اوشاغین تربیتی اوچون هئچ واخت تئز دئییل
یازار : میرزه عبدالصمد ملکی | بؤلوم : اجتماعی
+0 به یه ن
اوشاغین تربیتی اوچون هئچ واخت تئز دئییل
اوشاغین تربیتی اوچون هئچ واخت تئز دئییل ! بو سئویملی موجودلار چوخ عاغیللی‌دیلار و هر شئیی ایلك باشدان چوخ یاخشی اؤیرنیرلر.بیر یاشلی اوشاق، یئمگینی بوشقابدان ائشیگه آتاندا، والدین اونونلا نئجه رفتار ائله‌مه‌لی اولدوقلارینی بیلمیرلر. بیر طرفدن‌ده بئله بیلیرلر اوشاغین یاشی آزدیر و اونو تربیت ائتمك اولماز. آما بئله دئییل. اوشاغا خوش دیلله اؤیرتمك اولمایاندا، اولا بیلر یاخشی پیسی اونا اؤیرتمك لازم اولسون. والدین اكثراً تربیتی تنبیه‌له عوضی توتورلار. آما تربیتین بیناسی اؤیرتمگه دایانیر. بیر یاشلی اوشاغا محدودیّتلری اؤیرتمك لازمدیر. چوخ ساده یوللارلا اوشاغی دوزگون رفتارا طرف هدایت ائتمك اولار.
اوشاغین الیندن ائله‌دیگی سهوه گؤره غضبلندیگیز زمان اونا چیغیرمایین، اؤزوزو كنترل ائدین. چیغیرماغیز باعث اولار اوشاق لج ائله‌سین. چیغیرماق یئرینه اونو فوراً و آراملیقلا سئودیگی ایشه تشویق ائدین. مثلاً گؤرسز اوشاق مبلین دسته‌لرینه دیرماشیر، چیغیرماق یئرینه اونو یئره قویون و اویناتمالیلاری ایله اونونلا اوینایین یا اونا كتاب اوخویون. بو ایش، اوشاغین اشتباهلارینا مانع اولماقدان علاوه اونا بعضی ایشلرین گؤرمه‌مه‌لی اولدوغونو اؤیردر.
اوشاغا ناهاردان و یا شامدان اوّل، قیویر-زیویر یئمگی قدغان ائله‌میش اولساز، آغلاییب عالمی بیر-بیرینه قاتسا دا اونا بو ایشه اجازه وئرمه‌مه‌لیسیز. بیر دفعه تسلیم اولورساز، او بو ایشی اؤیرنر و همیشه چیغیرماق و آغلاماقدان اسلحه كیمی سیزین علیه-یزه استفاده ائلر.
اوشاغین تربیتی اوچون هئچ واخت اونا منطقسیز سؤز دئمه‌یین و دئدیگیزین‌ده اوستونده دایانین. بو مسأله‌ده آتا-آنا هماهنگ اولمالیدیلار. اولماز كی بیری اوشاغا طرف چیخسین و او بیری سؤزون یئریتمگه چالیشسین. بونون نتیجه‌سی مثبت اولماز.
باشاردیغیز قدر مثبت اولون. اوشاغا همیشه «یوخ»، «دَیمه»، «ائله‌مه» و بو كیمی سؤزلر دئسه‌ز، بیر مدّت سونرا داها سیزی حسابا قویمایا‌جاق. «یوخ» سؤزونو هر یئرده خرجله‌مه‌یین اونو فقط ضروری یئرلرده ایشله‌دین. مثلاً اوشاق یاندیران و خطرلی بیر شئیین اوستونه گئدنده تئز و قاطعیّتله «یوخ» دئمه‌لیسیز. خطرسیز یئرلرده لزومو یوخدور «یوخ»دان استفاده ائلیه‌سیز. مثلاً بونون یئرینه كی دئیه‌سیز: «یوخ! ماشیندا باشماق چیخارتمازلار». یاخشی اولار دئیه‌سیز: «ائوه یئتیشه‌نه قدر اونلاری آیاغیندا ساخلا ! یئتیشندن سونرا آیاقلین یئرییه بیلرسن».
اوشاقلار سیزین دئدیكلریزدن چوخ، عمللریزه باخیرلار. اؤیرشدیكلری‌نین چوخو بؤیوكلردن تقلید ائله‌دیكلریدیر. بونا گؤره سؤزله اؤیرتمكدن علاوه، اونلارا بیر ایشی اؤیرتمكدن اؤترو او ایشی اونلارین گؤزونون قاباغیندا ائله‌یین. مثلاً اوشاغیز دوستلارینی وورورسا، مهربانلیغی اونا عملاً اؤیردین. دوستلاری‌نین بیرینی مهربالیقلا قوجاغیزا آلین. اوشاق‌دا اونلارا محبّت ائله‌مگی اؤیرنر. یا مثلاً دیشلرینی یوماق اونا آغیر گلسه، هیجانلی اولماق اوچون بو ایشی بیرلیكده گؤرون.
یاخشی ایشلری تشویق ائدین. اوشاقلار بعضاً یاخشی رفتاری باجارمادیقلاری اوچون پیس رفتار ائلیرلر. بونا گؤره اونا یاخشی عملین نه اولدوغونو اؤیرتمه‌لیسیز. اوشاق یاخشی ایش گؤرنده اونو تشویق ائدین. بئله‌لیكله او سیزین هانسی عمل‌لردن خوشوز گلدیگینی بیلر.