپنین لاپ یاخشی فعال ائتمک یولودور. لیکوپن، سرطان ریسکینی آزالدار، اورگین ساغلیغینی آرتیرار و نورولوژیکی عکس العمل‌لری گوجلندیرر.
بروکلی
بروکلی، کلم‌لر عایله‌سیندن ساییلیر و اونون آنتی اوکسیدان خاصیتی یوخاریدیر. هابئله بروکلی لوتئین و توکوفرول ایله دولودور. بو ترکیبلر قان دامارلاری‌نین التهابینی آزالدیب سرطان ریسکینی آزالدیرلار.
بروکلینی پیشیرمک اوندا اولان کاروتنوئیدلری آزاد ائلر. بروکلی‌نین لاپ گؤزل پیشیرمه یولو اونو سودا و یا بوخاردا پیشیرمکدیر. بو ایش ایله کاروتنوئید، لوتئین و فیتوئن‌لرین خاصیتی گوجلنر. فیتوئن پروستات سرطانین احتمالینی آزالدار.
یاخشی اولار بروکلی آز مدت قاینار سویون ایچینده قالا و سونرا گؤتوروله.
یئرکؤکو
یئرکؤکو، ویتامینلر، بتاکاروتن و چوخلو معدنی ماده‌لر ایله دولو تره‌وزدیر. یئرکؤکو، ویتامین آ و بتاکاروتنین اوندا چوخ اولدوغونا گؤره، آنتی اوکسیدان خاصیتینه مالکدیر. آزمایشلر یئرکؤکونون سودا پیشیریلمه‌سیله کاروتنوئیدلرین یوزده 14 آرتیریلماسینا سبب اولدوغونو گؤستریر.
یئرکؤکونو آیری جور پیشیرمک اوندا اولان آنتی اوکسیدانلیق خاصیتینی آزادلیر. یئرکؤکونون پیشمه‌سینه لاپ مناسب حرارت 130 درجه 20 دقیقه‌ده‌دیر.
گؤیده تازا نوع ایشیق تاپیلدی
یازار : میرزه عبدالصمد ملکی | بؤلوم : تكنولوژی
+0 به یه ن
آماتور منجّم‌لر گئجه گؤیونده تازا نوع ایشیق کشف ائله‌دیلر. بو ایشیغین آدینی«استیو» قویوبلار.
ساینز الرتین وئردیگی خبره گؤره، مکانادانین کالگری دانشگاهیندان اریک داناوان بیرینجی مرتبه اولاراق بو ایشیغین تصویرینی بیر گروهون فیس بوک صفحه‌سینده گؤردو.
آزمایشلردن سونرا بو ایشیغین پارلاق و سرعتلی گازلارین جریانی اولدوغونو آشکارا چیخارتدی.
اروپانین فضایی سازمان الکتریکی حوزه‌نین ابزارلارینی یئردن 300 کیلومتر اوزاقلیغا گؤندردیلر کی بو ایشغی تحقیق ائله‌سینلر. تحقیقلر بو جریانین ایچینده‌کی حرارتین 3 مین درجه سانتیگراد ائشیگینده‌کی محیطینده یوخاری اولدوغونو اورتایا چیخارتدی.
25 کیلومتر اولان بو جریانین ایچینده‌کی گاز، ثانیه‌ده 6 کیلومتر سرعت ایله حرکتده‌دیر.
البته تصویرده اولان بنفش ایشیقدان الده اولان اطلاعات آزدیر چونکی نه شفقدیر نه ده گونشین یئر مغناطیسی ایله اولان فعل و انفعالاتینداندیر.
اروپانین فضایی سازمانی‌نین دئدیگینه گؤره «استیو» ایشیغی چوخ شایعدیر آما ایندی‌یه قدر منجم‌لر اونا دقت ائله‌مه‌میشدیلر.
«تبریز 2018» حادثه‌سی‌نین دولت هیأتینده تصویب اولماسی
یازار : میرزه عبدالصمد ملکی | بؤلوم : خبرلر
+0 به یه ن
میراث فرهنگی‌نین مجلس معاونی اعلام ائله‌دی: بو سازمانین چالیشماسی ایله تبریز 2018 حادثه‌سی دولت هیأتینده تصویب اولوب اجرایی بندلری شرقی آذربایجان اداره کلّونا ابلاغ اولدو.
شرقی آذربایجانین میراث فرهنگی عمومی رابطه‌لری‌نین وئردیگی خبره گؤره میر هادی قره‌سید رومیانی دولتین بو حادثه‌نی تصویب ائله‌مه‌سینه اشاره ائله‌مکله آرتیردی: اسلامی کنفرانسین تصویبینه اساساً تبریز شهری 2018-جی ایلینده اسلام اؤلکه‌لری‌نین توریزم پایتختی کیمی سئچیلیب. او آرتیردی: اسلامی کنفرانس سازمانی دونیانین اوچونجو بؤیوک سازمانی‌دیر کی 2013-جو ایلینده، هر ایل بیر اؤلکه‌نین بیر شهرینی اسلام اؤلکه‌لرین توریزم پایتختی کیمی سئچمه قرارینا گلدی. 2015-ده قدس شهری و 2016 و 2017-جی ایللری‌ده تورکیه‌نین قونیه و عربستانین مدینه شهری اسلام اؤلکه‌لری‌نین توریزم پایتختی کیمی سئچیلدی.
قره سید رومیان آرتیردی: تبریزین 2018 اسلام اؤلکه‌لری پایتختی کیمی سئچیلمه‌سی بو مصوبه میراث فرهنگی سازمانی طرفیندن شرقی آذربایجانا ابلاغ اولدو اونون اجرایی ایشلری گؤرولسون سونرا شرقی آذربایجان اوستانداری امضاسی ایله بیر نامه رئیس جمهورون بیرینجی معاونینه یازیلدی و دولتین فرهنگی کمسیونوندا آراشدیریلاندان سونرا، اسلامی کنفرانسین بو مصوبه‌سی دولتده مطرح اولوب تصویب اولدو.
اوکتوبر آییندا یئر داغیلاجاق
یازار : میرزه عبدالصمد ملکی | بؤلوم : خبرلر
+0 به یه ن
اسپوتنیکین وئردیگی خبره گؤره، 2017-جی ایلین اوکتوبر آیی‌نین 2 –سینده یئر کوره‌سی بؤیوک فاجعه‌ایله اوز اوزه گله‌جک. بؤیوک گؤی داشی‌نین بو ایلین پاییزینده یئره دَیمک احتمالی وار.
بو خبر ابتداءً 2015-ده مطرح اولموشدو آما او زمان هله ائله ده ایناندیریجی گلمیردی.
2012 TC4 آدلانان بو گؤی داشی 2012-جی ایلینده تاپیلدی و اونون مداری تقریبی حالتده مطالعه اولونوب. اونون قطری 12 دن 14 متره قدر تخمین وورولور.
بئله‌لیکله بو داش روسیه‌نین چلیابینسک منطقه‌سینه دوشن داشدان داها بؤیوکدور. او داش 1613 نفره صدمه ووروب و 8 میلیارد دولاردان آرتیق خسارت وورموشدو. هله بو داش مسکونی یئره دوشسه‌یدی خسارتی چوخ داها آرتیق اولا بیلردی.
البته رسانه‌لر دونیانین سونونو گتیرمک کیمی خبرلری دئمکده بیر آز مبالغه ائلیرلر آما هر حالدا بو داشین یئره دَیمه‌سی جدی صدمه‌لره یول آچا بیلر.
متخصصلرین چوخو 2012 TC4 داشی‌نین 2020-جی ایله قدر یئره دَیمک احتمالینی صفرله برابر بیلیرلر.