سس سرعتی ایله شهرلر آراسی سفر
یازار : میرزه عبدالصمد ملکی | بؤلوم : تكنولوژی
+0 به یه ن
سس سرعتی ایله شهرلر آراسی سفر
Hyperloop پروژه‌سی، مسافرت اوچون مناسب اولان ساعتده 1280 کیلومتر سرعتله گئده بیلن کپسول‌لارین دوزلمه‌سی‌نین آدیدیر. بو پروژه مطالعاتی مرحله‌سینی دالیدا بوراخیب و عملیاتی مرحله‌سینه آددیم آتیب.
بو پروژه برکلی و هاروارد کیمی دانشگاهلارین محققلری طرفیندن یولا سالینیب. کپسوللار، سس سرعتی ایله هاواسیز لوله‌لرین ایچینده حرکت ائلیه‌جکلر. Hyperloop Technologies شرکتی بو پروژه‌نین اجراسینی عهده‌سینه آلیب.
بو پروژه‌نین بیرینجی فازی، لاس وگاسلا لوس آنجلسی بیر بیرینه باغلایاجاق. بو مسیر، طیاره سرعتی کیمی 20 دقیقه‌ده طی اولاجاق آما داها آز خطر و داها آز هزینه ایله.
بو پروژه‌نین ایلکین سرمایاسی ۸.۵ میلیون دولار جیواریندادیر. آما برنامه‌یه گؤره ایکی طرفلی لوله، هر مایل اوچون 46 میلیون دولار جیواریندا خرج آپاراجاق. بئله‌لیکله بو پروژه‌نین بوندان آرتیق هزینه‌یه احتیاجی وار.
حسیّاتی تشخیص وئرن عینک
یازار : میرزه عبدالصمد ملکی | بؤلوم : تكنولوژی
+0 به یه ن
حسیّاتی تشخیص وئرن عینک
آلمانین فرانهوفر تحقیقات انستیتوسو، حسیّاتی تشخیص وئره بیلن بیر عینک دوزلدیب. بو عینکده میکرو کیچیک بیر دوربین تعبیه اولوب کی مقابل طرفین چهره‌سینده‌کی حالتلری تشخیص وئریب اونون نه حالدا اولدوغونو خبر وئریر.
اوندان علاوه بو سیستم مقابل طرفین یاشی و جنسیتینی‌ده تشخیص وئره بیلیر.
بو تکنولوژی، مقابل طرفین حسیّاتینی تشخیص وئره بیلمه‌ین اوتیسم کیمی ناخوشلوقلاری اولان شخصلره فایدالی اولاجاق.
بو عینکله گؤرونن صحنه‌لر ذخیره اولور و سونرادان اونلارا باخماق اولار.
قورتولمایان باطری
یازار : میرزه عبدالصمد ملکی | بؤلوم : تكنولوژی
+0 به یه ن
قورتولمایان باطری
«پیلو»، تازا دوزلمیش حرکتله شارژ اولان اوزون عمرولو باطریدیر.
فرانسه‌ده دوزَلن بو باطری‌نین اطرافیندا مغناطیس وار و اوچ ثانیه ترپتمکله شارژ اولار.
ایلکین نمونه کیمی دوزَلن باطری، بؤیوک اولدوغو اوچون استفاده‌یه قابلیّتی یوخدور آما یاخین گله‌جکده استفاده اولوناجاق اندازه‌ده دوزَله‌جک.
بو باطری‌نین ماده‌سی چئوره دوستودور و یوزه یوز تازادان استفاده اولونا بیلر.
تازا یئددی كهكشانین تاپیلماسی
یازار : میرزه عبدالصمد ملکی | بؤلوم : تكنولوژی
+0 به یه ن
تازا یئددی كهكشانین تاپیلماسی
ژاپن اؤلكه‌سینده سوبارو تلسكوپون واسطه‌سی ایله یئددی تازا كهكشان كشف اولوندو. نظره گلیر بو كهكشانلار بیردن بیره اوردا ظاهر اولوبلار.
كهكشان سالخیملاری كایناتین اَن جرملی وارلیقلاریندان ساییلیرلار و یوزلر و حتی مینلر كهكشانی اؤزلرینده یئر وئریرلر. بو كهكشانلار جاذبه گوجو ایله بیر- بیرلرینه باغلیدیلار.
نظریه‌لره گؤره دنیا 13.8 میلیارد ایل بوندان اوّل بؤیوك پارتلاما (Big Bang) آدلانان حادثه‌دن سونرا یاراندی. ائله او زمان اولیه اولدوزلار و كهكشانلار فورمالاشدیلار سونرا اونلارین ماوراء بنفش ایشیغی یونیزه اولدو كی بو پروسه‌‌یه كوسمیك تازادان یونیزه اولماق (cosmic reionisation) دئییلیر.
منجّملر، فضایی یونیزه اولماق حادثه‌سینی آراشدیرماق اوچون ایلكین لیمن – آلفا (LAEs) اشعه‌سینی ساچان كهكشانلاری، 13.1 میلیارد ایشیق ایلی فاصله ایله آراشدیرماغا باشلاییبلار.
آراشدیرما تیمی دكتر «ماسامی اوچی»نین باشچیلیغیندا ژاپندا لیمن- آلفا (LAEs) اشعه‌سینه ساچان كهكشانلاری تانیماق اوچون سوبارو تلسكوپوندان استفاده ائله‌ییبلر.
منجملر حیرت ایچینده بو كهكشانلارین 13 میلیارد ایل بوندان قاباقدا ظاهر اولماسینی گؤردولر.
بو آراشدیرمانین یازانلاریندان بیری اولان «آكیرا كونو» تأكید ائله‌دی: بو كهكشانلارین پاریلداماسی بیردن بیره یئددی سككیز یوز ایل بؤیوك پارتلامادان سونرا ظاهر اولدو. بو مسأله فضایی یونیزه اولماغین داها یاخشی دركینه كؤمك ائلیه‌جك.
بو تحقیقین نتیجه‌لری Astrophysical Journal مجله‌سینده منتشر اولوب.
كایناتین اَن گوجلو شئیی نه‌دیر؟
یازار : میرزه عبدالصمد ملکی | بؤلوم : تكنولوژی
+0 به یه ن
كایناتین اَن گوجلو شئیی نه‌دیر؟
گاما اشعه‌سی‌نین پارتلاماسی بیرینجی دفعه 1960-جی ایلینده آمریكا توسطی ایله كشف اولدو. بو ایلده آمریكا شوروی‌نین اتمی آزمایشلریندن گاما اشعه‌سی آثارینی تاپماق اوچون بیر مجموعه نظامی ماهواره‌دن استفاده ائلیردی. آما ماهواره‌لر، گاما اشعه‌سینی‌نین آثارینی میلیاردلار ایشیق ایلی اوزاق اولان منبعدن آلدیلار.
گونشین 150 برابری اولان اولدوزلار پارتلایاندا، دنیانی اَن پارلاق ایشیق منبعینی تولید ائلیرلر. بو حادثه‌نین تأثیرینده نئچه ثانیه‌ده فضادا یاییلان انرژی‌نین مثلینی گونش 10 میلیارد ایلده آنجاق تولید ائله‌یه بیلر. بو مقدار انرژی 10 تریلیون تریلیون میلیار مگاتن آغیرلیغیندا بومب ایله برابر گلر!
بو پارتلامالار «گاما اشعه‌سی آلوولاری» (GRBs) آدیندا اشعه‌لر تولید ائلیرلر. منجّملرین دئدیگینه گؤره بو، كایناتین اَن گوجلو شئیی ساییلیر كی آیری سیاره‌لرده حیاتین اولماق احتمالینی آرادان آپاریر. گاما اشعه‌سی آلوولاری، آیری سیاره‌لرده‌كی حیاتی سیلیب سوپورور واونلاردا حیاتین یارانماسینا امكان وئرمیر.
آتاكاما چؤلونده‌كی 66 بؤیوك تلسكوپا مجهز اولان آتاكاما سیستمی (ESO) ایله بو آلوولاری تاماشا ائله‌مك اولار.
گاما اشعه‌سی آلوولاری (GRBs) نئچه ثانیه و یا دقیقه و یا حتی نئچه ساعت چكه بیلر.
ایندیه‌جن سامان یولو كهكشانیندا گاما اشعه آلوولاری گؤرونمه‌ییب و تصادف نتیجه‌سینه گؤرونن اشعه احتمالاً 7500 ایشیق ایلی اوزاقدا باش وئرن پارتلاما نتیجه‌سینه یئره چاتمیشدی كی بو فاصله امن فاصله ساییلیر.