اجتماعی شبکه‌لر، عایله‌لره تحمیل اولان تازا عضو
یازار : میرزه عبدالصمد ملکی | بؤلوم : اجتماعی
+0 به یه ن
اجتماعی شبکه‌لر، عایله‌لره تحمیل اولان تازا عضو
عایله عضولری، بیر عایله‌نین عضولریندن چوخ ائو آدیندا دؤرد دیوار ایچینده یاشایان مختلف و بیگانه آداملار بنزه‌ییرلر. هر کسین باشی اؤزونه مشغولدور. بیری اؤز اؤزونه گولمکده‌دیر او بیری تئز تئز تایپ ائلیر. بو جور عایله‌لرده دانیشماق یاددان چیخمیش مفهوما چئوریلیب. ائله بیل دانیشماق واخت تلف ائله‌مک معناسیندادیر و بیرینی دانیشدیراندا اونا مزاحم اولماق کیمی اولور.
بو جور عایله‌لرین سایی آز دئییل. مختلف اجتماعی شبکه‌لرین مخصوصاً موبایلا دایانان اجتماعی شبکه‌لرین زندگانلیقلارا داخل اولماسی بو تیپده‌کی عایله‌لرین باشینی اؤزونه قاتیب. بعضی والدینلر اوشاقلارینی ائوین بیر بوجاغینا سیخیلیب سس‌سیز اجتماعی شبکه‌لرله مشغول اولدوغونو گؤرنده اوشاقلارین باش آشاغا اوشاق اولدوغونو گمان ائدیب بو امکانی اونلارا یارادا بیلدیکلری اوچون اؤزلرینده غرور حسّ ائلیرلر. اونلارا گؤره اوشاقلار کوچه بازاردا ناباب دوستلارلا گزمک یئرینه اجتماعی شبکه‌لرده دولانسالار داها یاخشی اولار.
عایله عضولری‌نین آراسیندا بو رابطه‌سیزلیک کرپیجلری خیردا خیردا هؤرولوب اوجا دیوارلار یارادیرلار کی اونلاری بیر داها ییخماق اولمایاجاق.
عایله‌لرده تجریدین آرتماسی
اجتماعی شبکه‌لر عایله اعضاسی‌نین رابطه‌سی‌نین آزالماسینا سبب اولور و عایله‌لرین چوخوندا مجازی شبکه‌لر، عضولر آراسینداکی دانیشیغین یئرینی توتوب. عایله‌نین اساس نقشلریندن بیری، فردلری مستقل و عین حالدا عایله‌نین اعضاسی‌نین ایستکلرینه دقّتلی، بارا گتیرمکدیر. آما مجازی شبکه‌لر عایله‌لرین بو نقشینی آزالدیر و انسانلاری جمعدن آییریر و تجرید ائلیر. بو انسانلار فقط اؤز ایستکلرینه دقت ائلیرلر و آیریلارین نه‌یه احتیاجلاری‌نین اولدوغو اونلارا اهمیتی یوخدور.
عایله عضولری‌نین بیربیرلرینه آییرماغا واخت اولمایاندا بیر بیرلرینی‌ده تانیماغا امکانلاری و علاقه‌لری اولمور و بئله‌لیکله بیر دام آلتیندا یاشایان غریبه‌لره چئوریلیرلر.