غرب فیلسوفلارین نظرینده شادلیق
یازار : میرزه عبدالصمد ملکی | بؤلوم : اجتماعی
+0 به یه ن
غرب فیلسوفلارین نظرینده شادلیق
هر زاد
كیمی شاد یاشاماغین‌دا اؤزونه مخصوص اصوللاری وار، اونلار اولمادان شادلیغا چاتماق
اولماز. عالیملر شادلیق اوچون موختلیف تعریفلر دئییبلر. مثلاً ارسطو دئییر: «عادی
اینسانلار لذّتی شادلیق بیلیرلر، موفّق اینسانلار دوزگون عملی شادلیقلا برابر
بیلیرلر و عالیملر تفكّورلی و آختاریشلی حیاتی شادلیغا موعادیل بیلیرلر». جان‌لاك
شادلیغین حیاتدا لذّتلر سایی‌سینا باغلی اولدوغونو اینانیر. موعاصیر عالیم «مك‌گیل»ده
شادلیغی ایرضا اولموش مئییل‌لرین لذّتلرینده بیلیر. برتراند راسل دئییر: «رغبت، شاد
یاشاماغین لاپ عمومی علامتی‌دیر».
بعضی‌لری‌ده همیشه گولماغی و دئییشمه‌سیز بیر حیاتی شادلیق بیلیرلر. آما شادلیقدان داها كامیل تعریف وئرمك اولار.
شادلیق، شخصی حیاتدا قالارگی خوشبختلیك حیسّی، اؤزونه و آیریلارینا فایدالی اولماق و آرزولارا چاتماقدیر. بو تعریف چوخ ایده‌آلا اوخشاسا دا اینسان الی چاتماز دئییل.
شاد یاشاماغین اصولو:
اؤز دَیَرلرینی تانیماق
آیریلارین یاخشیلیقلاری‌نین قدرینی بیلمك
بدنین تربیتی
آللاه نعمتلریندن لذت آلماق
اؤزوندن و آیریلاریندان شادلیق گؤزله‌مك
حیاتدان ایستگی بیلیب اونون یولوندا ایقدام ائتمك.
ایندیه قدر فیكیر وئرمیسیز كی یاخشی حیسّیمیز اولاندا آیریلاری‌دا اوّلدن داها یاخشی نظره گلیرلر؟ آرخایین اولون دونیا بیزیم اینعیكاسیمیزدیر.
بوتون دوشونجه و ایشلریمیزین نئجه‌لیگی اؤزوموزه نئجه باخماغیمیزدان آسیلیدیر. تجروبه‌لر، موفقیّتلر، اوغورسوزلوقلار و اؤزوموز باره‌ده اولان فیكیرلر هامیسی اؤزوموزدن اولان ذهنیمیزده‌كی تصویری یارادیر.
بونا گؤره حیاتی نه قدر سئودیگیمیزی و دقیقاً نه قدر موفّق اولماغیمیزی ذهنیمزده‌كی تصویریمیز تعیین ائلیر.
همیشه گؤزله‌دیگیمیز شئیی جذب ائلیریك. دونیا اؤزوموزو لاییق بیلدیگیمیز كیمی بیزیمله یاناشیر.
اینسانین اؤزوندن اولان ذهنینده‌كی تصویری ترموستات كیمی عمل ائلیر و اونون داورانیشلاری بو تصویرین محدوده‌سینده حیاتا كئچیر. بو مسأله ناخوشلوق ساییلان تكبّوردن فرقلیدیر. بونون معناسی اؤز سئورلیگین موثبت معناسیدیر. بو اؤز سئورلیك بیزی اؤزوموز و آیریلارین ایستكلرینه احتیرام قویماغا گوج وئرر. ائله كی بیز، موفقیّتلریمیزین تعریف اولدوغوندا اؤزوموزدن چیخماریق و ضعیف نوقطه‌لریمیزدن بدحال اولماییب اونلارین گوجلندیرمه‌سینه چالیشاریق. بو آیریلارین تعریفیندن تأثیر آلمادان اؤز دَیَرلریمیزین قدرینی بیلمك معناسینداندیر.
آیریلارین بیزیمله داورانیشلاری همن بیزیم اؤزوموزله اولان یاناشمامیزدیر. رابیطه قوردوغوموز اینسانلار، بیزیم اؤزوموزه احتیرام قویوب قویمادیغیمیزی چوخ تئز تشخیص وئررلر. بیز اؤزوموزه احتیرایم قویورساق اونلاردا بو ایشی گؤره‌جكلر.
چالیشمالی‌ییق اؤزوموزو احتیراما لاییق بیلك. غم حیسّیمیزی آغلاماقلا گؤستردیگیمیز كیمی شادلیغیمیزی‌دا گولر اوزلو اولماقلا گؤسترمه‌لی‌ییك. اینانمالی‌ییق كی بیر زای آلما بیر قوتو ساغ آلمانی زای ائلر.
عشق و احتیراما لاییق اولدوغوموزو اینانمالی‌ییق. ذهنیمیزده اولان تصویریمیز ساغلام اولامازسا شادلیغی ردّ ائلر. ذهنیمیزدن كئچن هر فیكیر بدنیمیزین شیمیایی تركیبلرینه اثر قویار. موثبت اولارسا بیزی سئویندیرر منفی اولارسا غملندیرر.
رفتار اولگوسونو دگیشدیرمك
شاد یاشاماغین ایلك آددیمی، رفتار اولگوسونو دگیشدیرمكدیر. راحاتلیقلا اله گلمه‌سه‌ده ایمكانسیز دئییل. حیاتیمیزین هر هانسی مرحله‌سینده اولساق بئله، اونا ال تاپماغا ایمكان وار. همیشه اؤزوموز باره‌ده موثبت دوشونمه‌لی‌ییك.
«آن»دا یاشاماق
بوتون وارلیغیمیز، بو «آن»لاردیر. ذهنیمیزین دینجلیگی و شخصی موفقیّتیمیز، آنلاردان نئجه ایستیفاده ائله‌مگیمزه باغلیدیر. دونن نه اولوب و صاباح نه اولا بیلره باخمایاراق ایندی‌كی آندا یاشاماغیمیز موهیمدیر. «ایندی»ده یاشاماق اونو ائشیگه آتماق یئرینه اونو اورگه یاتیم ائله‌مك معناسیندادیر.
گولمك
گولنده هر زاد جیسمیمیز و ذهنیمیزین نفعینه اولور. گولماق آغریلارا تسكینلیك وئرر. شادلیق هونری چتینلیكلره لاپ تئز زماندا گوله بیلمك گوجونه صاحیب اولماق معناسیندادیر. موشكوللره لاپ تئز گوله یبلن اینسان اومیدسیزلیگی داها تئز اؤزوندن اوزاقلادا بیلیب گولوش درمانیندان داها یاخشی ایستیفاده ائده بیلر. گولمك جیسمی ساغلاملادیب عؤمرو اوزون ائلر.