اوشاقلارین تشویق و تنبئهی
یازار : میرزه عبدالصمد ملکی | بؤلوم : اجتماعی
+0 به یه ن
اوشاقلارین تشویق و تنبئهی
تشویق و تنبئه، قایدالارین رعایتی و نظمین قورولماسی اوچون ایكی تربیه یولودور. اونلار یئرینده و اؤلچوسو قدر اولمالیدیلار.
تشویق نه‌دیر؟
تشویق، اینسانی ماراغا گتیرن و استعدادلارینی چیچكلنمگه تحریك ائد‌ن و اونا داخیلی راضیلیق وئرن اصولدور. تشویق آیریلاری طرفیندن فردین داورانیشینی تقدیر ائله‌مك اوچون مادی و یا معنوی ایقدام ساییلیر.
تنبئه نه‌دیر؟
اینسانین روحی و یا جیسمی‌نین اینجیمه‌سینه سبب اولوب بیر داورانیشین قارشیسینی آلان هر بیر زادا تنبیه دئییلر. تشویقده اولان كیمی تنبیه‌ده جیسمی و روحی اولا بیلر.
تشویق و تنبئهین اثری، روشوتله موكافاتی بیر-بیریندن آییرا بیلدیگیمیز زمان، موناسیب اولار. موكافات وئرمك اوشاغین دَیَرینی تثبیت ائدیب اونون موناسیب داورانیشینی و اخلاقینی دواملی ائلر.
اوشاق آتا آنا طرفیندن موكافاتلاندیغی زمان، آتا آنانین گؤزونده یاخشی اولان عملی تانییار و یا عكسینه آنا توكاندا اوشاغی‌نین الیندن جانا گلیب ایسته‌دیگینی اونا آلیرسا، بو ایشین تكراری اوشاغین سیرتیق اولماسینا سبب اولار. بئله جاییزه‌لر اوشاغا روشوت وئرمك كیمی بیر شئیدیر و اونون داورانیشیندا منفی تأثیر قویار.
موتخصیصلرین چوخو بئله اینانیرلار كی منفی تأثیری اولان روشوتلری مثلاً «بو ایشی گؤرمه‌سن، بونو سنه وئرمه‌رم !» قیسا مودّت اوچون تأثیرلی اولسا دا اوزون مودّتده اثرینی ایتیرر. آتا آنا یاخشی و لاییقلی داورانیشلاری ترویج ائله‌مه‌لی و اونون موقابیلینده اوشاغا جاییزه وئرمه‌لیدیلر.
موكافات برنامه‌لری
1. موناسیب، یئرینده و واختیندا اولان موكافات
اوشاغین هر دفعه دوزگون عمل ائله‌دیگینده، موكافات لازیمدیر. لاكین بعضاً موكافاتدان دواملی ایستیفاده ائتمك موناسیب دئییل. چونكی اولا بیلر اوشاق موكافات آلماقدان یورولا و طلب اولونان عملی آز یئرینه گتیره و یا ایمكانی وار والدینین، هر داورانیشین موقابیلینده موكافات وئرمگه فورصتلری اولمایا و یا اولا بیلر اوشاغین هر موناسیب داورانیشینا موكافات وئرمگه ایمكان اولمایا.
2. اؤز اینتیظارلارینی موعیّنلشدیرمك
اوّلده اوشاقدان طلب ائله‌دیگیز ایشی سئچین. مثلاً یاتاندا باهانا آختارماسین، جمعده موناسیب داورانیشی اولسون. سونرا وظیفه‌لرینی و گؤرولمه‌لی ایشلری اونا بیر-بیر سایین. اوشاغین داورانیشی گؤزله‌دیگیز كیمی اولسا اونا موكافات وئرین.
3. اوشاقلا مصلحتلشمك موكافات ساییلار
انگیزه یارادان موكافات باره‌ده اوشاقلا مصلحتلشیب، موكافاتین ارزیشلرینی اونا ساییین.
4. تشویقده واختی رعایت ائله‌مك
تشویق حؤكماً بللی اولان واخت و یا اوشاغین داورانیشی دوزلندن سونرا اولمالیدیر. ایستدیگیز داورانیش اونون بیر عادی داورانیشینا چئوریلنه قدر، تشویقی ایدامه وئرین.
5. تشویق اوچون هدف بللی ائدین
تشویقدن هدف، اوشاقلاری تربیه‌ده دوز یولو باشلاماغا حاضیرلاماقدیر، بونا گؤره هر ایش اوچون اونو تشویق ائله‌مك لازیم دئییل. اوشاغیز هر ایشی جاییزه و روشوت موقابیلینده انجام وئرمگه اؤیرنیبسه، ایشی دایاندیریب، اونون تربیه یولونو دگیشدیرمه‌لیسیز.