تشویق و یا دانلاماق
یازار : میرزه عبدالصمد ملکی | بؤلوم : اجتماعی
+0 به یه ن
 |
||
|
اینسانلارین یاخشیلیقلارین دیله گتیرمك, اونلارین ایصلاحی اوچون اَن گؤزل یوللاردان ساییلیر. آما تأسوفله جماعتین چوخو اونون ترسه‌سین ائلیرلر، یعنی همیشه خطاكار اینسانین منفی طرفلرین و ایشلرین اونون یادینا سالیب اونو دانلیرلار و نظرلرینه بئله گلیر كی بو ایش باعیث اولار او, ایشتیباهلارین جوبران ائله‌سین و منفی طرفلری اؤزوندن اوزاقلاشدیرسین. شكسیز بو ایش یا دوستلارلا و یا جماعتله ایشتیباهدیر. دوز یول بودور كی پیسلیكلری آرادان آپارماق اوچون یاخشیلیقلاری و گؤزللیكلری سایاق و جماعتی اونلارا طرف تشویق ائدك. مثلاً قارانلیغی آرادان آپارماق اوچون اونا یامان دئمكله و اونو دانلاماقلا بیر ایش گؤرمك اولماز، بلكه بیر شع یاندیرماق اونلاردان داها چوخ فایدالی اولار و بئله‌لیكله قارانلیق آرادان گئدر. جامیعه موریدینده و جماعتین روحی و معنوی ایشلرینده‌ده وظیفه‌میز وار اونلارین ایچینده‌كی قارانلیقلاری لعنتله‌مك یئرینه، آرزو شمعلرینی اوركلرینده یاندیراق. بو ایش, اونلاری ایشقیلیغا طرف آپارماقدان علاوه باعیث اولار اؤزوموزه‌ده آللاه یانیندا اجر اولسون. حضرت علی (ع) بویورور: هر كس بیر موسلمانی تعریفله‌یه اونون اوچون اجر وئریله‌جك». تعریفله‌مكدن منظور اونون یاخشیلیقلارین سایماق و اونلارا طرف تشویق ائله‌مكدیر. تعریفله‌ین اوچون، بو ایشین ایكی نتیجه‌سی وار: آللاه طرفیندن وئریلن اجر و جماعت طرفیندن قاییدان منفعت. جامیعه بیر آغاج كیمیدیر كی بیر شاخه‌سی آیری شاخه‌لره كؤمك ائله‌سه حقیقتده آغاجا و اؤزونه كؤمك ائدیب. گرك اینسانلارین یادینا سالاق كی سنین ایچینده بؤیوك بیر شخصیت گیزلنیب و سن گرك اونو ائشیگه چیخاردیب پدیدار ائده‌سن و اونون اؤلوب ایتمه‌سینه ایجازه وئرمیه‌سن. و بئله‌لیكله تشویق و تعریفله اینسان قاباغا گئدر و ایچینده‌كی انرژیلر آزاد اولار. گرك اینسانلارین یادینا سالاق كی اونلارین ایچینده خلیفةالله‌لیق پوتانسییئلی وار و بیر اینسان كیمی اونو پدیدار ائله‌مك اونلارین وظیفه‌سیدیر. خطاكار اینساندان اینتیقاد ائله‌مك باعیث اولار او اولكودولسون و اعتیناسیز اولسون. خطاكار اینسانی تشویق ائله‌مگین اَن یاخشی یولو بودور كی خطانین و ایشتیباه عملین اؤزوندن اینتیقاد ائده‌سن آما خطاكارین شخصیّتینه توخونمایاسان. |
||
