بو پئشه گلیر، او پئشه گئدیر
یازار : میرزه عبدالصمد ملکی | بؤلوم : اجتماعی
+0 به یه ن
 |
||
|
بیر گون ائشیدیرسیز كی قیشقیرماق آدیندا بیر پئشه یارانیب كی او پئشه‌ده ایشله‌ینلر قیشقیریب توكانلارا موشتری ییغیرلار. اینسانلار نه واختدان پئشه صاحیبی اولدولار؟ اونلار همن زماندان كی كؤهوللرده اودون اطرافینا ییغشیردیلار و اونون آلوولارینا باخیردیلار پئشه صاحیبی‌ایدلر. اونلار شیكارچیدیلر و یاشاییشلارینی بو یوللا كئچیندیریردیلر. ایللر كئچندن سونرا اونلار اكینچی و داوارچی اولدولار و یاواش یاواش آلیش-وئریشه‌ده باخدیلار. اینسانلار بیر مودّت سونرا جینس و كالا موقابیلینده پول آلدیلار و بئله‌لیكله اینسانلارین احتیاجلاری چوخالدیقجا پئشه‌لرین سایی چوخالدی. پئشه‌لرین یارانما سببی اینسانلارین بیر زمان‌مقطعینده، خاص بیر شئیه احیتاجلاری اولماسیدیر. مثلاً بیر زمان مودیریّت آدیندا بیر پئشه یوخیدی و احتیاج اولدوغوندا بو پئشه یاراندی. پئشه‌لر ده اینسانلار كیمی یارانیر و اؤلور. هر لحظه كی بیر پئشه آرادان گئدیر بیر آیریسی اونون یئرین توتور. مثلاً ایندیكی جماعتی، تیلویزیون كیمی مشغول ائدن او قدر مشغولیّت وار كی داها دوروب زنجیر قیران پهلوانلارا باخماغا هئچ كسین حؤصله‌سی اولماز. زمان بویو اینسانلار بعضی خیدمتلر و جینسلردن بی نیاز اولور و بو باعیث اولور كی او جینس و خیدمت سایه‌سینده پئشه صاحیبی اولان آداملار ایشسیز قالسینلار. و دوزگون بیر مودیریّتی اولان جامیعه‌نین مودورلری بو صینفین فیكرینده اولوب اونلارین آشاغی ایقتیصادی طبقه‌یه دوشمكلری‌نین قاباغین آلارلار. |
||
