معظم انقلاب رهبرین حكمی ایله، محمد سرافراز رادیو تلوزیون رئیسی اولدو
یازار : میرزه عبدالصمد ملکی | بؤلوم : خبرلر
+0 به یه ن
معظم انقلاب رهبرین حكمی ایله، محمد سرافراز رادیو تلوزیون رئیسی اولدو
معظم انقلاب رهبری حضرت آیت الله خامنه‌ای بیر حكمده عزت الله ضرغامی‌نین چالیشمالاریندان قدردانلیق ائله‌مكله، محمّد سرافرازی بئش ایللیك دؤره اوچون، جمهوری اسلارمی رادیو تلوزیونون رئیسی عنوانیندا تعیین ائله‌دی.
معظم انقلاب رهبری‌نین اطلاع‌رسانی سایتی‌نین وئردیگی گزارشه گؤره، بو حكمون متنی بئله‌دیر:
بسم الله الرحمن الرحیم
جناب آقای محمّد سرافراز دام توفیقه
مهندس سید عزت الله ضرغامی‌نین یورولماز و اورك یاندیران و ابتكارلی اولان مسئولیت دؤره‌سی‌نین باشا چاتماسی ایله سیزین صلاحیتلریزه دقّت یئتیرمكله و ملی رسانه‌ده اوزون تجربه‌زدن و بو بؤیوك و مهم مجموعه‌دن وسعتلی تانیشلیغیزدان خبردار اولماقلا، سیزی بئش ایللیك دؤره اوچون، جمهوری اسلامی رادیو تلوزیون سازمانی‌نین رئیسلیگینه منصوب ائلیرم.
رادیو تلوزیون سازمانی، خطرلی «جامعه‌نین عمومی افكاری و فرهنگی‌نین مدیریتی و هدایتی» مأموریّتی ایله عمومی دانشگاه كیمی، رسانه ساحه‌سینده مترقی و درین حرفه‌ای برنامه‌لره دایانماقلا، ملت آحادیندا دین، اخلاق، اومید، آگاهلیق و اسلامی- ایرانی یاشاییش طرزینی ترویج ائله‌مك وظیفه‌سینی داشییر. ملی رسانه‌نین ایندیكی مقطعده تاریخی مسئولیتی، اسلامی ایران انقلابی‌نین كیملیك و فرهنگی‌نین استقلالینی ساخلاماق و ارتقا وئرمكدیر. اسلامی نظامین یوكسك هدفلری مسیرینده، ملت آحادی‌نین «ملّی عزم، معنوی شادلیق و انقلابی نشاط»ی، درین و وسعتلی عمومی معرفت و آگاهلیغا باغلیدیر و احتیاجی وار كی اسلامی انقلابین فرهیخته و انگیزه‌لی دلبسته‌لری و ناب دینی فكری‌نین تولید سرچشمه‌لری ایله بیرلشسین. رادیو تلوزیون سازمانی هابئله اؤلكه‌نین ترقّیسینه تشویق ائله‌ین و حركتلندیرن موتور كیمی، ملتین عمومی بسیجینده هر طرفلی و ابتكارلی مدیاسال حمایت وظیفه‌سی و همچنین اؤلكه اُفقونون و نظامین كلان سیاستلرین اجراسیندا و هدفلری‌نین تأمین ائله‌مه‌سینده اجرایی مدیریّته كؤمك ائله‌مك وظیفه‌سینی داشیر. ملی رسانه‌نی انشاء الله بو بؤیوك مسئولیتده كؤمك ائله‌ین راهبردلارین اهمیتلی‌لری ضمیمه‌ده ابلاغ اولور.
نهایتده اؤز مسئولیت دؤرونده ملی رسانه‌نین سیاسی، اجتماعی، و فرهنگی قسمتلرده گؤزه گلیم شكلده نقش اوینایا بیلمه‌سی اوچون، ترقّیسینه شرایط یارادان جناب مهندس ضرغامی‌دن صمیمانه تشكر ائلیرم.
الله تعالی درگاهیندان سیزین كی اسلامی انقلابین عزیز شهیدلری خانواده‌سینه منسوبسوز، الله‌ین عنایتلرینه دایانماقلا بو خطرلی و حساس مسئولیتین یئرینه یئتیرمگینده توفیقیزی ایستیرم و سیزه و حرمتلی همكارلاریزا دعا ائلیرم.
سیّد علی خامنه ای - ۱۵آبان ۱۳۹
نباتی نشریاتی طرفیندن «میلیاردر بالاسی/ابن المیلیاردر» عنوانلی عربجه توكجه حكایه لر كتابی تبریزده یا
یازار : میرزه عبدالصمد ملکی | بؤلوم : خبرلر
+0 به یه ن
نباتی نشریاتی طرفیندن «میلیاردر بالاسی/ابن المیلیاردر» عنوانلی عربجه توكجه حكایه لر كتابی تبریزده یا
نباتی نشریاتی طرفیندن «میلیاردر بالاسی/ابن المیلیاردر» عنوانلی عربجه توكجه حكایه لر كتابی تبریزده یاییلدی.
كتابلا داها آرتیق تانیش اولماق اوچون كتابین اؤن سؤزونو بوردا نقل ائدیریك:
اؤن سؤز:
مفهوملارین
افاده‌سی و انتقالی اوچون ذهنی تصویر یاراتماق ان دوزگون و اویغون
وسیله‌دیر. ذهنی تصویر یاراتما‌نین تانینمیش یولو دا حكایه و ناغیلدیر.
حكایه واسطه‌سیله انسانلارین ذهنینده تصویرلر یارانیر و بو تصویرلر،
افاده‌نین انسان شعورونا هوپماسی اوچون شرایط یارادیر.
بو
ادبی نوعدان استفاده ائتمگین اوزون گئچمیشی وار. حتّی اسلام دینی‌ده مختلف
ساحه‌لرده انسانلارا دوغرو و یالنیش عمللرین نتیجه‌سینی گؤسترمك اوچون
حكایه و ناغیلدان استفاده ائتمیشدیر. گئچمیش قوملارین حكایه‌سینی
تعریفله‌مكدن توتموش، غیبتی اؤلو قارداشین اتینی یئمگه بنزتمه‌سینه قدر
اونون استفاده‌سی مشاهده اولونور.
یاخشی
اولار دنیایا گؤزللیك بخش ائدن اخلاقی دَیَرلری خاطرلاتماق اوچون _كی
پیغمبریمیز حضرت محمد ده (ص) محض بو سببه گؤره مبعوث اولونوب_ حكایه و
ناغیلدان استفاده ائدك. پیغمبر (ص) بویوروب: «إنّما بُعِثتُ لأُتَمِّمَ
مَكارِمَ الأخلاق». البته من اخلاق گؤزل‌لیكلرینی بوتونلَتمك اوچون مبعوث
اولموشام. (سفینه البحار ،ج1،ص 410)
دانیشیقدا
مختلف حكایه‌لرین یئر آلماسی، نظرده توتولان آنلامین مخاطبه داها یاخشی
انتقال تاپماسینا امكان یاراتماقدان علاوه قولاق آسانلاری‌دا كسالتدن
كنارلادیب سؤزون دوامینی سئوه-سئوه دینله‌مكلرینه سبب اولار. دانیشیغیندا
یئر به یئر حكایه سؤیله‌ین انسانین سؤز-صحبتی سئویملی و اورگه یاتیم اولار،
بئله بیر شخص هر یئرده سئویلر و دانیشماسی طلب اولونار.
بو
اوزدن گؤزل و اخلاقی دَیَرلره سؤیكه‌نن حكایه‌لری، عرب دیلیندن چئویریب
بیر كتابدا توپلاماق قرارینا گلدیم. سئچیب ترجمه ائتدیگیم حكایه‌لرین
هامیسیندا دوشونجه‌لی اخلاقی درسلر وار. حكایه‌لرین عربجه‌سینی‌‌ده اؤز
دیلیمیزله یاناشی گتیرمگی فایدالی گؤردوم. عرب دیلی‌نین هَوَس‌كارلاری بو
كتاب واسطه‌سی ایله بو دیلی اؤیرنمگه داها هَوَس قازانیب لغت بیلیمی
داییره‌لرینی گئنیشلندیره بیلرلر.
انسان
الیندن چیخمیش هر بیر اثرین البته قصورلاری و سهولری اولا بیلر. بو اثرده
اولا بیلن قصورلارین گله‌جكده‌كی ایشلرده اولماماسی اوچون عزیز
اوخوجولاردان اؤز نظرلر و رأیلرینی مؤلّفه چاتدیرمالاری ایسته‌نیلیر.
انشاءالله بو كیچیك تحفه اوخوجولارین رغبتینی قازانیب بو یولون دواملی
اولماسینا سبب اولار.
صمد كامران قراملكی – قم 1392
اورمیه گؤلونون نجاتی خردادین ایكینجی یاریسیندان باشلیر
یازار : میرزه عبدالصمد ملکی | بؤلوم : خبرلر
+0 به یه ن
اورمیه گؤلونون نجاتی خردادین ایكینجی یاریسیندان باشلیر
شرقی آذربایجان استانداری خردادین ایكینجی یاریسیندان اورمیه گؤلونون نجات طرحی‌نین باشلانماسینی گؤزلدیگینی دئمكله آرتیردی: استانین فرهنگی- اجتماعی شوراسی مركزی شورانین تصویبی ایله تشكیل تاپیب.
فارسین تبریزدن وئردیگی خبره گؤره، جبارزاده اورمیه گؤلونون نجات جلسه‌سینده دئدی: دكتر كلانتری‌نین و ایش بیلن دسته‌لرین گئجه- گوندوز تلاشلاری سایه‌سینده، بو گون گؤلون قورتولماسینا اینانیریق.
او آرتیردی: شرقی آذربایجانین بوتون اجرایی دستگاهلار و مسئول‌لاری تمام گوجلری ایله اورمیه گؤلونون نجات ستادی‌نین كناریندادیلار و بو طرحین اجرا ایشلری‌نین خردادین ایكینجی یاریسیندان باشلاماسینی گؤزلوروك.
جبارزاده آرتیردی: بو شورا اوچ شمال غرب استانلاریندا تشكیل تاپیب و شرقی آذربایجاندا 29 ثابت عضوی وار. مربوطه دستگاهلارین اجرایی مدیرلری، مجلس و استان شوراسیندان نماینده‌لر، غیردولتی تشكیلاتلاردان و محلّی آغ ساققال‌لاردان نماینده‌لر، دانشگاهدان و ایكینچیلیك بؤلوموندن نماینده‌لر و ایكی نفر حقیقی و یا حقوقی شخصیت استاندارین انتخابی ایله بو شورانین عضولری دیلر.
مذهب اختلافی سالماق و افراط، ملّی بیرلیگی داغیدار
یازار : میرزه عبدالصمد ملکی | بؤلوم : خبرلر
+0 به یه ن
مذهب اختلافی سالماق و افراط، ملّی بیرلیگی داغیدار
حضرت آیت الله خامنه‌ای دولتلرین جماعتین دینی و مذهبی ایله رابطه قورماغی اونلارین موفقیت سببی بیلیب آرتیردیلار: بعضی افراطچی مذهبی جریانلارا اسلام مذهبلری آراسیندا اختلاف سالماغا امكان وئرمه‌مك لازمدیر.
معظم رهبرلیك مقامی‌نین سایتی‌نین وئردیگی خبره گؤره، اسلام انقلابین معظم رهبری حضرت آیت الله خامنه ای چهارشنبه گونو آذربایجانین رئیس جمهوری جناب الهام علی‌یئوله گؤروشده، ایكی اؤلكه‌نین قونشولوق و مذهبی، تاریخی و فرهنگی بیرلیكلرینی ایكی دولتین مناسبتلرینی تقویت ائله‌مگه تأثیرلی عامل ساییب و تأكید ائله‌دیلر: توافقلرین دالیسینی توتماق و سیاسی اراده ایله بدخواهلارا فائق گلمكله ایكی دولت و ملّتین رابطه‌لرینی گوندن گونه محكملندیرمك اولار.
حضرت آیت الله خامنه ای جماعتین مذهبی اعتقادلاری ایله رابطه قورماغی دولتلرین موفقیتینه سبب اولماسینا تضمین كیمی بیلیب آرتیردیلار: بعضی افراطچی مذهبی جریانلارا اسلام مذهبلری آراسیندا اختلاف سالماغا امكان وئرمه‌مك لازمدیر.
او، مشترك اقتصادی كمسیونون تشكیلی باره‌ده ایران و آذربایجان رئیس جمهورلاری آراسیندا اولان توافقلری مطلوب ایش بیلیب دئدی: ایكی طرفین ظرفیتلری و امكانلاری ایله مقایسه‌ده ایكی اؤلكه آراسینداكی ایندیكی رابطه‌لر چوخ آزدیر و بو سفرین اقتصادی و بؤلگه‌سل رابطه‌لرین چوخالماسینا مقدمه اولماسینا اومیدیمیز وار.
انگلیس و ایرانین مستقیم رابطه‌لری تازادان باشلادی
یازار : میرزه عبدالصمد ملکی | بؤلوم : خبرلر
+0 به یه ن
انگلیس و ایرانین مستقیم رابطه‌لری تازادان باشلادی
انگلیس و ایرانین رابطه‌لری اسفندین اوّلیندن مستقیم صورتده تازادان باشلاندی. خارجه وزارتین آمریكا و اروپا معاونی، مجید تخت روانچی، ایسنایا دئدی:
اسفندین اوّلیندن انگلیس و ایرانین رابطه‌سی غیر مقیم كاردار سطحینده و حافظ منافع اولمادان، باشدان باشلاندی.
او آرتیردی: حافظ منافع دفترلری‌نین باغلانماسی ایله ایكی اؤلكه‌نین رابطه‌سی‌نین مسئولیّتی غیر مقیم كاردارلارا تاپیشیریلدی.
روانچی دئدی: انگلیس و ایران پرچملری اسفندین اوّلیندن بو اؤلكه‌لرین سفارتخانالاریندا اسمگه باشلایاجاق.
1390-جی ایلین آذر آیی‌نین 8-ده بیر عدّه معترضین، انگلیسین تهرانداكی سفارتینه داخل اولدوغوندان سونرا، انگلیس بیر طرفلی اولاراق رابطه‌لری قطع ائله‌دی. اوندان سونرا بو اؤلكه‌نین دولتی، دیپلوماتلارینی ایراندان خارج ائله‌مگیندن خبر وئردی و ایرانلی دیپلوماتلاردان 48 ساعت ایچینده انگلستانی ترك ائله‌مكلرینی ایسته‌دی.
ایكی اؤلكه‌نین سفارتی باغلاناندان سونرا، سوئدین تهرانداكی سفارتی، انگلستانین حافظ منافعی، و مقابلده عمانین لندنده‌كی سفارتی ایرانین حافظ منافعی اولدو.
ایرانین تازا دولتی ایش اوستونه گلندن سونرا انگلستانین نخست وزیری روحانی‌یه تبریك نامه ضمنینده رابطه‌لرین یوكسلمه‌سینه علاقه‌سینی بیلدیردی. اوندان سونرا ایكی اؤلكه‌نین خارجی ایشلر وزیرلری، محمد جواد ظریف و ویلیام هیگ، سازمان مللین عمومی مجمعینده گؤروشوب اؤز معاونلرینی بو مسأله‌یه مأمور ائله‌دیلر.