جامعه‌نین قضاوتی اشخاصی یالانچی ائلیر
یازار : میرزه عبدالصمد ملکی | بؤلوم : اجتماعی
+0 به یه ن
جامعه‌نین قضاوتی اشخاصی یالانچی ائلیر
یاخشی اولار یالانین تعریفینه نظر سالاق: حقیقت و واقعیتله مطابق اولمایان عمل و سؤزه یالان دئییلیر. یالانچی شخص ذهنلری حقیقتدن منحرف ائله‌مكدن اؤتری یالان دانیشار. مثلاً اؤزو باطلین اساس مهره‌لریندن بیری اولاركن اؤزگه‌نین یانیندا و ظاهرده حقدن دفاع ائلیر.
یالانلارین چوخونون اساس عاملی قورخودور. متأسفانه بیزیم جامعه‌میزده تنبیهلی رفتارلار، دانلاماق و مقایسه‌لی رفتارلار انسانلاری، ائله اوشاقلیق یاشلاریندان یالان دانیشماغا طرف سوق وئریر. اوشاق، تنبیه و مجازاتدان قورتولماقدان اوچون یالان دانیشماغی لاپ راحت یول كیمی سئچیر. و بو رفتار اونون شخصیتینده كؤك سالیر.
اؤزونه اینانماماق و اعتماد به نفسین اولماماغی‌دا یالان دانیشماغین آیری سببلریندن بیردیر. اؤزونه اینانمایان شخص همیشه اؤزونه ایده‌آل شخصیت كیمی گؤرستمگه چالیشار و بونا گؤره یالان دانیشماقلا اؤزلریندن آیری بیر شخصیت تصویره چكمگه چالیشارلار.
تأسفله یالان دانیشانلار اؤز پیس عمللری‌نین جزاسینی گؤرمورلر و بو جهتدن یالان دانیشماق نه اینكی منفی بیر خصلت بلكه معمولی و گاهدان مثبت بیر خصلت كیمی حسابلانیر. بو مسأله‌نی حل ائله‌مكدن اؤتری عایله و جامعه‌ده یالان دانیشانلاری یالانلاری‌نین هزینه‌سینی وئرمگه مجبور ائله‌ین بیر مكانیزم لازمدیر كی یالانچیلاری ائله‌دیكلری پیس داورانیشلارین جزاسینی چكمله اونون قبیح و پیس اولدوغونو آنلاسینلار.
بیر جامعه‌نین اساس سرمایه‌لریندن متقابل اینانماق و عمومی اطمیناندیر كی یالان دانیشماق بو سرمایه‌نی كورلاییر و آرادان آپاریر. یالان دانیشماق خیانتدیر. یالان دانیشماق معمولی رفتارا تبدیل اولان بیر جامعه‌ده گروهی و جمعی ایشلر، اورك بیرلیگی و مشاركت آرادان گئدر و اضطراب، خشونت، بدبینلیق، عدالتسیزلیك و صداقتسیزلیك اوندا ریشه سالار.
یالان دانیشماق انسانین 5-4 یاشیندان باشلار. انسانلار گونده‌لیك یاشاییشلاریندا اؤزگه‌یه توهیندن اجتناب اوچون، شخصی حسّیّاتلارینی گیزلتمكدن اؤترو و آیری سببلره گؤره یالان دانیشیرلار. آما یالان گونده‌لیك مشكل‌لرین حلّی اوچون همیشه ایشلنیرسه چوخ ضررلی اولوب بیر ناخوشلوق ساییلار. بونا گؤره بئله انسانلارا ناخوش گؤزونده باخیلمالیدیر و اونلارین درمانی اوچون روانشناس و حتّی روانپزشكدن كؤمك آلینمالیدیر.