زنجیرسیز چرخ سورون
یازار : میرزه عبدالصمد ملکی | بؤلوم : تكنولوژی
+0 به یه ن
چرخ سورماغین لاپ مهم مسأله‌لریندن بیری زنجیرین قیریلماسی اولور. آما دیجیتال ترندزین وئردیگی خبره گؤره، بو مشکل زنجیرسیز چرخلرین اختراعسی ایله حل اولور. تازا چرخلرده تنگستن چرخدنده‌لردن استفاده اولوب کی نه یاغلانماق ایستیر نه ده پاس توتور.
بو چرخین دوزلدیلمه‌سینده ایشلنن موادّین‌دا یوخاری کیفیتی وار. بدنه‌سی یوخاری چگالیسی اولان منیزیوم آلیاژیندان دوزلیب.
بو چرخلر اوچ 20 اینچ، 24 اینچ و 26 اینچ سایزلاریندا دوزلدیلیبلر و اونون دالی و قاباغیندا تورموز دیسکیندن استفاده اولونماغا گؤره، تورموزلارا اشاره ائله‌مک همان چرخ دایانیر.
بو چرخین فرمانی چوخ انعطافلیدیر و سرعت ایله دؤنه بیلیر اونا گؤره داراشلیق یئرلرده حرکته ال وئریشلی اولور.
بو چرخین اؤن ساتیشی باشلانیب و سئونلر اونو آلماغا 800 دولار وئرمه‌لی اولورلار.
نیوتون قانونو خلافینا، منفی جرمی اولان ماده دوزلدی !
یازار : میرزه عبدالصمد ملکی | بؤلوم : تكنولوژی
+0 به یه ن
عالملر منفی جرمه صاحب اولان مایع دوزلدیبلر کی نظره گلیر نیوتونون حرکت قانونونون خلافینا رفتار ائده‌جک.
واشنگتون دانشگاهی‌نین عالملری تازا مایع دوزلدیبلر. بو مایع اونا وارد اولان نیرونون خلاف جهتینه حرکت ائلیر.
بو دانشگاهین اوستادیارلاریندان اولان مایکل فوربس دئییر: بو حیرت آمیز پدیده آزمایشگاه محیطینده یارانیب و اونون کؤمگی ایله بعضی مفهوملاری چالیشا چکمک اولار.
عادی وضعیتده نیوتون قانونلاری اساسیندا بیر ماده‌یه باسقی گلدیگینده، او ماده همان باسقی جهتینه حرکت ائلر آما منفی جرمی اولان ماده‌یه باسقی گلدیگینده ترسه یؤنه حرکت ائلیر.
بو محققلر روبیدیمین اتوملارینی سویوقلاتماقلا منفی جرمین یارانماسینا شرایط یارادیبلار. بو ایش اوچون، ماده‌نین اتوملاری او قدر سویومالیدیر کی بیر جور کاندنسیت Bose-Einstein یارانا. بو وضعیتده ذره‌لر چوخ یاواش حرکت ائلیر. هابئله کوانتوم فیزیکی قایدالارینا گؤره دالغالی رفتار ائده‌جکلر. اونلار بیرلیکده حرکت ائدیب بیر جور سوپر ماده دوزلدیب، انرژی ایتیرمه‌دن جریان تاپیرلار.
فیزیک اوستادی پیتر انگلز، لیزر واسطه‌سی ایله بو ذره‌لری سویوتدولار. بئله‌لیکله داغ و یوخاری انرژیلی ماده‌لر بوخار کیمی اوندان قاچیب ماده داها دا سرینلشدی.
هابئله لیزر اتوملاری، خاص وضعیتده میکرونون یوزده بیر قطری اولان قابدا کنترل ائله‌دی. بو حالتده بیر جور روبیدیم سوپر مایع یاراندی کی معمولی جرمه صاحبدیر آما قابین سینماسی ایله روبیدیم مایع‌سی داغیلیر.
سونراکی مرحله‌ده محققلر منفی جرمی یاراتماق اوچون اتوملاری دالی و قاباغا سورن و اونلارین حرکت وضعیتینی دَییشدیرن آیری لیزرلردن استفاده ائله‌دیلر. بو زمان یوخاری سرعتله آخان روبیدیم، ائله نظره گلیر کی منفی جرمی وار. بونا گؤره اونا باسقی گلنده عکس طرفه حرکت ائلیر.
اوشاقلارین بئینین گوجلندیرن یئمه‌لیلر
یازار : میرزه عبدالصمد ملکی | بؤلوم : ساغلاملیق
+0 به یه ن
اوشاقلاری هوشلو و عاغیللی بارا گتیرمک اوچون آیری مسائل‌دن علاوه اونلارین یئمکلرینه دقّت یئتیرمک لازمدیر.
بئیین دوستلاری:
1. کامل تاخیل‌لار 2. یاغلی بالیقلار 3. بلوبری 4. بامادور 5. ب ویتامینلری و فولیک اسید 6.قره اوزوم 7. کدو توخومو 8. بروکلی کلمی 9. خام آجیل (پوسته، بادام، فیندیق و . . .)
بئیین دوشمنلری:
1. فست فودلار 2. شور یئمه‌لیلر 3. فراوری اولموش غذالار 4. قیزارتمالی غذالار 5. شیمیایی کودلا تماسدا اولان غذالار 6. شیمیایی یوخو گتیرن ترکیبلی یئمه‌لیلر 7. الکل 8. مصنوعی شیرینله‌دنلر 9. قیویر زیویر (پوفک و چیپس و . . .)
برونو لاتور: تازا جامعه شناسلیغا احتیاجیمیز وار
یازار : میرزه عبدالصمد ملکی | بؤلوم : اجتماعی
+0 به یه ن
فرانسه‌لی فیلسوف و جامعه شناس دئدی: جامعه شناسلیغا تازا مئتود داخل ائله‌مه‌لی‌ییک. بو تازا مئتودا گؤره نفرلری بیر بیرندن آیری نظرده آلماق یئرینه اونلار آراسیندا اؤتوشمه نظرده آلاق.
مهرین وئردیگی خبره گؤره، بدیل جامعه شناسلیق امکانلاری اجلاسی بو ایلین فروردین آیی‌نین 28-ده تهران دانشگاهی‌نین اجتماعی علم‌لر دانشکده‌سینده برونو لاتورون حضورو ایله قورولدو.
لابراتوار یاشاییش کتابی ایله مشهور اولان برونو لاتور، اوّلده دورکیم ایله تانینان اجتماعی و دورکیم و گابریل تارد ایله تانینان ایکی جور جامعه‌شناسلیغی بیر بیریندن آییراندان سونرا دئدی: بیرینجی جریانین اؤزو خیردا و کلان نوعلارینا بؤلونور.
او آرتیردی: تارد غیر معمول بیر سؤال مطرح ائلیر: جامعه نه‌دیر؟ و ادامه‌ده بوتون انسانلار طرفیندن مختلف شکل‌لرده اعمال اولان ایکی طرفلی مالکیته اشاره ائلیر. اجتماعی نظریه‌ده بیر آنلاشیلمازلیق وار: اروپادا بیر نحله اجتماعی پدیده‌لری فرددن مطالعه ائله‌مگه باشلاییر و او بیری، جامعه‌دن باشلاییر. بیر حالدا کی مهم اولان بیلگیلری ییغماق اوچون ابزارین نه اولدوغودور. مثال اوچون سرمایه بازاری کیمی کلان پدیده‌لرین مطالعه‌سی Actor-Network Theory شبکه‌سی‌نین اکتیو اولدوغونا دقّت یئتیرمکله، دئیتالاری ییغماق ابزارلاریندا مهم ساییلیر.
او آرتیردی: سرمایه‌دارلیق کیمی کلان پدیده‌لری توضیح وئرمک اوچون بیر بانکدا اولان دئیتا ییغما ابزارلارینا متمرکز اولا بیلریک.
لاتور ادامه‌ده اجتماعی نظریه‌ده، مقیاسین مهم نقشینه اشاره ائتمکله دئدی: مقیاس، جامعه شناسلارین نظریه‌سینده او قدر مهم رول اویناییر کی اونلار مطالعه ائله‌دیکلری اساسیندا مثلاً خیردا و یا کلان مقیاسدا، یوللارینی بیر بیریندن آییریردیلار. آما سؤز بوردادیر کی بو مقیاسی بونلار اؤزلری دوزلدیبلر. بونا گؤره اکتیو شبکه‌ده (ANT) مقیاسی تماماً قیراغا قویوروق.
او آرتیردی: اجتماعی مسأله‌لرین مختلف سطحلرینده دوربین کیمی زوم ائله‌مکله بؤیوک سطح و کیچیک سطحه یئر به یئر اولماق امکانسیزدیر. بیزیم بو ساحه‌ده فرقلی ابزارلارا احتیاجیمیز وار. مقیاس بحثینده مقیاسلارین فرقلری یئرینه ایکی طرفلی رابطه‌یه دقت یئتیرمک لازمدیر. مثلاً سیاسی مسأله‌لرده بیر شخصین جهانی باخیشی اولدغونو مطرح ائدنده بو شخصین بؤلگه‌سل باخیشی‌دا اولمالیدیر. حقیقتده جهانی اولماق مقیاس مالکیتی دئییل بلکه اتصالات و ارتباطات مالکیّتیدیر.
پاستور اوچون آلتی ضلعلی رقابت
یازار : میرزه عبدالصمد ملکی | بؤلوم : اجتماعی
+0 به یه ن
نگهبان شوراسی کاندیدالارین صلاحیتلرینه یئتیشمه‌سین باشا وئردی و 6 نفری صلاحیتلی کاندیدا کیمی اعلام ائله‌دی:
اسحاق جهانگیری، حسن روحانی، سیدابراهیم رئیسی، محمدباقر قالیباف، سیدمصطفی میرسلیم و سیدمصطفی هاشمی‌طبا
بو نفرلرین اردیبهشتین 28-ی سحر ساعت 8 قدر تبلیغ ائتمک فرصتلری وار.
بو سئچگیلر نئچه قطبلی گؤروشسه ده اصلی رقابت ایکی دسته آراسیندادیر: اصلاح طلبلر و اصول گرالارین بیر دسته‌سی طرفیندن ایندیکی رئیس جمهور حسن روحانی و اصولگرالار او بیری دسته طرفیندن رئیسی و یا دا قالیباف.
بو آلتی نفردن علاوه 1636 نفرین‌ده صلاحیتی رئیس جمهورلوق کاندیدالیغینا تأیید اولمادی.